Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. X.
1 In that tyme the Lord seide to me,
Hewe thou twei tablis of stoon to thee, as
the formere weren; and stie thou to me
`in to the hil. And thou schalt make an
arke,
2 `ether a cofere, of tree, and Y schal
write in the tablis, the wordis that
weren in these tablis whiche thou brakist
bifore; and thou schalt putte tho tablis in
to the arke.
3 Therfor Y made an ark of
the trees of Sechim, and whanne Y hadde
hewe twei tablis of stoon, at the licnesse
of the formere tablis, Y stiede in to the
hil, and hadde the tablis in the hondis.
4 And he wroot in the tablis, bi that that
he `hadde writun bifore, ten wordis,
whiche the Lord spak to &yogh;ou in the hil,
fro the myddis of the fyer, whanne the
puple was gaderid, and he &yogh;af the tablis
to me.
5 And Y turnide a&yogh;en fro the hil,
and cam doun, and puttide the tablis in
to the arke which Y hadde maad, `whiche
tablis ben there hidur to, as the Lord
comaundide to me.
6 Forsothe the sones
-- --
of Israel moueden tentis fro Beroth of
the sones of Jachan in to Mosera, where
Aaron was deed, and biried, for whom his
sone Eleazar was set in preesthod.
7 Fro
thennus thei camen in to Galgad; fro
which place thei &yogh;eden forth, and settiden
tentis in Jehabatha, in the lond of watris
and of strondis.
8 In that tyme Y departide
the lynage of Leuy, that it schulde bere
the arke of boond of pees of the Lord,
and schulde stonde bifor hym in seruyce,
and schulde blesse in his name til in to
present dai.
9 For which thing Leuy hadde
not part, nether possession with hise brithren,
for the Lord hym silf is his possessioun,
as thi Lord God bihi&yogh;te to hym.
10 Forsothe Y stood in the hil as bifore,
fourti daies and fourti ni&yogh;tis, and the
Lord herde me also in this tyme, and
nolde leese thee.
11 And he seide to me,
Go thou, and go bifor this puple, that it
entre, and welde the lond which Y swoor
to her fadris, that Y schulde &yogh;eue to hem.
12 And now, Israel, what axith thi Lord
God of thee, no but that thou drede thi
Lord, and go in hise weies, and that thou
loue hym, and serue thi Lord God in al
thin herte, and in al thi soule;
13 and that
thou kepe the comaundementis of thi
Lord God, and the cerymonyes of hym,
whiche Y comaunde to thee to dai, that it
be wel to thee.
14 Lo! heuene is of thi Lord
God, and heuene of heuene; the erthe
and alle thingis that ben ther ynne ben
hise;
15 and netheles the Lord was glued note
to thi fadris, and louede hem, and he
chees her seed after hem, and &yogh;ou of alle
folkis, as it is preued to dai.
16 Therfor circumcide
&yogh;e the prepucie, `ethir vnclennesse,
of &yogh;oure herte note, and no more make
&yogh;e harde &yogh;oure nol.
17 For &yogh;oure Lord God
hym silf is God of goddis, and Lord of
-- --
lordis, `God greet, and mi&yogh;ti, and feerdful,
which takith not persoone, nether
&yogh;iftis.
18 He makith doom to the fadirles,
and modirles, and to the widewe; he
loueth a pilgrym, and &yogh;yueth to hym lyiflode
and clothing.
19 And therfor `loue &yogh;e
pilgryms, for also &yogh;e weren comelyngis
in the lond of Egipt.
20 Thou schalt drede
thi Lord God, and thou schalt serue hym
aloone, and thou schalt cleue to hym, and
thou schalt swere in his name.
21 He is
thi preisyng, and thi God, that made to
thee these grete dedis, and ferdful,
whiche thin i&yogh;en si&yogh;en.
22 In seuenti men
thi fadris &yogh;eden doun in to Egipt, and
lo! now thi Lord God hath multiplied
thee as the sterris of heuene.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
