1   And the Lord spak to Moises in the hil of Synai, 2   and seide, Speke thou to the sones of Israel, and thou schalt seye to hem, Whanne &yogh;e han entrid in to the lond which Y schal &yogh;yue to &yogh;ou, `the erthe kepe the sabat of the Lord; 3   sixe &yogh;eeris thou schalt sowe thi feeld, and sixe &yogh;eeris thou schalt kitte thi vyner, and thou schalt gadere the fruytis ther of; 4   forsothe in the seuenthe &yogh;eer schal be sabat of the erthe of the restyng of the Lord; 5   thou schalt not sowe the feeld, and thou schalt not kitte the vyner, thou schalt not repe tho thingis whiche the erthe bryngith forth `bi fre wille, and thou schalt not gadere the grapis of thi firste fruytis, as vyndage; for it is the &yogh;eer of restyng of the lond;

but tho schulen be to &yogh;ou in to mete, 6   to thee, and to thi seruaunt, to thin handmaide, and to thin hirid man, and to the comelyng which is a pilgrym at thee; alle thingis that `comen forth, 7   schulen &yogh;yue mete to thi werk beestis and smale beestis. 8   Also thou schalt noumbre to thee seuene woukis of &yogh;eeris, that is, seuene sithes seuene, whiche togidere maken nyn and fourti &yogh;eer; 9   and thou schalt sowne with a clarioun in the seuenthe monethe, in the tenthe dai of the monethe, in the tyme of propiciacioun, `that is, merci, in al &yogh;oure lond. 10   And thou schalt halewe the fiftithe &yogh;eer, and thou schalt clepe remissioun to alle the dwellers of thi lond; for thilke &yogh;eer is iubilee; a man schal turne a&yogh;en to hys possessioun, and ech man schal go a&yogh;en to the firste meynee, 11   for it is iubilee, and the fiftithe &yogh;eer. &YOGH;e schulen not sowe, nether &yogh;e schulen repe thingis, that comen forth freli in the feeld, and &yogh;e schulen not gadere the firste fruytis of vyndage, for the halewyng of iubilee; 12   but anoon &yogh;e schulen ete thingis takun awey; 13   in the &yogh;eer of iubilee alle men go a&yogh;en to her possessiouns. 14   Whanne thou schalt sille ony thing to thi citeseyn, ether schalt bie of hym, make thou not sory thi brother, but bi the noumbre of `&yogh;eeris of iubile thou schalt bie of him, 15   and bi the rekenyng of fruytis he schal sille to thee. 16   Bi as myche as mo &yogh;eeris dwellen after the iubilee, by so myche also the prijs schal encreesse, and bi as myche as thou noumbrist lesse of tyme, bi so myche and the biyng schal cost lesse; for he schal sille to thee the time of fruytis. 17   Nyle &yogh;e turment men of &yogh;oure lynagis, but ech man drede his God; for Y am &yogh;oure Lord God. 18   Do &yogh;e my comaundementis, and kepe &yogh;e my domes, and fille &yogh;e tho, that &yogh;e moun dwelle in his lond without ony drede, 19   and that the erthe brynge forth hise fruytis to &yogh;ou,

whiche &yogh;e schulen ete `til to fulnesse, and drede not the assailyng of ony man. 20   That if &yogh;e seien, what schulen we ete in the seuenthe &yogh;eer, if we sowen not, nether gaderen oure fruytis? 21   Y schal &yogh;yue my blessyng to &yogh;ou in the sixte &yogh;eer, and it schal make fruytis of three &yogh;eer; 22   and &yogh;e schulen sowe in the ei&yogh;te &yogh;eer, and &yogh;e schulen ete elde fruytis `til to the nynthe &yogh;eer; til newe thingis comen forth &yogh;e schulen ete the elde thingis. 23   Also the lond schal not be seeld `in to with outen ende, for it is myn, and &yogh;e ben my comelyngis and tenauntis; 24   wherfor al the cuntre of &yogh;oure possessioun schal be seeld vndur the condicioun of a&yogh;enbiyng. 25   If thi brother is maad pore, and sillith his litil possessioun, and his ny&yogh; kynesman wole, he may a&yogh;enbie that that he seelde; 26   sotheli if he hath no ny&yogh; kynesman, and he may fynde prijs to a&yogh;enbie, 27   the fruytis schulen be rekynyd fro that tyme in which he seelde, and he schal &yogh;elde `that that is residue to the biere, and he schal resseyue so his possessioun. 28   That if his hond fynde not, that he &yogh;elde the prijs, the biere schal haue that that he bou&yogh;te, `til to the &yogh;eer of iubilee; for in that &yogh;eer ech sillyng schal go a&yogh;en to the lord, and to the firste weldere. 29   He that sillith his hows, with ynne the wallis of a citee, schal haue licence to a&yogh;enbie til o &yogh;eer be fillid; 30   if he a&yogh;enbieth not, and the sercle of the &yogh;eer is passid, the biere schal welde it, and his eiris `in to with outen ende, and it schal not mow be a&yogh;enbou&yogh;t, &yogh;e, in the iubilee. 31   Forsothe if the hows is in a town `that hath not wallis, it schal be seeld bi the lawe of feeldis; sotheli if it is not a&yogh;enbou&yogh;t in the iubilee, it schal turne a&yogh;en to `his lord. 32   The howsis of dekenes, that ben in citees, moun euer be a&yogh;enbou&yogh;t; if tho ben not a&yogh;enbou&yogh;t, 33   tho schulen turne a&yogh;en in the iubilee `to the lordis;

