Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. XII.
1 In that tyme Jhesus wente bi cornes
in the sabot day; and hise disciplis hungriden,
and bigunnen to plucke the eris
of corn, and to ete.
2 And Fariseis, seynge,
seiden to hym, Lo! thi disciplis
don that thing that is not leueful to hem
to do in sabatis.
3 And he seide to hem,
Whether &yogh;e han not red, what Dauid
dide, whanne he hungride, and thei that
weren with hym?
4 hou he entride in to the
hous of God, and eet looues of proposicioun,
whiche looues it was not leueful
to hym to ete, nether to hem that weren
with hym, but to prestis aloone?
5 Or
whether &yogh;e han not red in the lawe, that
in sabotis prestis in the temple defoulen
the sabotis, and thei ben with oute blame?
6 And Y seie to &yogh;ou, that here is a gretter
than the temple.
7 And if &yogh;e wisten, what
it is, Y wole merci, and not sacrifice, &yogh;e
schulden neuer haue condempned innocentis.
8 For mannus72Q0011 Sone is lord, &yogh;he, of
the sabat.
9 And whanne he passide fro
thennus, he cam in to the synagoge of
hem.
10 And lo! a man that hadde a drye
hoond. And thei axiden hym, and seiden,
Whether it be leueful to hele in the
sabot? that thei schulden acuse hym.
11 And he seide to hem, What man of &yogh;ou
schal be, that hath o scheep, and if it
falle in to a diche in the sabotis, whether
he shal not holde, and lifte it vp?
12 How myche more is a man better than a
scheep? Therfor it is leueful to do good
in the sabatis.
13 Thanne he seide to the
man, Stretche forth thin hoond. And he
strau&yogh;te forth; and it was restorid to
heelthe as the tothir.
14 And the Farisees
-- --
wenten out, and maden a counsel a&yogh;ens
hym, hou thei schulden distrie hym.
15 And Jhesus knewe it, and wente awei
fro thennus; and many sueden hym, and
he helide hem alle.
16 And he comaundide
to hem, that thei schulden not make hym
knowun;
17 that that thing were fulfillid,
that was seid by Isaie, the prophete, seiynge,
Lo!
18 my child, whom Y haue
chosun, my derling, in whom it hath wel
plesid to my soule; Y shal put my spirit
on him, and he shal telle dom to hethen
men.
19 He shal not stryue, ne crye, nethir
ony man shal here his voice in stretis.
20 A
brisid rehed he shal not breke, and he
schal not quenche smokynge flax, til he
caste out doom to victorie;
21 and hethene
men schulen hope in his name.
22 Thanne
a man blynde and doumbe, that hadde a
feend, was brou&yogh;t to hym; and he helide
hym, so that he spak, and say.
23 And al
the puple wondride, and seide, Whether
this be the sone of Dauid?
24 But the Farisees
herden, and seiden, He this casteth
not out feendis, but in Belsabub, prince
of feendis.
25 And Jhesus, witynge her
thou&yogh;tis, seide to hem, Eche kingdom
departid a&yogh;ens it silf, schal be desolatid,
and eche cite, or hous, departid a&yogh;ens it
self, schal not stonde.
26 And if Satanas
castith out Satanas, he is departid a&yogh;ens
him silf; therfor hou schal his kingdom
stonde?
27 And if Y in Belsabub caste out
deuelis, in `whom &yogh;oure sones casten
out? Therfor thei schulen be &yogh;oure
domes men.
28 But if Y in the Spirit of God
caste out feendis, thanne the kyngdom of
God is comen in to &yogh;ou.
29 Ethir hou may
ony man entre in to the hous of a stronge
man, and take awey hise vesselis, but `he
first bynde the stronge man, and thanne
-- --
he schal spuyle his hous?
30 He that is not
with me, is a&yogh;ens me; and he that gaderith
not togidere with me, scaterith
abrood.
31 Therfor I seie to &yogh;ou, al synne
and blasfemye shal be for&yogh;ouun to men,
but `the spirit of blasfemye shal not be
for&yogh;ouun.
32 And who euere seith a word
a&yogh;ens mannus sone, it shal be for&yogh;ouun
to him; but who that seieth a word a&yogh;ens
the Hooli Goost, it shal not be for&yogh;ouun
to hym, nether in this world, ne in `the
tothir.
33 Ethir make &yogh;e the tree good, and
his fruyt good; ether make &yogh;e the tree
yuel and his fruyt yuel; for a tree is
knowun of the fruyt.
34 &YOGH;e generacioun
of eddris, hou moun &yogh;e speke goode
thingis, whanne &yogh;e ben yuele? For the
mouth spekith of plente of the herte.
35 A
good man bryngith forth good thingis
of good tresoure, and an yuel man bringith
forth yuel thingis of yuel tresoure.
36 And Y seie to &yogh;ou, that of euery idel
word, that men speken, thei schulen &yogh;elde
resoun therof in the dai of doom;
37 for of
thi wordis thou schalt be iustified, and
of thi wordis thou shalt be dampned.
38 Thanne summe of the scribis and Farisees
answeriden to hym, and seiden,
Mayster, we wolen se a tokne of thee.
39 Which answeride, and seide to hem, An
yuel kynrede and a spouse brekere sekith
a tokene, and a tokene shal not be &yogh;ouun
to it, but the tokene of Jonas, the prophete.
40 For as Jonas was in the wombe
of a whal thre daies and thre ny&yogh;tis, so
mannus sone shal be in the herte of the
erthe thre daies and thre ny&yogh;tis.
41 Men
of Nynyue schulen rise in doom with this
generacioun, and schulen condempne it;
for thei diden penaunce in the prechyng
of Jonas, and lo! here a gretter than
-- --
Jonas.
42 The queene of the south shal rise
in doom with this generacioun, and schal
condempne it; for she cam fro the eendis
of the erthe to here the wisdom of Salomon,
and lo! here a gretter than Salomon.
43 Whanne an vnclene spirit goith
out fro a man, he goith bi drie places,
`and sekith rest, and fyndith not.
44 Thanne
he seith, Y shal turne a&yogh;en in to myn
hous, fro whannys Y wente out. And he
cometh, and fyndith it voide, and clensid
with besyms, and maad faire.
45 Thanne
he goith, and takith with him seuene
othere spiritis worse than hym silf; and
thei entren, and dwellen there. And the
laste thingis of that man ben maad worse
than the formere. So it shal be to this
worste generacioun.
46 &YOGH;it whil he spak to
the puple, lo! his modir and his bretheren
stoden withouteforth, sekynge to
speke to hym.
47 And a man seide to
hym, Lo! thi modir and thi britheren
stonden withouteforth, sekynge thee.
48 He answeride to the man, that spak to
hym, and seide, Who is my modir? and
who ben my britheren?
49 And he helde
forth his hoond in to hise disciplis, and
seide, Lo! my modir and my bretheren;
50 for who euer doith the wille of my fadir
that is in heuenes, he is my brothir, and
sistir, and modir.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
