Welcome to PhiloLogic  
   home |  the ARTFL project |  download |  documentation |  sample databases |   
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.

Previous section

Next section

AMOS. Here begynneth Amos. CAP. I.

1   The wordis of Amos ben these, that was in the schepherdis thingis of Thecue, whiche he si&yogh; on Israel, in the daies of Osie, king of Juda, and in the daies of Jeroboam, sone of Joas, kyng of Israel, bifor twei &yogh;eeris of the erthe mouynge. 2   And he seide, The Lord schal rore fro Sion, and schal &yogh;yue his vois fro Jerusalem; and the faire thingis of schepherdis mourenyden, and the cop of Carmele was maad drie. 3   The Lord seith these thingis, On thre grete trespassis of Damask, and on foure, I shal not conuerte it, for it threischide Galaad in irun waynes. 4   And Y schal sende fier in to the hous of Asael, and it schal deuoure the housis of Benadab. 5   And Y schal al to-breke the barre of Damask, and Y schal leese a dwellere fro the feeld of idol, and hym that holdith the ceptre note fro the hous of lust and of letcherie; and the puple of Sirie schal be translatid to Sirenen, seith the Lord. 6   The Lord seith these thingis, On thre grete trespassis of Gasa, and on foure, Y schal not conuerte it, for it translatide perfit caitifte, to close that togidere in Idumee. 7   And Y schal sende fier in to the wal of Gasa, and it schal deuoure the housis therof. 8   And Y schal leese the dwelleris of Azotus, and hym that holdith the ceptre of Ascalon; and Y schal turne myn hond

-- --

on Accaron, and the remenauntis of Filisteis schulen perische, seith the Lord God. 9   The Lord God seith these thingis, On thre grete trespassis of Tire, and on foure, Y schal not conuerte it, for thei closiden togidere perfit caitifte in Idumee, and hadde not mynde on the boond of pees of britheren. 10   And Y schal sende fier in to the wal of Tire, and it schal deuoure the housis therof. 11   The Lord seith these thingis, On thre grete trespassis of Edom, and on foure, Y schal not conuerte it, for it pursuede bi swerd his brother, and defoulide the merci of hym, and helde ferthere his woodnesse, and kepte his indignacioun `til in to the ende. 12   Y schal sende fier in to Theman, and it schal deuoure the housis of Bosra. 13   The Lord seith these thingis, On thre grete trespassis of the sones of Amon, and on foure, Y schal not conuerte hym, for he karf the wymmen with childe of Galaad, for to alarge his terme. 14   And Y schal kyndle fier in the wal of Rabbe, and it schal deuoure the housis therof, in &yogh;ellyng in the dai of batel, and in whirlwynd in the dai of mouyng togidere. 15   And Melchon schal go in to caitifte, he and hise princes togidere, seith the Lord. CAP. II.

1   The Lord God seith these thingis, On thre grete trespassis of Moab, and on foure, Y schal not conuerte it, for it brente the boonys of the kyng of Idumee til to aische. 2   And Y schal sende fier in to Moab, and it schal deuoure the housis of Carioth; and Moab schal die in sown, in the noise of a trumpe. 3   And Y schal leese a iuge of the myddis therof, and Y schal sle with it alle the princes therof, seith the Lord. 4   The Lord seith these thingis, On thre grete trespassis of Juda, and on foure, Y schal not conuerte hym, for he hath caste awei the lawe of the Lord, and kepte not the comaundementis

