Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. VII.
1 And whanne he hadde fulfillid alle
hise wordis in to the eeris of the puple,
he entride in to Cafarnaum.
2 But a
seruaunt of a centurien, that was precious
to hym, was sijk, and drawynge
to the deeth.
3 And whanne he hadde
herd of Jhesu, he sente to hym the
eldere men of Jewis, and preiede hym,
that he wolde come, and heele his seruaunt.
4 And whanne thei camen to Jhesu,
thei preieden hym bisili, and seiden
to hym, For he is worthi, that thou
graunte to hym this thing;
5 for he loueth
oure folk, and he bildide to vs a synagoge.
6 And Jhesus wente with hem.
-- --
And whanne he was not fer fro the
hous, the centurien sente to hym
freendis, and seide, Lord, nyle thou be
trauelid, for Y am not worthi, that thou
entre vnder my roof;
7 for which thing
and Y demede not my silf worthi, that
Y come to thee; but seie thou bi word,
and my child schal be helid.
8 For Y am
a man ordeyned vndur power, and haue
kny&yogh;tis vndur me; and Y seie to this,
Go, and he goith, and to anothir, Come,
and he cometh, and to my seruaunt, Do
this thing, and he doith.
9 And whanne
this thing was herd, Jhesus wondride;
and seide to the puple suynge hym,
Treuli Y seie to &yogh;ou, nether in Israel Y
foond so greet feith.
10 And thei that
weren sent, turneden a&yogh;en home, and
founden the seruaunt hool, which was
sijk.
11 And it was don aftirward, Jhesus
wente in to a citee, that is clepid Naym,
and hise disciplis; and ful greet puple
wente with hym.
12 And whanne he cam
ny&yogh; to the &yogh;ate of the citee, lo! the sone
of a womman that hadde no mo children,
was borun out deed; and this was a
widowe; and myche puple of the citee
with hir.
13 And whanne the Lord Jhesu
hadde seyn hir, he hadde reuthe on hir,
and seide to hir, Nyle thou wepe.
14 And
he cam ny&yogh;, and touchide the beere;
and thei that baren stoden. And he
seide, &YOGH;onge man, Y seie to thee, rise vp.
15 And he that was deed sat vp a&yogh;en, and
bigan to speke; and he &yogh;af hym to his
modir.
16 And drede took alle men, and
thei magnyfieden God, and seiden, For
a grete profete is rysun among vs, and,
For God hath visitid his puple.
17 And
this word wente out of hym in to al
-- --
Judee, and in to al the cuntre aboute.
18 And Joones disciplis toolden hym of alle
these thingis.
19 And Joon clepide tweyn
of hise disciplis, and sente hem to Jhesu,
and seide, Art thou he that is to come,
or abiden we anothir?
20 And whanne the
men cam to hym, thei seiden, Joon Baptist
sente vs to thee, and seide, Art thou
he that is to come, or we abiden anothir?
21 And in that our he heelide many men of
her sijknessis, and woundis, and yuel
spiritis; and he &yogh;af si&yogh;t to many blynde
men.
22 And Jhesus answerde, and seide
to hem, Go &yogh;e a&yogh;en, and telle &yogh;e to Joon
tho thingis that &yogh;e han herd and seyn;
blynde men seyn, crokid men goen, mesels
ben maad cleene, deef men heren,
deed men risen a&yogh;en, pore men ben
takun to prechyng of the gospel.
23 And
he that schal not be sclaundrid in me,
is blessid.
24 And whanne the messangeris
of Joon weren go forth, he bigan to seie
of Joon to the puple,
25 What wenten &yogh;e
out in to desert to se? a reed waggid
with the wynd?
26 But what wenten &yogh;e
out to se? a man clothid with softe
clothis? Lo! thei that ben in precious
cloth and in delicis, ben in kyngis housis.
But what wenten &yogh;e out to se? a profete?
&YOGH;he, Y seie to &yogh;ou, and more than a
profete.
27 This is he, of whom it is writun,
Lo! Y sende myn aungel bifor thi face,
which schal make `thi weie redi bifor
thee.
28 Certis Y seie to &yogh;ou, there is no
man more prophete among children of
wymmen, than is Joon; but he that is
lesse in the kyngdom of heuenes, is more
than he.
29 And al the puple herynge, and
pupplicans, that hadden be baptisid with
baptym of Joon, iustifieden God;
30 but
-- --
the Farisees and the wise men of the
lawe, that weren not baptisid of hym,
dispisiden the counsel of God a&yogh;ens hem
silf.
31 And the Lord seide, Therfor to
whom schal Y seie `men of this generacioun
lijk, and to whom ben thei lijk?
32 Thei ben lijk to children sittynge in
chepyng, and spekynge togider, and
seiynge, We han sungun to &yogh;ou with
pipis, and &yogh;e han not daunsid; we han
maad mornyng, and &yogh;e han not wept.
33 For Joon Baptist cam, nethir etynge
breed, ne drynkynge wyne, and &yogh;e seyen,
He hath a feend.
34 Mannus sone cam
etynge and drynkynge, and &yogh;e seien, Lo!
a man a deuourer, and drynkynge wyne,
a frend of pupplicans and of synful men.
35 And wisdom is iustified of her sones.
36 But oon of the Farisees preiede Jhesu,
that he schulde ete with hym. And he
entride in to the hous of the Farise, and
sat at the mete.
37 And lo! a synful womman,
that was in the citee, as sche knewe,
that Jhesu sat at the mete in the hous
of the Farisee, sche brou&yogh;te an alabaustre
box of oynement;
38 and sche stood bihynde
bysidis hise feet, and bigan to moiste
hise feet with teeris, and wipide with
the heeris of hir heed, and kiste hise feet,
and anoyntide with oynement.
39 And the
Farise seynge, that hadde clepide hym,
seide within hym silf, seiynge, If this
were a prophete, he schulde wite, who
and what maner womman it were that
touchith hym, for sche is a synful womman.
40 And Jhesus answeride, and seide
to hym, Symount, Y haue sumthing to
seie to thee. And he seide, Maistir, seie
thou.
41 And he answeride, Twei dettouris
weren to o lener; and oon au&yogh;t fyue
hundrid pans, and `the other fifti; but
-- --
whanne thei hadden not wherof `thei
schulden &yogh;eelde, he for&yogh;af to bothe. Who
thanne loueth hym more?
43 Symount answeride,
and seide, Y gesse, that he to
whom he for&yogh;af more. And he answeride
to hym, Thou hast demyd ri&yogh;tli.
44 And
he turnede to the womman, and seide to
Symount, Seest thou this womman? I
entride into thin hous, thou &yogh;af no
watir to my feet; but this hath moistid
my feet with teeris, and wipide with hir
heeris.
45 Thou hast not &yogh;ouun to me a
cosse; but this, sithen sche entride, ceesside
not to kisse my feet.
46 Thou anoyntidist
not myn heed with oile; but this
anoyntide my feet with oynement.
47 For
the which thing Y seie to thee, many
synnes ben for&yogh;ouun to hir, for sche hath
loued myche; and to whom is lesse for&yogh;ouun,
he loueth lesse.
48 And Jhesus seide
to hir, Thi synnes ben for&yogh;ouun to thee.
49 And thei that saten to gider at the mete,
bigunnen to seie with ynne hem silf,
Who is this that for&yogh;yueth synnes.
50 But
he seide to the womman, Thi feith hath
maad thee saaf; go thou in pees.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
