Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. XXXII.
1 &YOGH;e heuenes, here what thingis Y schal
speke; the erthe here the wordis of my
mouth.
2 My techyng wexe togidere as
reyn; my speche flete out as dew, as
lytil reyn on eerbe, and as dropis on
gras.
3 For Y schal inwardli clepe the
name of the Lord; &yogh;yue &yogh;e glorie to oure
God.
4 The werkis of God ben perfit, and
alle hise weies ben domes; God is feithful,
and without ony wickidnesse; God is
iust and ri&yogh;tful.
5 Thei synneden a&yogh;ens
hym, and not hise sones in filthis, `that
is, of idolatrie; schrewid and waiward
generacioun.
6 Whether thou &yogh;eldist these
thingis to the Lord, thou fonned puple
and vnwijs? Whether he is not thi fadir,
that weldide thee, and made, `and made
-- --
thee of nou&yogh;t?
7 Haue thou minde of elde
daies, thenke thou alle generaciouns; axe
thi fadir, and he schal telle to thee, axe
thi grettere men, and thei schulen seie to
thee.
8 Whanne the hi&yogh;este departide folkis,
whanne he departide the sones of Adam,
he ordeynede the termes of puplis bi
the noumbre of the sones of Israel note.
9 Forsothe
the part of the Lord is his puple;
Jacob is the litil part of his eritage.
10 The
Lord foond hym in a deseert lond, `that
is, priued of Goddis religioun, in the
place of orrour `ethir hidousnesse, and
of wast wildirnesse; the Lord ledde hym
aboute, and tau&yogh;te hym, and kepte as the
apple of his i&yogh;e.
11 As an egle stirynge his
briddis to fle, and fleynge on hem, he
spredde forth his wyngis, and took hem,
and bar in hise schuldris.
12 The Lord
aloone was his ledere, and noon alien god
was with hym.
13 The Lord ordeynede hym
on an hi&yogh; lond, that he schulde ete the
fruytis of feeldis, that he schulde souke
hony of a stoon, and oile of the hardeste
roche;
14 botere note of the droue, and
mylke of scheep, with the fatnesse of
lambren and of rammes, of the sones of
Basan; and that he schulde ete kydis
with the merowe of wheete, and schulde
drynke the cleereste blood of grape.
15 The louede puple was `maad fat, and
kikide a&yogh;en note; maad fat withoutforth,
maad fat with ynne, and alargid; he forsook
God his makere, and &yogh;ede awei fro
`God his helthe.
16 Thei terriden hym to
ire in alien goddis, and thei excitiden
-- --
to wrathfulnesse in abhomynaciouns.
17 Thei offriden to feendis, and not to God,
to goddis whiche thei knewen not, newe
goddis, and freische camen, whiche `the
fadris of hem worschipiden not.
18 Thou
hast forsake God that gendride thee, and
thou hast for&yogh;ete `thi Lord creatour.
19 The
Lord si&yogh;, and was stirid to wrathfulnesse;
for hise sones and dou&yogh;tris terriden hym.
20 And the Lord seide, Y schal hyde my
face fro hem, and Y schal biholde `the
laste thingis of hem; for it is a waiward
generacioun, and vnfeithful sones.
21 Thei
terriden me in hym that was not God,
and thei `terriden to ire in her vanytees;
and Y schal terre hem in hym, that is
not a puple, and Y schal terre hem `to
yre in a fonned folk.
22 Fier, that is, peyne
maad redi to hem, is kyndlid in my
stronge veniaunce, and it schal brenne `til
to the laste thingis of helle; and it schal
deuoure the lond with his fruyt, and it
schal brenne the foundementis of hillis.
23 Y schal gadere `yuels on hem, and Y schal
fille myn arewis in hem.
24 Thei schulen be
waastid with hungur, and briddis schulen
deuoure hem with bitteriste bityng; Y
schal sende in to hem the teeth of beestis,
with the woodnesse of wormes drawynge
on erthe, and of serpentis.
25 Swerd with
outforth and drede with ynne schal waaste
hem; a &yogh;ong man and a virgyn togidre, a
soukynge child with an elde man.
26 And
Y seide, Where ben thei? Y schal make
the mynde of hem to ceesse of men.
