Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. VI.
1 Forsothe Jerico was closid and wardid,
for the drede of the sones of Israel, and
no man durste entre, ethir go out.
2 And
the Lord seide to Josue, Lo! Y &yogh;af in to
thin hondis Jerico, and the king therof,
and alle strong men.
3 Alle &yogh;e fi&yogh;teris,
cumpasse the citee onys bi the day; so
&yogh;e schulen do in sixe daies.
4 Forsothe in
the seuenthe dai the preestis schulen take
seuene clariouns, of whiche `the vss is in
iubile; and thei schulen go bifor the
arke of boond of pees; and seuen sithes &yogh;e
schulen cumpasse the citee, and the
preestis schulen trumpe with clariouns.
5 And whanne the vois of the trumpe schal
sowne lengere, and more bi whiles, and
schal sowne in &yogh;oure eeris, al the puple
schal crie togidere with gretteste cry;
and the wallis of the citee schulen falle
alle doun, and alle men schulen entre bi
the place, a&yogh;ens which thei stonden.
6 Therfor
Josue, the sone of Nun, clepide preestis,
and seide to hem, Take &yogh;e the ark of
boond of pees, and seuene othere preestis
take seuene clariouns of iubile &yogh;eeris,
and go thei bifor the arke of the Lord.
7 Also Josue seide to the puple, Go &yogh;e, and
cumpasse &yogh;e the citee, and go &yogh;e armed
bifor the arke of the Lord.
8 And whanne
Josue hadde endid the wordis, and seuene
preestis trumpiden with seuen clariouns
bifor the arke of boond of pees of
the Lord,
9 and al the puple armed &yogh;ede bifore,
the tothir comyn puple note of fi&yogh;teris
-- --
suede the arke, and alle thingis sowneden
with clariouns.
10 Sotheli Josue comaundide
to the puple, and seide, &YOGH;e schulen not
crye, nethir &yogh;oure vois schal be herd, nethir
ony word schal go out of &yogh;oure mouth,
til the dai come, in which Y schal seie to
&yogh;ou, Crye &yogh;e, and make &yogh;e noyse.
11 Therfor
the arke of the Lord cumpasside the
citee onys bi day, and turnede a&yogh;en in to
the castels, and dwellide there.
12 Therfor
while Josue roos bi ny&yogh;t note, preestis tooken
the arke of the Lord;
13 and seuene of the
preestis token seuen clariouns, of whiche
`the vss is in iubilee, and &yogh;eden bifor
the arke of the Lord, `and &yogh;eden, and
trumpiden; and the puple &yogh;ede armed bifor
hem. Sotheli the tother comyn puple
suede the arke, and sownede with clariouns.
14 And thei cumpassiden the citee in
the secunde dai onys, and turneden a&yogh;en
in to the castels; so thei dyden in sixe
daies.
15 Sotheli in the seuenthe dai thei
risiden eerli, and cumpassiden the citee,
as it was disposid, seuen sithis.
16 And
whanne in the seuenthe cumpas preestis
sowneden with clariouns, Josue seide to al
Israel, Crie &yogh;e, for the Lord hath bitake
the citee to vs;
17 and this citee be cursid note,
ethir distried, and alle thingis that ben
therynne be halewid to the Lord. Raab
the hoor aloone lyue, with alle men that
ben with hir in the hows; for sche hidde
the messangeris whiche we senten.
18 Forsothe
be &yogh;e war, lest &yogh;e touchen ony thing
of these that ben comaundid to &yogh;ou, and
&yogh;e ben gilti of trespassyng; and alle the
castels of Israel be vndur synne, and be
troblid.
19 Sotheli what euer thing is of
gold, and of siluer, and of brasun vessels,
and of yrun, be halewid to the Lord, and
be kept in hise tresoris.
20 Therfor while
al the puple criede, and the trumpis sowneden,
aftir that the sowne sownede in the
-- --
eeris of the multitude, the walles felden
doun anoon; and ech man stiede bi the
place that was a&yogh;ens hym. And thei token
the citee,
21 and killiden alle thingis that
weren therynne, fro man `til to womman,
fro &yogh;ong child `til to eld man; also thei
smytiden bi the scharpnesse of swerd,
oxun, and scheep, and assis.
22 Forsothe
Josue seide to twei men, that weren sent
aspieris, Entre &yogh;e in to the hows of the
womman hoore, and brynge &yogh;e forth hir,
and alle thingis that ben herne, as &yogh;e
maden stedfast to hir bi an ooth.
23 And
the &yogh;onge men entriden, and ledden out
Raab, and her fadir, and modir, and britheren,
and al the purtenaunce of houshold,
and the kynrede `of hir; and
maden to dwelle without the castels of
Israel.
24 Sotheli thei brenten the citee,
and alle thingis that weren foundun therynne,
without gold, and siluer, and brasun
vesselis, and yrun, which thei halewiden
in to the `treserie of the Lord.
25 Sotheli
Josue made Raab the hoore to lyue,
and `the hows of hir fadir, and alle thingis
that sche hadde; and thei dwelliden in the
myddis of Israel, `til in to present dai;
for sche hidde the messangeris, whiche he
sente to asspie Jerico. In that tyme Josue
preiede hertli,
26 and seide, Cursid bifor the
Lord be the man, that reisith and bildith
the citee of Jerico! Leie he the foundementis
therof in his firste gendrid sone,
and putte he the &yogh;atis therof in the laste
of fre children.
27 Therfor the Lord was
with Josue, and his name was pupplischid
in ech lond.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
