Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. X.
1 Samuel forsothe took a `litil brytil
vessel of oyle, and heelde out on his heed,
and he kisside hym, and seith, Loo! the
Lord hath anoyntide thee vp on his erytage
into a prince; and thow shalt delyuer
his puple fro the hoondis of her
enemyes, `the which ben in enuyroun
of it. And this to thee a tokne, for the
Lord hath anoyntide thee into a prince;
whanne thow gost to dai fro me,
2 thow
shalt fynde two men byside the sepulcre
of Rachel, in the coostis of Beniamyn, in
the mydday, feermynge greet dichis;
and thei shulen seye to thee, The she
assis ben foundun, to the whiche to be
sou&yogh;t thou wentist; and thi fader, the
meen while the assis laft, is bisy for &yogh;ow,
and seith, What shal Y do of my sone?
3 And whanne thou gost thens, and ferther
passist, and comest to the ook of
Thabor, thre men shulen fynde thee
there, stiynge vp to God into Bethel,
oon berynge thre kyddis, and another
berynge thre kakis of breed, and another
berynge a galoun of wyn.
4 And whanne
thei saluten thee, thei shulen &yogh;yue to thee
two looues, and thow shalt take of the
hoond of hem.
5 After thes thingis thou
shalt come into the hil of the Lord,
where is the stacioun of Phylistynes;
and whanne thow were goon into the
cytee, there thow shalt haue metynge a
floc of prophetis comynge doun fro the
hee&yogh;, and before hem a sawtrye, and a
tymbre, and a trompe, and an harp, and
hem propheciynge.
6 And the Spyrit of
-- --
the Lord shal leep into thee, and thow
shalt prophecye with hem, and thow shalt
be chaungid into another man.
7 Whanne
thanne alle thes toknes comen to thee, do
what euere thingis fyndith thin hoond,
for the Lord is with thee.
8 And thow
shalt goo doun before me in Galgala; forsothe
Y shal come down to thee, that
thow offre an offrynge, and offre pesible
slayn sacrificis; seuen days thow shalt
abide, to the tyme that Y come to thee,
and shewe to thee what thow doo.
9 And
so whanne he hadde turned his shuldre,
that he &yogh;ede fro Samuel, God with ynne
chaungide to hym another herte, and alle
thes toknes camen in that day.
10 And thei
camen to the forseyd hil, and loo! a companye
of prophetis metynge to hym; and
the Spyryt of the Lord leepe yn vpon
hym, and he propheciede in the mydil of
hem.
11 Forsothe seynge alle, that knewen
hym &yogh;istyrday and the thridde day hens,
that he was with prophetis, and prophecide,
seiden togidre, What nowe thing
fallith to the sone of Cys? Whether and
Saul among the prophetis?
12 And another
answerde to the tothir, seiynge, And who
is the fadre of hym? Therfor it is turnyd
into a prouerbe, Whether and Saul among
the prophetis?
13 Forsothe he ceside to prophecie,
and cam to the hei&yogh;.
14 And the
brother of the fader of Saul saide to
hym, and to his child, Whidre `wenten
&yogh;e? The whiche answerde, To seche the
she assis; the whiche whanne we hadden
not founde, we camen to Samuel.
15 And
his fader brother seide to him, Shewe to
me what Samuel seide to thee.
16 And Saul
seith to his fader brothir, He shewide
to vs, for the she assis weren founden.
Forsothe of the word of the kyngdam he
shewide not to hym, the which Samuel
spak to hym.
17 And Samuel clepide togidre
the puple to the Lord in Masphat;
-- --
and seith to the sones of Yrael,
18 Thes
thingis seith the Lord God of Yrael, Y
haue ladde out Yrael fro Egipt, and Y
haue delyuerde &yogh;ow fro the hoond of
Egipciens, and fro the hoond of alle
kyngis that tourmentiden &yogh;ow.
19 Forsothe
&yogh;e to day han throwun awey &yogh;oure God,
the which alone saueth &yogh;ow fro alle
yuels, and &yogh;oure tribulaciouns; and &yogh;e
han seiden, Nay, but a kyng ordeyn
vpon vs. Nowe thanne stondith before
the Lord bi &yogh;oure lynagis, and by meynees.
20 And Samuel appliede alle the lynagis
of Yrael, and the lot felle vpon the
lynage of Beniamyn.
21 And he apliede
the lynage of Beniamyn, and the kynredis
of hym; and lot felle vpon the kynrede
of Metry, and cam vnto Saul, the
sone of Cys. Thanne thei sou&yogh;ten hym,
and he is not founden there.
22 And thei
counseilden after thes thingis the Lord,
forsothe whether he were to come thidre.
And the Lord answerde, Loo! he is hidde
at home.
23 And so thei runnen, and token
hym thens; and he stood in the mydil of
the puple, and he was hei&yogh;er than al the
puple fro the shuldres and aboue.
24 And
Samuel seith to al the puple, Certis &yogh;e
seen whom the Lord hath chosun; for
there is noon lijk to hym in al the puple.
And al the puple criede, and seith, Lyue
the kyng!
25 Forsothe Samuel spak to the
puple the lawe of the rewme, and wroot
in the book, and leyde vp before the
Lord. And Samuel laft al the puple, eche
into her hows;
26 but and Saul wente into
his hows in Gabaath; and wente with
hym a paart of the oost, of whom God
hadde towchid the hertis.
27 Forsothe the
sones of Belial seiden, Whether this shal
mowe saue vs? And thei dispysiden
hym, and brou&yogh;ten not to hym &yogh;iftis;
forsothe he feynde, as thou&yogh; he herde
not.
-- --
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|