Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. XXVII.
1 And the Lord spak to Moises and seide,
Speke thou to the sones of Israel,
2 and thou
schalt seye to hem, A man that makith
avow, and bihetith his soule to God, schal
&yogh;yue the priys vndur valu, ether preisyng.
3 If it is a male, fro the twentithe
&yogh;eer `til to the sixtithe &yogh;eer, he schal &yogh;yue
fifti siclis of siluer, at the mesure of seyntuarie,
if it is a womman,
4 sche schal &yogh;yue
thretti siclis;
5 forsothe fro the fifthe &yogh;eer
`til to the twentithe &yogh;eer, a male schal
&yogh;yue twenti cyclis, a womman schal &yogh;yue
ten ciclis;
6 fro o monethe `til to the fifthe
&yogh;eer, fyue ciclis schulen be &yogh;ouun for a
male, thre ciclis for a womman;
7 a male
of sixti &yogh;eer and ouer schal &yogh;yue fiftene
ciclis, a womman schal &yogh;yue ten cyclis.
8 If
it is a pore man, and may not &yogh;elde the
valu, he schal stonde bifor the preest, and
as myche as the preest preisith, and seeth
that the pore man may &yogh;elde, so myche he
schal &yogh;yue.
9 Forsothe if ony man avowith
a beeste, that may be offrid to the Lord,
it schal be hooli,
10 and schal not mow be
chaungid, that is, nethir a betere for `an
yuel, nether `a worse for a good; and if
-- --
he chaungith it, bothe that, that is chaungid,
and that, for which it is chaungid,
schal be halewid to the Lord.
11 Sotheli if
ony man avowith an vncleene beeste, that
may not be offrid to the Lord, it schal be
brou&yogh;t bifor the preest,
12 and the preest
schal deme whether it is good ether yuel,
and schal sette the prijs;
13 which prijs if he
that offrith wole &yogh;yue, he schal adde
the fifthe part ouer the valu.
14 If a man
avowith his hows, and halewith it to the
Lord, the preest schal biholde, `whether it
is good ether yuel, and bi the prijs, which
is ordeyned of hym, it schal be seld;
15 sotheli
if he that avowide wole a&yogh;en-bie it,
he schal &yogh;yue the fifthe part of the valu
aboue, and he schal haue the hows.
16 That
if he avowith the feeld of his possessioun,
and halewith to the Lord, the prijs schal
be demed bi the mesure of seed; if the
feeld is sowun with thritti buyschels of
barli, it schal be seeld for fifti siclys of
siluer.
17 If he auowith the feeld anoon for
the &yogh;eer of the iubilee bigynnynge, as
myche as it may be worth, bi so myche it
schal be preisid;
18 but if it be after `sum
part of tyme, the preest schal rykene the
money bi the noumbre of &yogh;eeris that ben
residue `til to the iubilee, and it schal be
withdrawun of the prijs.
19 That if he that
avowide wole a&yogh;enbie the feeld, he schal adde
the fyuethe part of the money preisid,
and he schal welde it;
20 but if he nyle
a&yogh;enbie, but it is seeld to ony othir man,
he that avowide schal `no more mowe
a&yogh;enbie it;
21 for whanne the dai of iubilee
cometh, it schal be halewid to the Lord,
and the possessioun halewid perteyneth to
the ri&yogh;t of preestis.
22 If the feeld is bou&yogh;t,
and is not of the possessioun of grettere
men,
23 and is halewid to the Lord, the
-- --
preest schal determyne the prijs bi the
noumbre of &yogh;eeris `til to the iubilee, and
he that avowide the feeld schal &yogh;yue the
prijs to the Lord;
24 forsothe in the iubilee
it schal turne a&yogh;en to the formere lord that
seelde it, and `haue he in to the eritage of
his possessioun.
25 `Ech preisyng schal be
peisid bi the sicle of seyntuarie; a sicle
hath twenti halpens.
26 No man may halewe
and avowe the firste gendrid thingis
that perteynen to the Lord, whether it is
oxe, whether scheep, tho ben the Lordis
part.
27 That if the beeste is vncleene, he
that offride schal a&yogh;enbie by his valu,
and he schal adde the fyuethe part of
prijs; if he nyle a&yogh;enbie, it schal be
seeld to another man, as myche euer as
it is `set at valu.
28 Al thing which is halewid
to the Lord, whether it is man, whether
beeste, whether feeld note, it schal not
be seeld, nether it schal mow be a&yogh;enbou&yogh;t;
whateuer thing is halewid onys, it schal
be hooli of the noumbre of hooli thingis
to the Lord,
29 and ech halewyng which is
offrid of man, schal not be a&yogh;enbou&yogh;t, but
it schal die bi deeth.
30 Alle the tithis of
erthe, whether of fruytis, whether of applis
of trees, ben the Lordis part, and ben
halewid to hym;
31 sotheli if ony man wole
a&yogh;enbie hise tithis, he schal adde the
fyuethe part of tho; of alle tithis,
32 of
scheep, and of oxen, and of geet, that
passen vndur the `&yogh;erde of scheepherde,
whateuer thing cometh to the tenthe part,
it schal be halewid to the Lord;
33 it schal
not be chosun, nether good, nether yuel;
nethir it schal be chaungid for another; if
ony man chaungith, bothe that, that is
chaungid, and that, for which it is chaungid,
schal be halewid to the Lord, and it schal
-- --
not be a&yogh;enbou&yogh;t.
34 These ben the comaundementis
whiche the Lord comaundide
to Moises, and to the sones of Israel,
in the hil of Synay.
Here eendith the book of Leuitici, and
here bygynneth the book of Numerj.
-- --
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
