Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. VII.
1 Wo to me, for Y am maad as he that
gaderith in heruest rasyns of grapis;
there is no clustre for to ete; my soule
desiride figis ripe bifore othere.
2 The
hooli perischide fro erthe, and ri&yogh;tful is
not in men; alle aspien, ether setten tresoun,
in blood, a man huntith his brother
to deth.
3 The yuel of her hondis thei
seien good; the prince axith, and the
domesman is in &yogh;eldyng; and a greet man
spak the desir of his soule, and thei
sturbliden togidere it.
4 He that is best
in hem, is as a paluyre note; and he that is
ri&yogh;tful, is as a thorn of hegge. The dai
of thi biholdyng, thi visityng cometh, now
schal be distriyng of hem.
5 Nyle &yogh;e bileue
to a frend, and nyle &yogh;e truste in a
duyk; fro hir that slepith in thi bosum,
kepe thou closyngis of thi mouth.
6 For
the sone doith wrong to the fadir, and
the dou&yogh;ter schal rise a&yogh;ens hir modir, and
the wijf of the sone a&yogh;ens the modir of hir
hosebonde; the enemyes of a man ben the
homeli, ether houshold meynee, of hym.
7 Forsothe Y schal biholde to the Lord, Y
schal abide God my sauyour; the Lord
my God schal here me.
8 Thou, myn enemye,
be not glad on me, for Y felle doun,
Y schal rise; whanne Y sitte in derknessis,
the Lord is my li&yogh;t.
9 Y schal bere wraththe
of the Lord, for Y haue synned to hym,
til he deme my cause, and make my
doom; he schal lede out me in to li&yogh;t, Y
schal se ri&yogh;twisnesse of hym.
10 And myn
enemye schal biholde me, and sche schal
-- --
be hilid with confusioun, which seith to
me, Where is thi Lord God? Myn i&yogh;en
schulen se hir, now sche schal be in to
defoulyng, as clei of stretis.
11 Dai schal
come, that thi wallis be bildid; in that
dai lawe schal be maad afer.
12 In that
dai and Assur schal come til to thee, and
`til to stronge citees, and fro stronge citees
til to flood; and to see fro see, and to hil
fro hil.
13 And erthe schal be in to desolacioun
for her dwelleris, and for fruyt of
the thou&yogh;tis of hem.
14 Fede thou thi puple
in thi &yogh;erde, the floc of thin eritage, that
dwellen aloone in wielde wode; in the
myddil of Carmel thei schulen be fed of
Basan and of Galaad,
15 bi elde daies, bi
daies of thi goyng out of the lond of
Egipt. Y schal schewe to hym wondurful
thingis;
16 hethene men schulen se, and
thei schulen be confoundid on al her
strengthe; thei schulen putte hondis on
her mouth, the eris of hem schulen be
deef;
17 thei schulen licke dust as a serpent;
as crepynge thingis of erthe thei
schulen be disturblid of her housis; thei
schulen not desire oure Lord God, and
thei schulen drede thee.
18 God, who is lijk
thee, that doist awei wickidnesse, and berist
ouer the synne of relifs of thin eritage?
He shal no more sende in his
stronge veniaunce, for he is willynge merci;
he schal turne a&yogh;en,
19 and haue merci
on vs. He schal put doun oure wickidnessis,
and schal caste fer in to depnesse
of the see alle oure synnes.
20 Thou schalt
&yogh;yue treuthe to Jacob, merci to Abraham,
whiche thou sworist to oure fadris fro
elde daies.
Here endith Micheas, and here biginneth
Naum.
-- --
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