27 But
Y delayede for the yre of enemyes, lest
perauenture `the enemyes of hem shulden
be proude, and seie, Oure hi&yogh; hond, and
not the Lord, dide alle these thingis.
28 It
-- --
is a folk with out counsel, and with out
prudence;
29 Y wolde that thei saueriden,
and `vnderstoden, and purueiden the laste
thingis.
30 How pursuede oon of enemyes a
thousynde of Jewis, and tweyne dryuen
awey ten thousynde? Whether not therfore
for her God selde hem, and the
Lord closide hem togidere?
31 For oure
God is not as the goddis of hem, and
oure enemyes ben iugis.
32 The vyner of
hem is of the vyner of Sodom, and of
the subarbis of Gomorre; the grape of
hem is the grape of galle, and the clustre
is most bittir.
33 The galle of dragouns is
the wyn of hem, and the venym of eddris,
that may not be heelid.
34 Whether these
thingis ben not hid at me, and ben seelid
in myn tresouris?
35 Veniaunce is myn, and
Y schal &yogh;elde to hem in tyme, that the
foot of hem slide; the dai of perdicioun is
ny&yogh;, and tymes hasten to be present.
36 The
Lord schal deme his puple, and he schal
do merci in hise seruauntis; the puple
schal se that the hond of fi&yogh;teres is sijk,
and also men closid failiden, and the residues
ben waastid.
37 And thei note schulen
seie, Where ben `the goddis of hem, in
whiche thei hadden trust?
38 Of whos sacrifices
thei eeten fatnessis, and drunkun
the wyn of fletynge sacrifices, rise thei
and helpe &yogh;ou, and defende thei &yogh;ou in
nede.
39 Se &yogh;e that Y am aloone, and noon
other God is outakun me; Y schal sle,
and Y schal make to lyue; Y schal
smyte, and Y schal make hool; and noon
is that may delyuere fro myn hond.
40 And
Y schal reise myn hond to heuene, and
Y schal seie, Y lyue with outen ende.
41 If Y
schal whette my swerd as leit, and myn
hond schal take doom, Y schal &yogh;elde veniaunce
to myn enemyes, and Y schal quyte
-- --
to hem that haten me.
42 Y schal fille
myn arewis with blood, and my swerd
schal deuoure fleischis note of the blood of
hem that ben slayn, and of the caitifte of
the heed of enemyes maad nakid note.
43 Folkis,
preise &yogh;e the puplis of hym, for he
schal venie the blood of hise seruauntis,
and he schal &yogh;elde veniaunce in to the
enemyes of hem; and he schal be merciful
to the lond of his puple.
44 Therfor Moises
cam, and spak alle the wordis of this song
in the eeris of the puple; bothe he and
Josue, the sone of Nun.
45 And `he fillide
alle these wordis, and spak to alle Israel,
and seide to hem,
46 Putte &yogh;e &yogh;oure hertis in
to alle the wordis whiche Y witnesse to
&yogh;ou to day, that &yogh;e comaunde to &yogh;oure
sones, to kepe, and do tho, and to fulfille
alle thingis that ben writun in the
book of this lawe;
47 for not in veyn tho
ben comaundid to &yogh;ou, but that alle men
schulden lyue in tho; whiche wordis
&yogh;e schulen do, and schulen contynue in
long tyme in the lond, to which &yogh;e schulen
entre to welde, whanne Jordan is passid.
48 And the Lord spak to Moises in the same
day,
49 and seide, Stie thou in to this hil
Abirym, that is, passyng, in to the hil of
Nebo, which is in the lond of Moab,
a&yogh;ens Jerico; and se thou the lond of Canaan,
which Y schal &yogh;yue to the sones of
Israel to holde, and die thou in the hil.
50 In to which hil thou schalt stie, and
schalt be ioyned to thi puplis, as Aaron,
thi brother, was deed in the hil of Hor,
and was put to his puplis.
51 For &yogh;e trespassiden
a&yogh;ens me, in the myddis of the
sones of Israel, at the Watris of A&yogh;enseiyng,
in Cades of deseert of Syn; and
&yogh;e halewiden not me among the sones of
Israel.
52 A&yogh;enward thou schalt se the lond,
and schalt not entre in to it, which Y
schal &yogh;yue to the sones of Israel.
-- --
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