-- --

of hym; for her idols, after whiche the fadris of hem &yogh;eden, disseyueden hem. 5   And Y schal sende fier in to Juda, and it schal deuoure the housis of Jerusalem. 6   The Lord seith these thingis, On thre grete trespassis of Israel, and on foure, Y schal not conuerte hym, for that that he seelde a iust man for siluer, and a pore man for schoon. 7   Whiche al to-foulen the heedis of pore men on the dust of erthe, and bowen awei the weie of meke men; and the sone and his fadir &yogh;eden to a damesele, that thei schulden defoule myn hooli name. 8   And thei eeten on clothis leid to wedde bisidis ech auter, and drunken the wyn of dampned men in the hous of her God. 9   Forsothe Y distriede Ammorrei fro the face of hem, whos hi&yogh;nesse was the hi&yogh;nesse of cedris, and he was strong as an ook; and Y al to-brak the fruyt of hym aboue, and the rootis of hym bynethe. 10   Y am, that made &yogh;ou to stie fro the lond of Egipt, and ledde &yogh;ou out in desert bi fourti &yogh;eer, that &yogh;e schulden welde the lond of Ammorrei. 11   And Y reiside of &yogh;oure sones in to profetis, and Na&yogh;areis of &yogh;oure &yogh;onge men. Whether it is not so, &yogh;e sones of Israel? seith the Lord. 12   And &yogh;e birliden wyn to Na&yogh;areis, and comaundiden to profetis, and seiden, Profecie &yogh;e not. 13   Lo! Y schal charke vndur &yogh;ou, as a wayn chargid with hei charkith. 14   And fli&yogh;t schal perische fro a swift man, and a strong man schal not holde his vertu, and a stalworthe man schal not saue his lijf; 15   and he that holdith a bowe schal not stonde, and a swift man schal not be sauyd by hise feet; and the stiere of an hors schal not saue his lijf, 16   and a stronge man of herte schal fle nakid among stronge men in that dai, seith the Lord. CAP. III.

1   Sones of Israel, here &yogh;e the word which the Lord spak on &yogh;ou, and on al the kynrede,

-- --

which Y ledde out of the lond of Egipt, 2   and seide, Oneli Y knewe &yogh;ou of alle the kynredis of erthe; therfor Y schal visite on &yogh;ou alle &yogh;oure wickidnessis. 3   Whether tweyne schulen go togidere, no but it acorde to hem? 4   Whether a lioun schal rore in a forest, no but he haue prey? Whether the whelp of a lioun schal &yogh;yue vois fro his denne, no but he take ony thing? 5   Whether a brid schal falle in to a snare of erthe, with outen a foulere? Whether a snare schal be takun awei fro erthe, bifor that it tak sum thing? 6   Whether a trumpe schal sowne in a citee, and the puple schal not drede? Whether yuel schal be in a citee, which yuel the Lord schal not make? 7   For the Lord God schal not make a word, no but he schewe his priuyte to hise seruauntis profetis. 8   A lioun schal rore, who schal not drede? the Lord God spak, who schal not profesie? 9   Make &yogh;e herd in the housis of Azotus, and in the housis of the lond of Egipt; and seie &yogh;e, Be &yogh;e gaderid togidere on the hillis of Samarye, and se &yogh;e many woodnessis in the myddis therof, and hem that suffren fals calenge in the priuy places therof. 10   And thei kouden not do ri&yogh;tful thing, seith the Lord, and tresouriden wickidnesse and raueyn in her housis. 11   Therfor the Lord God seith these thingis, The lond schal be troblid, and be cumpassid; and thi strengthe schal be drawun doun of thee, and thin housis schulen be rauyschid. 12   The Lord God seith these thingis, As if a schepherd rauyschith fro the mouth of a lioun tweyne hipis, ether the laste thing of the eere, so the children of Israel schulen be rauyschid, that dwellen in Samarie, in the cuntrei of bed, and in the bed of Damask. 13   Here &yogh;e, and witnesse &yogh;e in the hous of Jacob, seith the Lord God of oostis. 14   For in the dai, whanne Y schal bigynne to visite the trespassyngis of Israel on hym, Y schal

-- --

visite also on the auteris of Bethel; and the hornes of the auter schulen be kit awei, and schulen falle doun in to erthe. 15   And Y schal smyte the wynter hous with the somer hous, and the housis of yuer schulen perische, and many housis schulen be distried, seith the Lord. CAP. IV.

