Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. XXVII.
1 But as it was demed hym to schippe
into Ytalie, thei bitoken Poul with othere
kepers to a centurien, bi name Julius, of
the cumpeny of kny&yogh;tis of the emperoure.
2 And we wenten vp in to the schip of
Adrymetis, and bigunnen to seile, and
weren borun aboute the placis of Asie,
while Aristark of Macedonye, Tessalonycence,
dwellide stille with vs.
3 And in
the dai suynge, we camen to Sydon; and
Julius tretyde curteisli Poul, and suffride
to go to frendis, and do his nedis.
4 And
whanne we remouede fro thennus, we
vndurseiliden to Cipre, for that wyndis
weren contrarie.
5 And we seiliden in the
see of Silicie and Pamfilie, and camen to
Listris, that is Licie.
6 And there the centurien
foond a schip of Alisaundre, seilinge
in to Ytalie, and puttide vs ouer
in to it.
7 And whanne in many daies we
-- --
seilden slowli, and vnnethe camen a&yogh;ens
Guydum, for the winde lettide vs, we
seiliden to Crete, bisidis Salomona.
8 And
vnnethe we seilden bisidis, and camen
into a place, that is clepid of good hauen,
to whom the cite Tessala was ni&yogh;.
9 And
whanne miche time was passid, and
whanne seiling thanne was not sikir,
for that fasting note was passid, Poul coumfortide
hem,
10 and seide to hem, Men, Y
se note that seiling bigynneth to be with
wrong and myche harm, not oonli of
charge and of the schip, but also of
oure lyues.
11 But the centurien bileuede
more to the gouernour, and to the lord
of the schip, thanne to these thingis that
weren seid of Poul.
12 And whanne the
hauene was not able to dwelle in wynter,
ful many ordeyneden counsel to seile fro
thennus, if on ony maner thei mi&yogh;ten
come to Fenyce, to dwelle in wynter at
the hauene of Crete, which biholdith to
Affrik, and to Corum.
13 And whanne
the south blew, thei gessiden hem to
holde purpos; and whanne thei hadden
removed fro Asson, thei seiliden to Crete.
14 And not aftir miche, the wynde Tifonyk,
that is clepid north eest, was a&yogh;ens it.
15 And whanne the schip was rauyschid,
and my&yogh;te not enforse a&yogh;ens the wynde,
whanne the schip was &yogh;ouun to the
blowynges of the wynde, we weren
borun with cours into an ile,
16 that is
clepid Canda; and vnethe we mi&yogh;ten
gete a litil boot.
17 And whanne this was
takun vp, thei vsiden helpis, girdinge
togidere the schippe; and dredden, lest
thei schulden falle into sondi placis.
And whanne the vessel was vndur set,
-- --
so thei weren borun.
18 And for we weren
throwun with strong tempest, in the dai
suynge thei maden casting out.
19 And the
thridde dai with her hoondis thei castiden
awei the instrumentis of the schip.
20 And
whanne the sunne nether the sterris
weren seie bi many daies, and tempest
not a litil nei&yogh;ede, now al the hope of
oure helthe was don awei.
21 And whanne
myche fasting hadde be, thanne Poul
stood in the myddil of hem, and seide,
A! men, it bihofte, whanne &yogh;e herden
me, not to haue take awei the schip fro
Crete, and gete this wronge and casting
out.
22 And now Y counsel &yogh;ou to be of
good coumfort, for los of no persoone of
&yogh;ou schal be, outakun of the schip.
23 For
an aungel of God, whos Y am, and to
whom Y serue, stood ni&yogh; to me in this
ni&yogh;t, and seide, Poul, drede thou not;
24 it
bihoueth thee to stonde bifore the emperour.
And lo! God hath &yogh;ouun to
thee alle that ben in the schip with thee.
25 For which thing, &yogh;e men, be &yogh;e of good
coumfort; for Y bileue to my God, that
so it schal be, as it is seid to me.
26 And
it bihoueth vs to come into sum yle.
27 But aftirward that in the fourtenthe
dai the ni&yogh;t cam on vs seilinge in the
stony see, aboute mydni&yogh;t the schipmen
supposiden sum cuntre to appere to hem.
28 And thei kesten doun a plommet, and
founden twenti pasis of depnesse. And
aftir a litil thei weren departid fro thennus,
and foundun fiftene pasis.
29 And
thei dredden, lest we schulden haue fallun
in to scharp placis; and fro the last parti
of the schip thei senten foure ankeris,
and desiriden that the dai hadde be come.
30 And whanne the schipmen sou&yogh;ten to fle
-- --
fro the schip, whanne thei hadden sent
a litil boot in to the see, vndur colour as
thei schulden bigynne to stretche forth
the ankeris fro the formere part of the
schip,
31 Poul seide to the centurien and to
the kny&yogh;tis, But these dwellen in the
schip, &yogh;e moun not be maad saaf.
32 Thanne
kny&yogh;tis kittiden awei the cordis of the
litil boot, and suffriden it to falle awei.
33 And whanne the dai was come, Poul
preiede alle men to take mete, and seide,
The fourtenthe dai this dai &yogh;e `abiden,
and dwellen fastinge, and taken no
thing.
34 Wherfor Y preie &yogh;ou to take mete,
for &yogh;oure helthe; for of noon of &yogh;ou the
heer of the heed schal perische.
35 And
whanne he hadde seid these thingis,
Poul took breed, and dide thankyngis
to God in the si&yogh;t of alle men; and
whanne he hadde brokun, he bigan to
eete.
36 And alle weren maad of betere
coumfort, and thei token mete.
37 And
we weren alle men in the schip, two
hundrid seuenti and sexe.
38 And thei weren
fillid with mete, and dischargiden the
schip, and castiden whete in to the see.
39 And whanne the dai was comun, thei
knewen no lond; and thei bihelden an
hauene that hadde a watir bank, in to
which thei thou&yogh;ten, if thei mi&yogh;ten, to
bringe vp the schip.
40 And whanne thei
hadden take vp the ankeris, thei bitoken
hem to the see, and slakiden togidir the
ioyntours of gouernails. And with a
litil seil lift vp, bi blowyng of the wynde
thei wenten to the bank.
41 And whanne
we felden into a place of grauel gon al
aboute with the see, thei hurtliden the
schip. And whanne the formere part was
fitchid, it dwellide vnmouable, and the
-- --
last part was brokun of strengthe of the
see.
42 And counsel of the kni&yogh;tis was, to
sle men that weren in warde, lest ony
schulde ascape, whanne he hadde swymmed
out.
43 But the centurien wolde kepe
Poul, and forbede it to be don. And he
comaundide hem that mi&yogh;te swymme, to
go in to the see, and scape, and go out
to the loond.
44 And thei baren summe
othere on boordis, summe on tho thingis
that weren of the schip. And so it was
don, that alle men ascapiden to the lond.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