for the `howsis of the citees of dekenes ben for possessiouns among the sones of Israel; 34   forsothe the suburbabis of hem schulen not be seeld, for it is euerlastynge possessioun. 35   If thi brother is maad pore, and feble in power, and thou resseyuest hym as a comelyng and pilgrym, and he lyueth with thee, 36   take thou not vsuris of hym, nether more than thou hast &yogh;oue; drede thou thi God, that thi brothir mai lyue anentis thee. 37   Thou schalt not &yogh;yue to hym thi money to vsure, and thou schalt not axe ouer `aboundaunce, ether encrees ouer of fruytis; 38   Y am &yogh;oure Lord God, that ladde &yogh;ou out of the lond of Egipt, that Y schulde &yogh;yue to &yogh;ou the lond of Canaan, and that Y schulde be &yogh;oure God. 39   If thi brother compellid bi pouert sillith hym silf to thee, thou schalt not oppresse hym bi seruage of seruauntis, 40   but he schal be as an hirid man and tenaunt; `til to the &yogh;eer of iubilee he schal worche at thee, 41   and aftirward he schal go out with his fre children, and he schal turne a&yogh;en to the kynrede, and to `the possessioun of his fadris. 42   For thei ben my seruauntis, and Y ledde hem out of the lond of Egipt; thei schulen not be seeld bi the condicioun of seruauntis; 43   turmente thou not hem bi thi power, but drede thou thi Lord. 44   A seruaunt and handmaide be to &yogh;ou of naciouns that ben in &yogh;oure cumpas, 45   and of comelyngis that ben pilgrimys at &yogh;ou, ether thei that ben borun of hem in &yogh;oure lond; &yogh;e schulen haue these seruauntis, 46   and bi ri&yogh;t of eritage &yogh;e schulen `sende ouer to aftir comeris, and &yogh;e schulen welde with outen ende; sothely oppresse &yogh;e not bi power &yogh;oure britheren, the sones of Israel. 47   If the hond of a comelyng and of a pilgrim wexith strong at &yogh;ou, and thi brother is maad pore, and sillith hym silf to hym, 48   ether to ony of his kyn, he may be a&yogh;enbou&yogh;t aftir the sillyng; he

that wole of hise britheren, a&yogh;enbie hym; bothe `the brother of fadir, 49   and the sone of `the fadris brother, and kynesman, and alye. Ellis if also he schal mow, he schal a&yogh;enbie hym silf, 50   while the &yogh;eeris ben rykenid oneli fro the tyme of his sillyng `til in to the &yogh;eer of iubylee; and while the money, for which he was seeld, is rikenyd bi the noumbre of &yogh;eeris, and while the hire of an hirid man is rikenyd. 51   If mo &yogh;eeris ben that dwellen `til to the iubilee, bi these &yogh;eeris he schal &yogh;elde also the prijs; if fewe &yogh;eeris ben, 52   he schal sette rikenyng with hym bi the noumbre of &yogh;eeris; 53   and he schal &yogh;eelde to the biere that that is residue of &yogh;eeris, while tho &yogh;eeris, bi whiche he seruyde bifore, ben rikenyd for hiris; he schal not turmente `that Ebreu violentli in thi si&yogh;t. 54   That if he may not be a&yogh;enbou&yogh;t bi this, he schal go out with his free children in the `&yogh;eer of iubilee; for the sones of Israel ben myn seruauntis, 55    whiche Y ledde out of the lond of Egipt.

Previous section

Next section