1   &YOGH;e fatte kien, that ben in the hil of Samarie, here this word; whiche maken fals caleng to nedi men, and breken pore men; which seien to &yogh;oure lordis, Bringe &yogh;e, and we schulen drynke. 2   The Lord God swoor in his hooli, for lo! daies schulen come on &yogh;ou; and thei schulen reise &yogh;ou in schaftis, and &yogh;oure remenauntis in buylynge pottis. 3   And &yogh;e schulen go out bi the openyngis, oon a&yogh;ens another, and &yogh;e schulen be cast forth in to Armon, seith the Lord. 4   Come &yogh;e to Bethel, and do &yogh;e wickidli; to Galgala, and multiplie &yogh;e trespassyng; and offre &yogh;e eerli &yogh;oure sacrifices, in thre daies &yogh;oure tithis. 5   And sacrifice &yogh;e heriyng of breed maad sour, and clepe &yogh;e wilful offryngis, and telle &yogh;e; for &yogh;e, sones of Israel, wolden so, seith the Lord God. 6   Wherfor and Y &yogh;af to &yogh;ou astonying of teeth in alle &yogh;oure citees, and nedinesse of looues in alle &yogh;oure places; and &yogh;e turneden not a&yogh;en to me, seith the Lord. 7   Also Y forbeed reyn fro &yogh;ou, whanne thre monethis weren &yogh;it `to comyng, til to ripe corn; and Y reynede on o citee, and on another citee Y reynede not; o part was bireyned, and the part driede vp on which Y reynede not. 8   And tweyne and thre citees camen to o citee, to drynke watir, and tho weren not fillid; and &yogh;e camen not a&yogh;en to me, seith the Lord. 9   Y smoot &yogh;ou with brennynge wynd, and with rust, the multitude of &yogh;oure orcherdis, and of &yogh;oure vyneris; and a wort worm eet &yogh;oure olyue places, and &yogh;oure

-- --

fige places; and &yogh;e camen not a&yogh;en to me, seith the Lord. 10   Y sente in to &yogh;ou deth in the weie of Egipt, Y smoot with swerd &yogh;oure &yogh;onge men, `til to the caitifte of &yogh;oure horsis, and Y made the stynk of &yogh;oure oostis to stie in to &yogh;oure nose thirlis; and &yogh;e camen not a&yogh;en to me, seith the Lord. 11   Y distriede &yogh;ou, as God distriede Sodom and Gomorre, and &yogh;e ben maad as a brond rauyschid of brennyng; and &yogh;e turneden not a&yogh;en to me, seith the Lord. 12   Wherfor, thou Israel, Y schal do these thingis to thee; but aftir that Y schal do to thee these thingis, Israel, be maad redi in to a&yogh;en comyng of thi God. 13   For lo! he fourmeth hillis, and makith wynd, and tellith to man his speche; and he makith a `morew myist, and goith on hi&yogh; thingis of erthe; the Lord God of oostis is the name of hym. CAP. V.

1   Here &yogh;e this word, for Y reise on &yogh;ou a weilyng. 2   The hous of Israel felle doun, he schal not put to, that it rise a&yogh;en; the virgyn of Israel is cast doun in to hir lond, noon is that schal reise hir. 3   For the Lord God seith these thingis, The citee of which a thousynde wenten out, an hundrid schulen be left ther ynne; and of which an hundrid wenten out, ten schulen be left ther ynne, in the hous of Israel. 4   For the Lord seith these thingis to the hous of Israel, Seke &yogh;e me, and &yogh;e schulen lyue; 5   and nyle &yogh;e seke Bethel, and nyle &yogh;e entre in to Galgala, and &yogh;e schulen not passe to Bersabee; for whi Galgal schal be led caitif, and Bethel schal be vnprofitable. 6   Seke &yogh;e the Lord, and lyue &yogh;e, lest perauenture the hous of Joseph be brent as fier; and it schal deuoure Bethel, and there schal not be, that schal quenche. 7   Whiche conuerten doom in to wermod, and forsaken ri&yogh;twisnesse in the lond, 8   and forsaken hym that makith

