Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. XIII.
1 In the hundrid and nyne and fourtithe
&yogh;eer Judas knew, that Antiok Eupator
cam with multitude a&yogh;ens Judee;
2 and with
hym cam Lisias, procuratour and souereyn
of offices, hauynge with hym an hundrid
and ten thousynde of foot men, and of
horse men fyue thousynde, and olifauntis
two and twenti, charis with sithis thre
hundrid.
3 Forsothe and Menelaus ioynede
hym to hem, and with greet desseit
bisou&yogh;te Antiok, not for heelthe of the
cuntre, but hopynge that he schulde be
ordeyned in to prinshod.
4 But the kyng
of kyngis reiside the willis of Antiok a&yogh;ens
the synnere; and whanne Lisyas schewide
that he was cause of alle yuels, he comaundide,
as custom is to hem, hym
takun for to be slayn in the same place.
-- --
5 Sotheli in the same place was a tour of
fifti cubitis, hauynge on ech side a gaderyng
of aische; this was biholdynge in to
a diche.
6 Fro thennus he comaundide the
sacrilegere, `ether cursid man, for to be
caste doun in to aische, whanne alle men
puttiden forth hym to the deth.
7 And bi
siche lawe it bifelle the brekere of lawe
for to die, nether Menelaus for to be &yogh;ouun
to erthe.
8 And forsothe iustly ynow&yogh;; for
whi for he dide many trespassis a&yogh;ens the
auter of God, whos fier and aische was
hooli, he was dampned in the deth of
aische.
9 But the kyng with out bridil in
mynde, cam to schewe hym worse to
Jewis, than his fadir.
10 And whanne these
thingis weren knowun, Judas comaundide
the puple, that bi ny&yogh;t and dai thei schulden
clepe to help the Lord; that as euere
more, also now he schulde helpe hem;
11 whiche sotheli dredden for to be priuyd
of lawe, and cuntree, and hooli temple; and
that he suffride not the puple, that a while
gon hadde a litil quykid a&yogh;en, for to be
suget eftsoone to blasfeme naciouns.
12 Therfor
whanne alle men diden togidere that
thing, and axiden merci of the Lord with
wepyng, in fastyngis bi alle thre daies,
and kneliden, Judas monestide hem for to
make hem redi.
13 Forsothe he with eldre
men thou&yogh;te for to go out, bifore that the
kyng mouede oost to Judee, and gat the
citee, and to bitake the ende of the thing
to the dom of the Lord.
14 Therfor he &yogh;af
power of alle thingis to God, makere of
nou&yogh;t of the world, and monestide hise
for to fi&yogh;te strongli, and stonde til to the
deth, for lawis, temple, citee, cuntre, and
citeseyns; and he ordeynede the oost
aboute Modyn.
15 And whanne a tokene
was &yogh;ouun to hise of victorie of God, he
chees the strengeste &yogh;onge men, and bi
ni&yogh;t he asailide the kyngis halle in tentis,
and he slow fourtene thousynde men, and
the moste of olifauntis, with these that
-- --
weren put aboue.
16 And thei filliden the
tentis of enemyes with hi&yogh;este drede and
disturblyng, and whanne these thingis
weren don `in prosperite, thei wenten
awei.
17 Forsothe this was don in the dai
li&yogh;tynge, for the proteccioun of the Lord
helpide hym.
18 But whanne the kyng
hadde takun taast of hardynesse `of Jewis
bi craft, he asaiede hardynessis of places;
and mouede the tentis to Bethsura,
19 that
was a strong hold of Jewis; but he was
dryuun hurtlide and menusid.
20 Forsothe
to these that weren with ynne, Judas sente
nedeful thingis.
21 Forsothe Rodochus, sum
of the oost of Jewis, telde out priuetees
to enemyes; which was sou&yogh;t, and takun,
and prisoned.
22 Eftsoone the kyng hadde
word to hem that weren in Bethsura, and
&yogh;af the ri&yogh;thond, and resseyuede, and wente
awei. He ioynede batel with Judas, and
Judas was ouercomun.
23 Forsothe as he
knew that Filip hadde rebellid at Antiochie,
which was left on nedis, he was
astonyed in mynde, and bisou&yogh;te Jewis,
and was suget to hem, and swoor of alle
thingis, of whiche it was seyn iust; and he
was recounselid, and offride sacrifice, and
worschipide the temple, and puttide &yogh;iftis.
24 He biclippide, `ether kisside, Machabeus,
and made hym prince and duyk fro Tolomaida
til to Garreyns.
25 Sotheli as he cam
to Tolomaida, men of Tolomaida baren
greuousli acordyng of frendschip, and hadde
indignacioun, leste perauenture thei wolden
breke pees.
26 Thanne Lisias stiede vp
in to the dom place, and expownede resoun,
and ceeside the puple, and turnyde
a&yogh;en to Antiochie; and in this maner the
kingis goynge out and turnynge a&yogh;en
wenten forth.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
