Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. XVIII.
1 Whanne Jhesus hadde seid these
thingis, he wente out with hise disciplis
ouer the strond of Cedron, where was a
&yogh;erd, in to which he entride, and hise
disciplis.
2 And Judas, that bitrayede
hym, knew the place, for ofte Jhesus
cam thidur with hise disciplis.
3 Therfor
whanne Judas hadde takun a cumpany
of kny&yogh;tis, and mynystris of the bischopis
and of the Fariseis, he cam thidur with
lanternys, and brondis, and armeris.
4 And
so Jhesus witynge alle thingis that weren
to come on hym, wente forth, and seide
to hem, Whom seken &yogh;e?
5 Thei answeriden
to hym, Jhesu of Nazareth. Jhesus
seith to hem, Y am. And Judas
that bitraiede hym, stood with hem.
6 And
whanne he seide to hem, Y am, thei
wenten abak, and fellen doun on the
erthe.
7 And eft he axide hem, Whom
seken &yogh;e? And thei seiden, Jhesu of
Nazareth.
8 He answeride to hem, Y
seide to &yogh;ou, that Y am; therfor if &yogh;e
seken me, suffre &yogh;e these to go awei.
9 That the word which he seide schulde
be fulfillid, For Y loste not ony of hem,
whiche thou `hast &yogh;ouun to me.
10 Therfor
Symount Petre hadde a swerd, and
drow it out, and smoot the seruaunt of
-- --
the bischop, and kittide of his ri&yogh;t eer.
And the name of the seruaunt was Malcus.
11 Therfor Jhesus seide to Petre, Putte
thou thi swerd in to thi schethe; wolt
thou not, that Y drynke the cuppe, that
my fadir &yogh;af to me?
12 Therfor the cumpenye
of kny&yogh;tis, and the tribune, and
the mynystris of the Jewis, token Jhesu,
and bounden hym,
13 and ledden hym
first to Annas; for he was fadir of Caifas
wijf, that was bischop of that &yogh;eer.
14 And
it was Caifas, that &yogh;af counsel to the
Jewis, that it spedith, that o man die
for the puple.
15 But Symount Petre suede
Jhesu, and another disciple; and thilke
disciple was knowun to the bischop.
And he entride with Jhesu, in to the
halle of the bischop;
16 but Petre stood at
the dore with outforth. Therfor `the
tother disciple, that was knowun to the
bischop, wente out, and seide to the womman
that kepte the dore, and brou&yogh;te in
Petre.
17 And the damysel, kepere of the
dore, seide to Petre, Whether thou art
also of this mannys disciplis? He seide,
Y am not.
18 And the seruantis and
mynystris stooden at the coolis, for it
was coold, and thei warmyden hem;
and Petre was with hem, stondynge
and warmynge hym.
19 And the bischop
axide Jhesu of hise disciplis, and of his
techyng.
20 Jhesus answerde to hym, Y
haue spokun opynli to the world; Y
tau&yogh;te euermore in the synagoge, and in
the temple, whider alle the Jewis camen
togidere, and in hiddlis Y spak no thing.
21 What axist thou me? axe hem that
herden, what Y haue spokun to hem;
lo! thei witen, what thingis Y haue seid.
22 Whanne he hadde seid these thingis, oon
of the mynystris stondynge ni&yogh;, &yogh;af a
buffat to Jhesu, and seide, Answerist
thou so to the bischop?
23 Jhesus answeride
to hym, If Y haue spokun yuel, bere
-- --
thou witnessyng of yuel; but if Y seide
wel, whi smytist thou me?
24 And Annas
sente hym boundun to Caifas, the bischop.
25 And Symount Petre stood, and
warmyde him; and thei seiden to hym,
Whether also thou art his disciple? He
denyede, and seide, Y am not.
26 Oon of
the bischops seruantis, cosyn of hym,
whos eere Petre kitte of, seide, Sa&yogh; Y
thee not in the &yogh;erd with hym?
27 And
Petre eftsoone denyede, and anoon the
cok crew.
28 Thanne thei ledden Jhesu
to Cayfas, in to the moot halle; and it
was eerli, and thei entriden not in to the
moot halle, that thei schulden not be
defoulid, but that thei schulden ete pask.
29 Therfor Pilat wente out with outforth
to hem, and seide, What accusyng brynge
&yogh;e a&yogh;ens this man?
30 Thei answeriden,
and seiden to hym, If this were not a
mysdoere, we hadden not bitakun hym
to thee.
31 Thanne Pilat seith to hem,
Take &yogh;e hym, and deme &yogh;e him, after
&yogh;oure lawe. And the Jewis seiden to
hym, It is not leueful to vs to sle ony
man;
32 that the word of Jhesu schulde be
fulfillid, whiche he seide, signifiynge bi
what deth he schulde die.
33 Therfor eftsoone
Pilat entride in to the moot halle,
and clepide Jhesu, and seide to hym,
Art thou kyng of Jewis?
34 Jhesus answerde,
and seide to hym, Seist thou
this thing of thi silf, ether othere han
seid to thee of me?
35 Pilat answeride,
Whether Y am a Jewe? Thi folc and
bischops bitoken thee to me; what
hast thou don?
36 Jhesus answeride, My
kingdom is not of this world; if my
kingdom were of this world, my mynystris
schulden stryue, that Y schulde not
be takun to the Jewis; but now my
kingdom is not here.
37 And so Pilat
-- --
seide to hym, Thanne `thou art a king.
Jhesus answeride, Thou seist, that Y am
a king. To this thing Y am borun, and
to this Y `am comun in to the world,
to bere witnessing to treuthe. Eche that
is of treuthe, herith my vois.
38 Pilat seith
to hym, What is treuthe? And whanne
he hadde seid this thing, eft he wente
out to the Jewis, and seide to hem, Y
fynde no cause in hym.
39 But it is a custom
to &yogh;ou, that Y delyuere oon to &yogh;ou
in pask; therfor wole &yogh;e that Y delyuere
to &yogh;ou the kyng of Jewis?
40 Alle
crieden eftsoone, and seiden, Not this,
but Baraban. And Barabas was a theef.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
