Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. II.
1 Therfor thou, my sone, be coumfortid
in grace that is in Crist Jhesu.
2 And what
thingis thou hast herd of me bi many
witnessis, bitake thou these to feithful
men, whiche schulen `be also able to
teche othere men.
3 Trauele thou as a
good kny&yogh;t of Crist Jhesu.
4 No man
holdinge kny&yogh;thod to God, wlappith hym
silf with worldli nedis, that he plese to
hym, to whom he hath preuyd hym silf.
5 For he that fi&yogh;tith in a batel, schal not
be corowned, but he fi&yogh;te lawfuli.
6 It
bihoueth an erthetiliere to resseyue first
of the fruytis.
7 Vndurstonde thou what
thingis Y seie. For the Lord schal &yogh;yue
to thee vndurstonding in alle thingis.
8 Be thou myndeful that the Lord Jhesu
Crist of the seed of Dauid hath rise
a&yogh;en fro deth,
9 aftir my gospel, in which
Y trauele `til to boondis, as worching
yuele, but the word of God is not
boundun.
10 Therfor Y suffre alle thingis
for the chosun, that also thei gete the
heelthe, that is in Crist Jhesu, with heuenli
glorie.
11 A trewe word, that if we
ben deed togidere, also we schulen liue
togidere;
12 if we suffren, we schulen regne
togidere; if we denyen, he schal denye
vs;
13 if we bileuen not, he dwellith feithful,
he mai not denye hym silf.
14 Teche
thou these thingis, witnessinge bifore
God. Nyle thou stryue in wordis; for
-- --
to no thing it is profitable, but to the
subuerting of men that heren.
15 Bisili
kepe to &yogh;yue thi silf a preued preisable
werkman to God, with oute schame,
ri&yogh;tli tretinge the word of treuthe.
16 But
eschewe thou vnhooli and veyn spechis,
for whi tho profiten myche to vnfeithfulnesse,
17 and the word of hem crepith
as a canker. Of whiche Filete is, and
Ymeneus,
18 whiche felden doun fro the
treuthe, seiynge that the rising a&yogh;en is
now doon, and thei subuertiden the feith
of summen.
19 But the sad foundement of
God stondith, hauynge this marke, The
Lord knowith whiche ben hise, and, Ech
man that nameth the name of the Lord,
departith fro wickidnesse.
20 But in a
greet hous ben not oneli vessels of gold
and of siluer, but also of tree and of
erthe; and so summen ben in to onour,
and summe in to dispit.
21 Therfor if
ony man clensith hym silf fro these, he
schal be a vessel halewid in to onour,
and profitable to the Lord, redi to al
good werk.
22 And fle thou desiris of
&yogh;ongthe, but sue thou ri&yogh;twisnesse, feith,
charite, pees, with hem that inwardli
clepen the Lord of a clene herte.
23 And
eschewe thou foltische questiouns, and
without kunnyng, wytynge that tho
gendren chidyngis.
24 But it bihoueth
the seruaunt of the Lord to chide not;
but to be mylde to alle men, able to
teche,
25 paciente, with temperaunce repreuynge
hem that a&yogh;enstonden the treuthe,
that sum tyme God &yogh;yue to hem forthenkyng,
that thei knowen the treuthe,
-- --
26 and that thei rise a&yogh;en fro the snares
of the deuel, of whom thei ben holdun
prisoneris at his wille.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
