Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. XIV.
1 Samarie perische, for it stiride his God
to bittirnesse; perische it bi swerd. The
litle children of hem be hurtlid doun, and
the wymmen with child therof be koruun.
2 Israel, be thou conuertid to thi Lord God,
for thou fellist doun in thi wickidnesse.
3 Take &yogh;e wordis with &yogh;ou, and be &yogh;e conuertid
to the Lord; and seie &yogh;e to hym, Do
thou awei al wickidnesse, and take thou
good; and we schulen &yogh;elde the caluys of
oure lippis.
4 Assur schal not saue vs, we
schulen not stie on hors; and we schulen
no more seie, Oure goddis ben the werkis
of oure hondis; for thou schalt haue merci
on that modirles child, which is in thee.
5 Y schal make hool the sorewis of hem;
Y schal loue hem wilfuli, for my strong
veniaunce is turned awei fro hem.
6 Y
schal be as a dew, and Israel schal buriowne
as a lilie. And the root therof schal
breke out as of the Liban;
7 the braunchis
therof schulen go. And the glorye therof
schal be as an olyue tree, and the odour
therof schal be as of the Liban.
8 Thei
schulen be conuertid, and sitte in the schadewe
of hym; thei schulen lyue bi wheete,
and schulen buriowne as a vyne. The memorial
therof schal be as the wyne of
Liban.
9 Effraym, what schulen idols do
more to me? Y schal here him, and Y
schal dresse him as a greene fir tree. Thi
fruit is foundun of me.
10 Who is wijs, and
schal vndurstonde these thingis? who is
vndurstondyng, and schal kunne these
thingis? For the weies of the Lord ben
ri&yogh;tful, and iust men schulen go in tho;
but trespassours schulen falle in tho.
Here endith Osee, and here biginneth
Joel.
-- --
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
