Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. IX.
1 And Jhesus wente vp in to a boot,
and passide ouer the watir, and cam in
-- --
to his citee.
2 And lo! thei brou&yogh;ten to
hym a man sike in palesie, liggynge in
a bed. And Jhesus saw the feith of hem,
and seide to the man sike in palesye,
Sone, haue thou trist; thi synnes ben
for&yogh;ouun to thee.
3 And lo! summe of
the scribis seiden withynne hem silf,
This blasfemeth.
4 And whanne Jhesus
hadde seyn her thou&yogh;tis, he seide, Wherto
thenken &yogh;e yuele thingis in &yogh;oure
hertis?
5 What is li&yogh;tere to seye, Thi
synnes ben for&yogh;ouun to thee, ethir `to seie,
Rise thou, and walke?
6 But that &yogh;e wite
that mannus sone hath power to for&yogh;yue
synnes in erthe, thanne he seide to the
sijk man in palesie, Rise vp; take thi
bed, and go in to thin hous.
7 And he
roos, and wente in to his hous.
8 And
the puple seynge dredde, and glorifiede
God, that &yogh;af suche power to men.
9 And
whanne Jhesus passide fro thennus, he
say a man, Matheu bi name, sittynge in
a tolbothe. And he seide to hym, Sue
thou me.
10 And he roos, and folewide
hym. And it was don, the while he
sat `at the mete in the hous, lo! many
pupplicans and synful men camen, and
saten `at the mete with Jhesu and hise
disciplis.
11 And Farisees sien, and seiden
to hise disciplis, Whi etith &yogh;oure maister
with pupplicans and synful men?
12 And
Jhesus herde, and seide, A leche is not
nedeful to men that faren wel, but to
men that ben yuel at ese.
13 But go &yogh;e,
and lerne what it is, Y wole merci, and
not sacrifice; for I cam, not to clepe
ri&yogh;tful men, but synful men.
14 Thanne
the disciplis of Joon camen to hym, and
seiden, Whi we and Farisees fasten
ofte, but thi disciplis fasten not?
15 And
Jhesus seide to hem, Whether the sones
of the spouse moun morne, as long as
the spouse is with hem? But daies
-- --
schulen come, whanne the spouse schal
be takun a wei fro hem, and thanne thei
schulen faste.
16 And no man putteth a
clout of buystous clothe in to an elde
clothing; for it doith awey the fulnesse
of the cloth, and a wers breking is maad.
17 Nethir men putten newe wyne in to elde
botelis, ellis the botels ben to-broke,
and distried, and the wyn sched out.
But men putten newe wyne in to newe
botels, and bothe ben kept.
18 Whiles that
Jhesus spak thes thingis to hem, lo! a
prince cam, and worschipide hym, and
seide, Lord, my dou&yogh;ter is now deed;
but come thou, and putte thin hond on
hir, and she schal lyue.
19 And Jhesus
roos, and `hise disciplis, and sueden hym.
20 And lo! a womman, that hadde the
blodi flux twelue &yogh;ere, nei&yogh;ede bihynde,
and touchide the hem of his cloth.
21 For
sche seide with ynne hir self, &YOGH;if Y touche
oonli the cloth of hym, Y schal be saaf.
22 And Jhesus turnede, and say hir, and
seide, Dou&yogh;tir, haue thou trist; thi feith
hath maad thee saaf. And the womman
was hool fro that our.
23 And whanne
Jhesus cam in to the hous of the prince,
and say mynstrallis, and the puple makynge
noise,
24 he seide, Go &yogh;e a wei, for the
damysel is not deed, but slepith. And
thei scornyden hym.
25 And whanne the
folc was put out, he wente in, and helde
hir hond; and the damysel roos.
26 And
this fame wente out in to al that loond.
27 And whanne Jhesus passide fro thennus,
twei blynde men criynge sueden hym,
and seiden, Thou sone of Dauid, haue
merci on vs.
28 And whanne he cam in
to the hous, the blynde men camen to
hym; and Jhesus seide to hem, What
wolen &yogh;e, that I do to &yogh;ou? And thei
seiden, Lord, that oure i&yogh;en be opened.
-- --
And Jhesus seide, Bileuen &yogh;e, that Y mai
do this thing to &yogh;ou? Thei seien to
him, &YOGH;he, Lord.
29 Thanne he touchide
her i&yogh;en, and seide, Aftir &yogh;oure feith be
it doon to &yogh;ou.
30 And the i&yogh;en of hem
were opened. And Jhesus thretenede
hem, and seide, Se &yogh;e, that no man wite.
31 But thei &yogh;eden out, and diffameden hym
thorou al that lond.
32 And whanne thei
weren gon out, loo! thei brou&yogh;ten to
hym a doumbe man, hauynge a deuel.
33 And whanne the deuel was cast out, the
doumb man spak. And the puple wondride,
and seide, It hath not be say
thus in Israel.
34 But the Farisees seiden,
In the prince of deuelis he castith out
deuelis.
35 And Jhesus wente `aboute alle
the `citees and castels, techinge in the
synagogis of hem, and prechynge the
gospel of the kyngdom, and helynge
euery langour and euery sijknesse.
36 And
he si&yogh; the puple, and hadde reuthe on
hem; for thei weren trauelid, and liggynge
as scheep not hauynge a scheepherde.
37 Thanne he seide to hise disciplis,
Sotheli there is myche ripe corn,
but fewe werk men.
38 Therfor preye &yogh;e
the lord of the ripe corn, that he sende
werke men in to his ripe corn.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
