Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. XLII.
1 And he ledde me out in to the outermere
halle, bi the weie ledynge to the
north; and he ledde me in to the treserie,
that was a&yogh;ens the bildyng departid, and
a&yogh;ens the hous goynge to the north;
2 in
the face an hundrid cubitis of lengthe of
the dore of the north, and fifti cubitis of
breede,
3 a&yogh;ens twenti cubitis of the ynnere
halle, and a&yogh;ens the pawment araied with
stoon of the outermere halle, where a
porche was ioyned to thre fold porche.
4 And bifor the tresories was a walkyng of
ten cubitis of breede, biholdynge to the
ynnere thingis of the weie of o cubit. And
the doris of tho to the north,
5 where tresories
weren lowere in the hi&yogh;ere thingis;
for tho baren vp the porchis that apperiden
an hi&yogh; of tho fro the lowere thingis, and
fro the myddil thingis of the bildyng.
6 For tho weren of thre stagis, and hadden
not pileris, as weren the pilers of hallis;
therfor tho stoden an hi&yogh; fro the lowere
thingis, and fro the myddil thingis fro
erthe, bi fifti cubitis.
7 And the outermore
halle closynge the walkynge place was bi
the treseries, that weren in the weie of the
outermore halle, bifor the treseries; the
lengthe therof was of fifti cubitis.
8 For
the lengthe of the tresories of the outermore
halle was of fifti cubitis, and the
lengthe bifor the face of the temple was
of an hundrid cubitis.
9 And vndur these
tresories was an entring fro the eest, of
men entringe in to tho, fro the outermere
halle,
10 in the brede of the wal of the
halle, that was a&yogh;ens the eest weie in the
face of the bilding departid. And treseries
weren bifore the bilding,
11 and a weie
was bifor the face of tho, bi the licnesse
-- --
of treseries that weren in the weie of the
north; bi the lengthe of tho, so was also
the breede of tho. And al the entryng of
tho, and the licnessis and doris of tho,
12 weren lijk the doris of treseries that weren
in the weye biholdynge to the south; a
dore was in the heed of the weye, which
weie was bifor the porche departid to men
entringe bi the eest weie.
13 And he seide
to me, The treseries of the north, and the
treseries of the south, that ben bifor the
bildyng departid, these ben hooli treseries,
in whiche the preestis ben clothid, that
nei&yogh;en to the Lord in to the hooli of hooli
thingis; there thei schulen putte the hooli
of hooli thingis, and offryngis for synne,
and for trespas; for it is an hooli place.
14 Sotheli whanne prestis han entrid, thei
schulen go out of hooli thingis in to the
outermore halle; and there thei schulen
putte vp her clothis, in whiche thei mynystren,
for tho ben hooli; and thei schulen
be clothid in othere clothis, and so thei
schulen go forth to the puple.
15 And whanne
he hadde fillid the mesuris of the ynnere
hous, he ledde me out bi the weie of the
&yogh;ate that biheelde to the eest weie; and
he mat it on ech side bi cumpas.
16 Forsothe
he mat a&yogh;ens the eest wynd with
the rehed of mesure bi cumpas fyue hundrid
rehedis, in a rehed of mesure bi cumpas.
17 And he mat a&yogh;ens the wynd of the
north fiue hundred rehedis, in the rehed
of mesure bi cumpas.
18 And at the south
wynd he mat fyue hundrid rehedis, with
a rehed of mesure bi cumpas.
19 And at the
west wynd he mat fyue hundrid rehedis,
with the rehed of mesure.
20 Bi foure
wyndis he mat the wal therof on ech side
bi cumpas, the lengthe of fyue hundrid,
and the breede of fyue hundrid, departynge
bitwixe the seyntuarie and the place
of the comyn puple.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
