Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. XI.
1 And the Lord spak to Moises and Aaron,
and seide,
2 Seie &yogh;e to the sones of Israel,
Kepe &yogh;e alle thingis whiche Y wroot
to &yogh;ou, that Y be &yogh;oure God. These ben
the beestis, whiche &yogh;e schulen ete, of alle
lyuynge beestis of erthe;
3 &yogh;e schulen ete
`al thing among beestis that hath a clee
departid, and chewith code;
4 sotheli what
euer thing chewith code, and hath a clee,
but departith not it, as a camel and
othere beestis doon, &yogh;e schulen not ete it,
and &yogh;e schulen arette among vnclene
thingis.
5 A cirogrille note, which chewith
code, and departith not the clee, is vnclene;
and an hare,
6 for also he chewith
code, but departith not the clee;
7 and
a swiyn, that chewith not code, thou&yogh; he
departith the clee.
8 &YOGH;e schulen not ete the
fleischis of these, nether &yogh;e schulen touche
the deed bodies, for tho ben vnclene to
&yogh;ou.
9 Also these thingis ben that ben
gendrid in watris, and is leueful to ete;
10 &yogh;e schulen ete al thing that hath fynnes
and scalis, as wel in the see, as in floodis
and stondynge watris; sotheli what euer
thing of tho that ben moued and lyuen
in watris, hath not fynnes and scalis, schal
be abhominable, and wlatsum to &yogh;ou;
11 &yogh;e
schulen not ete the fleischis of tho, and
&yogh;e schulen eschewe the bodies deed bi
hem silf.
12 Alle thingis in watris that han
not fynnes and scalis, schulen be pollutid,
13 These thingis ben of foulis whiche &yogh;e
schulen not ete, and schulen be eschewid
of &yogh;ou; an egle, and a grippe, aliete note,
and a kyte, and a vultur by his kynde;
14
-- --
and al of `rauyns kynde bi his licnesse;
15
a strucioun,
16 and ny&yogh;t crowe, a lare, and
an hauke bi his kinde;
17 an owle, and dippere,
and ibis note;
18 a swan and cormoraunt,
and a pellican;
19 a fawcun, a iay bi his
kynde; a leepwynke, and a reremows.
20 Al thing of foulis that goith on foure
feet, schal be abhomynable to &yogh;ou;
21 sotheli
what euer thing goith on foure feet, but
hath lengere hipis bihynde, bi whiche it
skippith on the erthe, &yogh;e schulen ete;
22 as
is a bruke note in his kynde, and acatus note, and
opymacus note, and a locuste, alle bi her
kynde.
23 Forsothe what euer thing of briddis
hath foure feet oneli, it schal be abhomynable
to &yogh;ou;
24 and who euer touchith her
bodies deed bi hem silf, schal be defoulid,
and `schal be vnclene `til to euentid;
25 and
if it is nede, that he bere ony deed thing
of these, he schal waische his clothis, and
he schal be vnclene til to the goyng doun
of the sunne.
26 Sotheli ech beeste that hath
a clee, but departith not it, nether chewith
code, schal be vnclene; and what euer
thing touchith it, schal be defoulid.
27 That
that goith on hondis, of alle beestis that
gon on foure feet, schal be vnclene; he,
that touchith her bodies deed bi hem silf,
schal be defoulid `til to euentid;
28 and he,
that berith siche deed bodies, schal waische
hise clothis, and he schal be vnclene `til
to euentid; for alle these thingis ben vnclene
to &yogh;ou.
29 Also these thingis schulen
be arettid among defoulid thingis, of
these that ben moued on erthe; a wesele,
and mows, and a cocodrille note, `alle
bi her kynde;
30 mygal note, camelion note, and
stellio note, and lacerta note, and a maldewerp.
31 Alle these ben vnclene; he that touchith
her bodies deed bi hem silf, schal be vnclene
`til to euentid;
32 and that thing schal
-- --
be defoulid, on which ony thing of her
bodies deed bi hem silf fallith, as wel a
vessel of tree, and a cloth, as skynnes
`and heiris; and in what euer thing werk
is maad, it schal be dippid in watir, and
tho thingis schulen be defoulid `til to
euentid, and so aftirward tho schulen be
clensid.
33 Sotheli a vessel of erthe, in
which ony thing of these fallith with
ynne, schal be defoulid, and therfor it
schal be brokun.
34 Ech mete, which &yogh;e
schulen ete, schal be vnclene, if water note is
sched thereon; and ech fletynge thing,
which is drunkun of ech vessel, `where
ynne vnclene thingis bifelden, schal be
vnclene;
35 and what euer thing of siche deed
bodies bi hem silf felde theronne, it schal
be vnclene, whether furneisis, ethir vessels
of thre feet, tho schulen be destried,
and schulen be vnclene.
36 Sotheli wellis
and cisternes, and al the congregacioun
of watris, schal be clene. He that touchith
her bodi deed bi it silf, schal be defoulid.
37 If it fallith on seed, it schal not
defoule the seed;
38 sotheli if ony man
schedith seed with watir, and aftirward
the watir is touchid with deed bodies bi
hem silf, it schal be defoulid anoon.
39 If
a beeste is deed, which it is leueful to &yogh;ou
to ete, he that touchith the deed bodi
therof schal be vnclene `til to euentid;
and he that etith therof ony thing,
40 ethir
berith, schal waische his clothis, and
schal be vnclene `til to euentid.
41 Al thing
that crepith on erthe, schal be abhomynable,
nether schal be takun in to mete.
42 `What euer thing goith on the brest and
foure feet, and hath many feet, ethir
drawun bi the erthe, &yogh;e schulen not ete,
for it is abhomynable.
43 Nyle &yogh;e defoule
-- --
&yogh;oure soulis, nether touche &yogh;e ony thing of
tho, lest &yogh;e ben vnclene;
44 for Y am &yogh;oure
Lord God; be &yogh;e hooli, for Y am hooli.
Defoule &yogh;e not &yogh;oure soulis in ech crepynge
`beeste which is moued on erthe;
for Y am the Lord,
45 that ladde &yogh;ou out of
the lond of Egipt, that Y schulde be to
&yogh;ou in to God; &yogh;e schulen be hooli, for Y
am hooli.
46 This is the lawe of lyuynge
beestes, and of foulis, and of ech lyuynge
soule which is moued in watir, and
crepith in erthe;
47 that &yogh;e knowe differences
of clene thing and vnclene, and that &yogh;e
wite what &yogh;e schulen ete, and what &yogh;e
owen forsake.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
