Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. VIII.
1 In the thridde &yogh;eer of the rewme of
Balthasar, the king, a visioun apperide to
me. Y, Danyel, after that thing that Y
hadde seyn in the bigynnyng,
2 si&yogh; in my
visioun, whanne Y was in the castel of
Susis, which is in the cuntrei of Helam;
sotheli Y si&yogh; in the visioun that Y was on
the &yogh;ate Vlay.
3 And Y reiside myn i&yogh;en,
and Y si&yogh;; and lo! o ram stood bifor the
mareis, and hadde hi&yogh; hornes, and oon
hi&yogh;ere than the tother, and vndurwexynge.
4 Aftirward Y si&yogh; the ram wyndewynge
with hornes a&yogh;ens the eest, and a&yogh;ens
the west, and a&yogh;ens the north, and a&yogh;ens
the south; and alle beestis my&yogh;ten not
a&yogh;enstonde it, nether be delyuered fro the
hondis of it. And it dide bi his wille, and
was magnefied.
5 And Y vndurstood. Lo!
forsothe a buk of geet cam fro the west
on the face of al erthe, and touchide not
-- --
the erthe; forsothe the buk of geet hadde
a noble horn bitwixe hise i&yogh;en;
6 and he
cam til to that horned ram, which Y
hadde seyn stondynge bifore the &yogh;ate, and
he ran in the fersnesse of his strengthe to
that ram.
7 And whanne he hadde nei&yogh;id
ni&yogh; the ram, he hurlide fersly on hym,
and he smoot the ram, and al to-brak
tweyne hornes of hym, and the ram mi&yogh;te
not a&yogh;enstonde hym. And whanne he
hadde sent that ram in to erthe, he defoulide;
and no man mi&yogh;te delyuere the
ram fro his hond.
8 Forsothe the buk of
geet was maad ful greet; and whanne he
hadde encreessid, the greet horn was
brokun, and foure hornes risiden vndur
it, bi foure wyndis of heuene.
9 Forsothe
of oon of hem &yogh;ede out o litil horn, and it
was maad greet a&yogh;ens the south, and a&yogh;ens
the eest, and a&yogh;ens the strengthe.
10 And it
was magnefied til to the strengthe of heuene,
and it castide doun of the strengthe
and of sterris, and defoulide tho.
11 And
he was magnefied til to the prince of
strengthe, and he took awei fro hym the
contynuel sacrifice, and castide doun the
place of his halewyng.
12 Forsothe strengthe
was &yogh;ouun to hym a&yogh;ens the contynuel
sacrifice for synnes, and treuthe schal be
cast doun in erthe; and he schal haue
prosperite, and schal do.
13 And Y herde
oon of hooli aungels spekynge; and oon
hooli aungel seide to another, Y noot to
whom spekinge, Hou long the visioun, and
the contynuel sacrifice, and the synne of
desolacioun, which is maad, and the seyntuarie,
and the strengthe schal be defoulid?
14 And he seide to hym, Til to the euentid
and morewtid, two thousynde daies and
thre hundrid; and the seyntuarie schal be
clensid.
15 Forsothe it was doon, whanne
Y, Danyel, si&yogh; the visioun, and axide the
vndurstondyng, lo! as the licnesse of a
man stood in my si&yogh;t.
16 And Y herde the
voys of a man bitwixe Vlai, and he criede,
and seide, Gabriel, make thou Danyel to
vndurstonde this visioun.
17 And he cam,
-- --
and stood bisidis where Y stood; and
whanne he was comun, Y dredde, and
felle on my face. And he seide to me,
Thou, sone of man, vndurstonde, for the
visioun schal be fillid in the tyme of
ende.
18 And whanne he spak to me, Y
slood doun `plat to the erthe. And he
touchide me, and settide me in my degree.
19 And he seide to me, Y schal schewe to
thee what thingis schulen come in the
laste of cursing, for the tyme hath his
ende.
20 The ram, whom thou si&yogh;est haue
hornes, is the kyng of Medeis and of
Perseis.
21 Forsothe the buc of geet is the
kyng of Grekis; and the greet horn that
was bitwixe hise i&yogh;en, he is the firste
kyng.
22 Forsothe that whanne that horn
was brokun, foure hornes risiden for it,
foure kyngis schulen rise of the folc of
hym, but not in the strengthe of hym.
23 And after the rewme of hem, whanne
`wickidnessis han encreessid, a kyng schal
rise vnschamefast in face, and vndurstondyng
proposisiouns, ether resouns set forth;
and his strengthe schal be maad stalworthe,
24
but not in hise strengthis. And more
than it mai be bileuyd he schal waste alle
thingis, and he schal haue prosperite, and
schal do. And he schal sle stronge men,
and the puple of seyntis,
25 bi his wille, and
gile schal be dressid in his hond. And he
schal magnefie his herte, and in abundaunce
of alle thingis he schal sle ful many
men. And he schal rise a&yogh;ens the prince
of princes, and withouten hond he schal
be al to-brokun.
26 And the visioun, which
is seid in the morewtid and euentid, is
trewe. Therfor seele thou the visioun, for
it schal be after many daies.
27 And Y,
Danyel, was astonyed, and was sijk bi ful
many daies; and whanne Y hadde rise, Y
dide the werkis of the kyng; and Y was
astonyed at the visioun, and `noon was
that interpretide.
-- --
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
