Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. IV.
1 I witnesse bifore God and Crist Jhesu,
that schal deme the quike and the deed,
and bi the comyng of hym, and the
kyngdom of hym,
2 preche the word, be
thou bisi couenabli with outen rest, repreue
thou, biseche thou, blame thou in
al pacience and doctryn.
3 For tyme
schal be, whanne men schulen not suffre
hoolsum teching, but at her desiris thei
schulen gadere `togidere to hem silf
maistris &yogh;itchinge to the eeris.
4 And
treuli thei schulen turne awei the heryng
fro treuthe, but to fablis thei schulen
turne.
5 But wake thou, in alle
thingis traueile thou, do the werk of
an euangelist, fulfille thi seruyce, be
thou sobre.
6 For Y am sacrifisid now, and
the tyme of my departyng is ny&yogh;.
7 Y
-- --
haue stryuun a good strijf, Y haue endid
the cours, Y haue kept the feith.
8 In
`the tothir tyme a coroun of ri&yogh;twisnesse
is kept to me, which the Lord, a
iust domesman, schal &yogh;elde to me in that
dai; and not oneli to me, but also to
these that louen his comyng.
9 Hy&yogh;e
thou to come to me soone. For Demas,
louynge this world, hath forsakun me,
and wente to Tessalonyk,
10 Crescens in
to Galathi, Tite in to Dalmacie;
11 Luk
aloone is with me. Take thou Mark,
and brynge with thee; for he is profitable
to me in to seruyce.
12 Forsothe Y
sente Titicus to Effesi.
13 The cloth note
which Y lefte at Troade at Carpe,
whanne thou comest, bringe with thee,
and the bookis, but moost parchemyne.
14 Alisaundre, the tresorer, schewide to me
myche yuele; `the Lord schal &yogh;elde to
hym aftir his werkis.
15 Whom also thou
eschewe; for he a&yogh;enstood ful greetli oure
wordis.
16 In my firste defence no man
helpide me, but alle forsoken me; be it
not arettid to hem.
17 But the Lord helpide
me, and coumfortide me, that the
preching be fillid bi me, and that alle
folkis here, that Y am delyueride fro the
mouth of the lioun.
18 And the Lord delyueride
me fro al yuel werk, and schal
make me saaf in to his heuenly kingdom,
to whom be glorie in to worldis
of worldis.
19 Amen. Grete wel Prisca,
and Aquila, and the hous of Oneseforus.
20 Erastus lefte at Corynthi, and Y lefte
Trofymus sijk at Mylete.
21 Hi&yogh;e thou to
come bifore wyntir. Eubolus, and Prudent,
and Lynus, and Claudia, and alle
-- --
britheren, greten thee wel.
22 Oure Lord
Jhesu Crist be with thi spirit. The
grace of God be with &yogh;ou. Amen.
Here endith the secounde pistle to Tymothe, and bigynneth the prologe on the pistle to Tite.
-- --
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