-- --

Arture and Orion, and hym that turneth derknessis in to the morewtid, and him that chaungith dai in to ni&yogh;t; which clepith watris of the see, and heldith out hem on the face of erthe; the Lord is name of hym. 9   Which scorneth distriyng on the stronge, and bringith robbyng on the my&yogh;ti. 10   Thei hatiden a man repreuynge in the &yogh;ate, and thei wlatiden a man spekynge perfitli. 11   Therfor for that that &yogh;e robbiden a pore man, and token fro hym the chosun prey, &yogh;e schulen bilde housis with square stoon, and &yogh;e schulen not dwelle in hem; &yogh;e schulen plaunte moost louyd vyne&yogh;erdis, and &yogh;e schulen not drynke the wyn of hem. 12   For Y knew &yogh;oure grete trespassis many, and &yogh;oure stronge synnes; enemyes of `the ri&yogh;twis man, takynge &yogh;ifte, and berynge doun pore men in the &yogh;ate. 13   Therfor a prudent man schal be stille in that time, for the time is yuel. 14   Seke &yogh;e good, and not yuel, that &yogh;e lyue, and the Lord God of oostis schal be with &yogh;ou, as &yogh;e seiden. 15   Hate &yogh;e yuel, and loue &yogh;e good, and ordeyne &yogh;e in the gate doom; if perauenture the Lord God of oostis haue merci on the remenauntis of Joseph. 16   Therfor the Lord God of oostis, hauynge lordschipe, seith these thingis, Weilyng schal be in alle stretis, and in alle thingis that ben withoutforth it schal be seid, Wo! wo! and thei schulen clepe an erthe tilier to mourenyng, and hem that kunnen weile, to weilyng. 17   And weilyng schal be in alle weies, for Y schal passe forth in the myddil of `the see, seith the Lord. 18   Wo to hem that desiren the dai of the Lord; wher to desiren &yogh;e it to &yogh;ou? This dai of the Lord schal be derknessis, and not li&yogh;t. 19   As if a man renne fro the face of a lioun, and a bere renne to hym; and he entre in to the hous, and lene with his hond on the wal, and a serpent dwellynge in schadewe bite hym. 20   Whether the dai

-- --

of the Lord schal not be derknessis, and not li&yogh;t; and myist, and not schynyng ther ynne? 21   Y hatide and castide awei &yogh;oure feeste daies, and Y schal not take the odour of &yogh;oure cumpenyes. 22   That if &yogh;e offren to me &yogh;oure brent sacrifices, and &yogh;iftis, Y schal not resseyue, and Y schal not biholde avowis of &yogh;oure fatte thingis. 23   Do thou awei fro me the noise of thi songis, and Y schal not here the songis of thin harpe. 24   And doom schal be schewid as watir, and ri&yogh;tfulnesse as a strong streem. 25   Whether &yogh;e, the hous of Israel, offriden to me sacrifices for enemyes to be ouercomun, and sacrifice in desert fourti &yogh;eeris? 26   And &yogh;e han bore tabernaclis to Moloch, &yogh;oure god, and ymage of &yogh;oure idols, the sterre of &yogh;oure god, which &yogh;e maden to &yogh;ou. 27   And Y schal make &yogh;ou for to passe ouer Damask, seide the Lord; God of oostis is the name of him. CAP. VI.

1   Wo to &yogh;ou, that ben ful of richessis in Sion, and tristen in the hil of Samarie, &yogh;e principal men, the heedis of puplis, that goen proudli in to the hous of Israel. 2   Go &yogh;e in to Calamye, and se &yogh;e, and go &yogh;e fro thennus in to Emath the greet; and go &yogh;e doun in to Geth of Palestyns, and to alle the beste rewmes of hem, if her terme be broddere than &yogh;oure terme. 3   And &yogh;e ben departid in to yuel dai, and nei&yogh;en to the seete of wickidnesse; 4   and &yogh;e slepen in beddis of yuer, and doen letcherie in &yogh;oure beddis; and &yogh;e eten a lomb of the flok, and calues of the myddil of droue; 5   and &yogh;e syngen at vois of sautree. As Dauid thei gessiden hem for to haue instrumentis of song, and drynken wyn in viols; 6   and with beste oynement thei weren anoynted; and in no thing thei hadden compassioun on the sorewe, ether defoulyng, of Joseph. 7   Wherfor now thei schulen passe in the

-- --

heed of men passynge ouer, and the doyng of men doynge letcherie schal be don awei. 8   The Lord God swoor in his soule, seith the Lord God of oostis, Y wlate the pride of Jacob, and Y hate the housis of hym, and Y schal bitake the citee with hise dwelleris; 9   that if ten men ben left in oon hous, and thei schulen die. 10   And his nei&yogh;bore schal take hym, and schal brenne hym, that he bere out boonys of the hous. And he schal seie to hym, that is in the priuy places of the hous, 11   Whether ther is &yogh;it anentis thee? And he schal answer, An ende is. And he schal seie to hym, Be thou stille, and thenke thou not on the name of the Lord. 12   For lo! the Lord schal comaunde, and schal smyte the grettere hous with fallyngis, and the lesse hous with brekyngis. 13   Whether horsis moun renne in stoonys, ether it mai be eerid with wielde oxun? For &yogh;e turneden doom in to bitternesse, and the fruyt of ri&yogh;tfulnesse in to wermod. 14   And &yogh;e ben glad in nou&yogh;t, and &yogh;e seien, Whether not in oure strengthe we token to vs hornes? 15   Lo! Y schal reise on &yogh;ou, the hous of Israel, seith the Lord God of oostis, a folc; and it schal al to-breke &yogh;ou fro entre of Emath `til to the streem of desert. CAP. VII.

