Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. III.
1 Forsothe aftir that Ruth turnede a&yogh;en
to hir modir in lawe, Ruth herde of hir,
My dou&yogh;tir, Y schal seke reste to thee note,
and Y schal purueye that it be wel to
thee.
2 This Booz, to whose damesels thou
were ioyned in the feeld, is oure kynesman,
and in this ni&yogh;t he wyndewith
the corn floor of barli.
3 Therfor be thou
waischun, and anoyntid, and be thou
clothid with onestere clothis, and go doun
in to the corn floor; the man, `that is,
Booz, se not thee, til he haue endid the
mete and drynke.
4 Forsothe whanne he
goth to slepe, marke thou the place `in
which he slepith; and thou schalt come
and vnhile the cloth, `with which he is
hilid, fro the part of the feet, and thou
schalt caste thee doun, and thou schalt
ly there. Forsothe he schal seie to
thee, what thou `owist to do.
5 Which answeride,
What euer thing thou comaundist,
Y schal do.
6 And sche &yogh;ede doun in
to the corn floor, and dide alle thingis
whiche hir modir in lawe comaundide to
hir.
7 And whanne Booz hadde ete and
drunke, and was maad gladere, and
hadde go to slepe bisidis the `heep of
handfuls, sche cam, and hidde hir silf;
and whanne the cloth was vnhilid fro
`hise feet, sche castide doun hir silf.
8 And
lo! now at mydny&yogh;t `the man dredde,
and was troblid; and he si&yogh; a womman note
lyggynge at hise feet;
9 and he seide to
-- --
hir, Who art thou? Sche answeride, Y am
Ruth, thin handmayde; stretche forth thi
cloth on thi seruauntesse, for thou art
ny&yogh; of kyn.
10 And he seide, Dou&yogh;tir,
thou art blessid of the Lord, and thou
hast ouercome the formere mercy with
the lattere; for thou `suedist not &yogh;onge
men, pore ethir riche.
11 Therfor `nyle thou
drede, but what euer thing thou schalt
seie to me, Y schal do to thee; for al
the puple that dwellith with ynne the
&yogh;atis of my cytee woot, that thou art a
womman of vertu.
12 And Y forsake not,
that Y am of ny&yogh; kyn, but another man
is neer than Y;
13 reste thou in this ny&yogh;t,
and whanne the morewtid is maad, if he
wole holde thee bi ri&yogh;t of ny&yogh; kyn, the
thing is wel doon; forsothe if he nyle,
Y schal take thee with outen ony doute,
the Lord lyueth, `that is, bi the Lord
lyuynge; slepe thou til the morewtid.
14 Therfore sche slepte at `hise feet til to
the goyng awey of ny&yogh;t, and so sche
roos bifor that men knewen `hem silf
togidere. And Booz seide to hir, Be
thou war lest ony man knowe, that thou
camest hidir.
15 And eft he seide, Stretche
forth thi mentil `with which thou `art
hilid, and holde thou with euer either
hond. And while sche stretchide forth
and helde, he mete sixe buyschels note of
barly, and `puttide on hir; and sche bar,
and entride in to the citee,
16 and cam to
hir modir in lawe. Which seide to Ruth,
What hast thou do, dou&yogh;ter? And Ruth
telde to hir alle thingis, whyche `the
man hadde do to hir.
17 And Ruth seide,
Lo! he &yogh;af to me sixe buyschels of barly;
and he seide, Y nyle that thou turne
a&yogh;en voide to thi modir in lawe.
18 And
Noemy seide, Abide, dou&yogh;tir, til we sien
what issu the thing schal haue; for the
man schal not ceesse, no but he fille tho
thingis whiche he spak.
-- --
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
