Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
The prologe of Marke.
Mark, the euangelist, of God chosun, and Petris sone in baptyme, and in Goddis
word disciple, presthod in Israel ledynge, aftir fleisch a dekene, he, turnyd to the
feith of Crist, wroot the gospel in Ytayle; schewinge theron bothe what he owide
to his kynrede and to Crist. For whi the bigynnyng of his principle he ordeynynge
in the vois of a prophetis exclamacioun, schewith the ordre of dekenis
eleccioun, that he, prechinge `the for-ordenede John, Zakaries sone, sent out in vois
of an aungel tellynge, not oonly Goddis sone maad man, but the body of the Lord,
`that is, the churche, in to alle thingis by the word of Goddis vois quykid, schulde
schewe in the bigynnynge of his prechinge of the gospel; that the which this redinge
schulde knowe, to whom the bigynnyng of fleisch in the Lord, and Jhesu comynge
to the habitacle, the fleisch schulde knowe, and in hym silf the word, `that is, Crist,
of the vois `John Baptist, that in consonantis, `that is, in forme fadris, he hadde
lost, schulde fynde. Forsoth bothe he, the work of the fulfillid gospel entringe,
`and fro the baptym of the Lord bigynnynge to preche God, ne trauelide not to
seie the natiuyte of fleisch, the which he hadde seene in othere bifore, but he
expressinge the exposicioun of al the desert, hath schewid out the fastinge of noumbre,
`other the noumbre of fastinge, the temptacioun of the fend, the congregacioun of
beestis, and the seruyse of aungels, that he ordeynynge vs to vndirstonde, alle thingis
in schort peyntynge to gidere, nother the autorite of thing do `schulde do awey, and
`in parformynge schulde not denye fulnesse to the werk. Forsothe he is seid to
haue kit awey his thoumbe, that he my&yogh;te be hadd as vnworthi to presthod. But so
moche my&yogh;te eleccioun bifore ordeyned, acordynge to the feith, that nothir so in the
werk of the word he schulde leese, that rathire he hadde deseruyd `in kynde. For
of Alexandre he was bischop; of whom bi alle thingis werk, `othir intencioun, was
to kunne, bothe to dispose the seiyngis of the gospel in `him silf, and the disciplyne
of the lawe `to knowe in him silf, and `the nature of God to knowe in the fleisch,
other in `the manhood of the Lord. The whiche thingis in vs silf first it
behoueth to be requyrid; aftirward we wollith thingis sou&yogh;t to be knowe, hauynge
the mede of exortacioun; for he that plontith, and he that moistith, beth the same;
but he that &yogh;yueth the encrees, is God.
Here endith the prolog, and bigynneth the gospel.
-- --
Here byginneth the prologe of Marke.
Mark, the gospeller, was the chosun seruaunt of God, and the goostli sone of Petre
in baptym, and the disciple in Goddis word; he mynystride preesthod in Israel, that
is, among Jewis, and was of the lynage of Leuy bi fleisch, and he was conuertid to
the feith of Crist, and wroot the gospel in Ytalie, that is, the cuntrei of Rome, and
schewide in the gospel, what he ou&yogh;te to his kyn and to Crist. Mark bigynneth at
the sendyng of Joon Baptist, and tellith not the natiuite of Crist bi fleissche, but fro
Cristis baptym, whanne he was ful man, he tellith of his fastyng bi fourti daies, and
of his temptyng in desert, hou the deuel temptide hym, and how weilde beestis weren
gaderid there, and hou hooli aungels camen, and serueden Crist aftir his temptacioun,
and ouercomyng therof. Aftir `he hadde resseyued Cristen feith, he kittide of his
thombe, that he schulde be hadde repreuable to preesthod, that is, be vnhable to be
preest in the gospel, but the chesyng `that was bifor ordeyned consentynge to the
feith, my&yogh;te do so myche, that he loste not in the werk of word, that is, in prechyng
of Goddis word, that that he disseruede bifor in kyn, that is, as he was a prest bi
kyn in the elde lawe among Jewis, so he was a prest in the gospel among Cristen
men. For he was bischop of Alisaundre; and bi alle thingis it was his werk to kunne
profesies, and to dispose in `hym silf the seiyngis of the gospel, and to knowe in
hym silf the techyng of lawe, and to vndurstonde the dyuyn kynde of the Lord in
fleisch; whiche thingis it bihoueth to be sou&yogh;t first in vs.
This seith Jerom in his prolog on the gospel of Mark.
Here bigynneth the gospel of Mark.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