1   The Lord God schewide these thingis to me; and lo! a makere of locust in bigynnyng of buriownynge thingis of euentid reyn, and lo! euentid reyn after the clippere of the kyng. 2   And it was don, whanne he hadde endid for to ete the erbe of erthe, Y seide, Lord God, Y biseche, be thou merciful; who schal reise Jacob, for he is litil? 3   The Lord hadde merci on this thing; It schal not be, seide the Lord God. 4   The Lord God schewide to me these thingis; and lo! the Lord

-- --

God schal clepe doom to fier, and it schal deuoure myche depthe of watir, and it eet togidere a part. 5   And Y seide, Lord God, Y biseche, reste thou; who schal reise Jacob, for he is litil? 6   The Lord hadde merci on this thing; But and this thing schal not be, seide the Lord God. 7   The Lord God schewide to me these thingis; and lo! the Lord stondinge on a wal plastrid, and in the hond of hym was a trulle of a masoun. 8   And the Lord seide to me, What seest thou, Amos? And Y seide, A trulle of a masoun. And the Lord seide, Lo! I schal putte a trulle in the myddil of my puple Israel; Y schal no more putte to, for to ouerlede it; 9   and the hi&yogh; thingis of idol schulen be distried, and the halewyngis of Israel schulen be desolat; and Y schal rise on the hous of Jeroboam bi swerd. 10   And Amasie, prest of Bethel, sente to Jeroboam, kyng of Israel, and seide, Amos rebellide a&yogh;ens thee, in the myddil of the hous of Israel; the lond mai not susteyne alle hise wordis. 11   For Amos seith these thingis, Jeroboam schal die bi swerd, and Israel caitif schal passe fro his lond. 12   And Amasie seide to Amos, Thou that seest, go; fle thou in to the lond of Juda, and ete thou there thi breed; and there thou schalt profesie. 13   And thou schalt no more put to, that thou profesie in Bethel, for it is the halewyng of the king, and is the hous of the rewme. 14   And Amos answeride, and seide to Amasie, Y am not a profete, and Y am not sone of profete; but an herde of neet Y am, drawyng vp sicomoris. 15   And the Lord took me, whanne Y suede the floc; and the Lord seide to me, Go, and profesie thou to my puple Israel. 16   And now here thou the word of the Lord. Thou seist, Thou schalt not profesie on Israel, and thou schal not droppe on the hous of idol. 17   For this thing the Lord seith these thingis, Thi wijf schal do fornicacioun in the

-- --

citee, and thi sones and thi dou&yogh;tris schal falle bi swerd, and thi lond schal be motun with a litil coord; and thou schalt die in a pollutid lond, and Israel caitif schal passe fro his lond. CAP. VIII.

1   The Lord God schewide to me these thingis; and lo! an hook of applis. 2   And the Lord seide, What seist thou, Amos? And Y seide, An hook of applis. And the Lord seide to me, The ende is comun on my puple Israel; Y schal no more putte to, that Y passe bi hym. 3   And the herris, ether twistis, of the temple schulen greetli sowne in that dai, seith the Lord God. Many men schulen die, silence schal be cast forth in ech place. 4   Here &yogh;e this thing, whiche al to-breken a pore man, and maken nedi men of the lond for to faile; 5   and &yogh;e seien, Whanne schal heruest passe, and we schulen sille marchaundises? and the sabat, and we schulen opene wheete? that we make lesse the mesure, and encreesse the cicle, and `vndur put gileful balauncis; 6   that we welde bi siluer nedi men and pore men for schoon, and we sille outcastyngis of wheete? 7   The Lord swoor a&yogh;ens the pride of Jacob, Y schal not for&yogh;ete til to the ende alle the werkis of hem. 8   Whether on this thing the erthe schal not be mouyd togidere, and eche dwellere therof schal mourene? And it schal stie vp as al the flood, and schal be cast out, and schal flete awei as the stronde of Egipt. 9   And it schal be, seith the Lord, in that dai the sunne schal go doun in myddai, and Y schal make the erthe for to be derk in the dai of li&yogh;t. 10   And Y schal conuerte &yogh;oure feeste daies in to mourenyng, and alle &yogh;oure songis in to weilyng; and Y schal brynge yn on ech bac of &yogh;ou a sak, and on ech heed of &yogh;ou ballidnesse; and Y schal put it as the

-- --

mourenyng of oon bigetun sone, and the laste thingis therof as a bittir dai. 11   Lo! the daies comen, seith the Lord, and Y schal sende out hungur in to erthe; not hungur of breed, nether thirst of watir, but of herynge the word of God. 12   And thei schulen be mouyd to gidere fro the see til to the see, and fro the north til to the eest thei schulen cumpasse, sekynge the word of the Lord, and thei schulen not fynde. 13   In that dai faire maidens schulen faile, and &yogh;onge men in thirst, whiche sweren in trespas of Samarie, 14   and seien, Dan, thi god lyueth, and the weie of Bersabee lyueth; and thei schulen falle, and thei schulen no more rise a&yogh;en. CAP. IX.

1   I si&yogh; the Lord stondynge on the auter, and he seide, Smyte thou the herre, and the ouer threshfoldis be mouyd togidere; for aueryce is in the heed of alle, and Y schal sle bi swerd the laste of hem; ther schal no fli&yogh;t be to hem, and he that schal fle of hem, schal not be sauyd. 2   If thei schulen go doun til to helle, fro thennus myn hond schal lede out hem; and if thei schulen `stie til in to heuene, fro thennus Y schal drawe hem doun. 3   And if thei schulen be hid in the cop of Carmele, fro thennus Y sekynge schal do awei hem; and if thei schulen hide hem silf fro myn i&yogh;en in the depnesse of the see, there Y shal comaunde to a serpente, and it schal bite hem. 4   And if thei schulen go awei in to caitifte bifore her enemyes, there Y schal comaunde to swerd, and it schal sle hem. And Y schal putte myn i&yogh;en on hem in to yuel, and not in to good. 5   And the Lord God of oostis schal do these thingis, that touchith erthe, and it schal faile, and alle men dwellynge ther ynne schulen mourene; and it schal stie vp as ech stronde, and it schal flete awei as flood

-- --

of Egipt. 6   He that bildith his stiyng vp in heuene, schal do these thingis, and foundide his birthun on erthe; which clepith watris of the see, and heldith out hem on the face of erthe; the Lord is name of hym. 7   Whether not as sones of Ethiopiens &yogh;e ben to me, the sones of Israel? seith the Lord God. Whether Y made not Israel for to stie vp fro the lond of Egipt, and Palestines fro Capodosie, and Siriens fro Cirenen? 8   Lo! the i&yogh;en of the Lord God ben on the rewme synnynge, and Y schal al to-breke it fro the face of erthe; netheles Y al to-brekynge schal not al to-breke the hous of Jacob, seith the Lord. 9   For lo! Y schal comaunde, and schal schake the hous of Israel in alle folkis, as wheete is in a riddil, and a litil stoon schal not falle on erthe. 10   Alle synneris of my puple schulen die bi swerd, whiche seien, Yuel schal not nei&yogh;, and schal not come on vs. 11   In that dai Y schal reise the tabernacle of Dauith, that felle doun, and Y schal a&yogh;en bilde openyngis of wallis therof, and Y schal restore the thingis that fellen doun; and Y schal a&yogh;en bilde it, 12   as in olde daies, that thei welde the remenauntis of Idume, and alle naciouns; for that my name is clepun to help on hem, seith the Lord doynge these thingis. 13   Lo! daies comen, seith the Lord, and the erere schal take the repere, and `the stampere of grape schal take the man sowynge seed; and mounteyns schulen droppe swetnesse, and alle smale hillis schulen be tilid. 14   And Y schal conuerte the caitifte of my puple Israel, and thei schulen bilde forsakun citees, and schulen dwelle; and schulen plaunte vyne&yogh;erdis, and thei schulen drynke wyn of hem; and schulen make gardyns, and schulen ete fruitis of hem. 15   And Y schal plaunte hem on her lond, and Y schal no more drawe

-- --

out hem of her lond, which Y &yogh;af to hem, seith the Lord thi God. Here endith Amos, and here bigynneth Abdias.

-- --

Previous section

Next section


Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
Powered by PhiloLogic