1   And the word of the Lord was maad to me, 2   and he seide, What is it, that &yogh;e turnen a parable among &yogh;ou in to this prouerbe, in the lond of Israel, and seien, Fadris eeten a bittir grape, and the teeth of sones ben an egge, ether astonyed? 3   Y

lyue, seith the Lord God, this parable schal no more be in to a prouerbe to &yogh;ou in Israel. 4   Lo! alle soulis ben myne; as the soule of the fadir, so and the soule of the sone is myn. Thilke soule that doith synne, schal die. 5   And if a man is iust, and doith doom and ri&yogh;tfulnesse, 6   etith not in hillis, and reisith not hise i&yogh;en to the idols of the hous of Israel; and defoulith not the wijf of his nei&yogh;bore, and nei&yogh;eth not to a womman defoulid with vncleene blood; 7   and makith not a man sori, &yogh;eldith the wed to the dettour, rauyschith no thing bi violence, &yogh;yueth his breed to the hungri, and hilith a nakid man with a cloth; 8   leeneth not to vsure, and takith not more; turneth awei his hond fro wickidnesse, and makith trewe dom bitwixe man and man; 9   and goith in my comaundementis, and kepith my domes, that he do treuthe; this is a iust man, he schal lyue in lijf, seith the Lord God. 10   That if he gendrith a sone, a theef, shedinge out blood, 11   and doith oon of thes thingis, and sotheli not doing alle these thingis, but etinge in hillis, and defoulynge the wijf of his nei&yogh;bore; 12   makynge soreuful a nedy man and pore, rauyschynge raueyns, not &yogh;eldinge a wed, reisynge hise i&yogh;en to idols, doynge abhomynacioun; &yogh;iuynge to vsure, and takynge more; 13   whether he schal lyue? he schal not lyue; whanne he hath do alle these abhomynable thingis, he schal die bi deth, his blood schal be in hym. 14   That if he gendrith a sone, which seeth alle the synnes of his fadir, whiche he dide, and dredith, and doith noon lijk tho; 15   etith not on hillis, and reisith not hise i&yogh;en to the idols of the hous of Israel; and defoulith not the wijf of his nei&yogh;bore, 16   and makith not sori a man, witholdith not a wed, and rauyschith not raueyn, &yogh;yueth his breed to the hungri, and hilith the nakid with a cloth; 17   turneth a wei his hond fro the wrong of a pore man, takith not vsure and ouerhabundaunce,

`that is, no thing more than he lente, and doith my domes, and goith in my comaundementis; this sone schal not die in the wickidnesse of his fadir, but he schal lyue in lijf. 18   For his fadir made fals caleng, and dide violence to his brother, and wrou&yogh;te yuel in the myddis of his puple, lo! he is deed in his wickidnesse. 19   And &yogh;e seien, Whi berith not the sone the wickidnesse of the fadir? That is to seie, for the sone wrou&yogh;te doom and ri&yogh;tfulnesse, he kepte alle my comaundementis, and dide tho, he schal lyue in lijf. 20   Thilke soule that doith synne, schal die; the sone schal not bere the wickidnesse of the fadir, and the fadir schal not bere the wickednesse of the sone; the ri&yogh;tfulnesse of a iust man schal be on hym, and the wickidnesse of a wickid man schal be on hym. 21   Forsothe if a wickid man doith penaunce of alle hise synnes whiche he wrou&yogh;te, and kepith alle myn heestis, and doith dom and ri&yogh;tfulnesse, he schal lyue bi lijf, and schal not die. 22   Y schal not haue mynde of alle his wickidnessis whiche he wrou&yogh;te; he schal lyue in his ri&yogh;tfulnesse which he wrou&yogh;te. 23   Whether the deth of the wickid man is of my wille, seith the Lord God, and not that he be conuertid fro his weies, and lyue? 24   Forsothe if a iust man turneth awey hym silf fro his ri&yogh;tfulnesse, and doith wickidnesse bi alle hise abhomynaciouns, which a wickid man is wont to worche, whether he schal lyue? Alle hise ri&yogh;tfulnessis whiche he dide, schulen not be had in mynde; in his trespassyng bi which he trespasside, and in his synne which he synnede, he schal die in tho. 25   And &yogh;e seiden, The weie of the Lord is not euene. Therfor, the hous of Israel, here &yogh;e, whether my weie is not euene, and not more &yogh;oure weies ben schrewid? 26   For whanne a ri&yogh;tful man turneth awei hym silf fro his ri&yogh;tfulnesse, and doith wickidnesse, he schal die in it, he schal die in the vnri&yogh;twisnesse which

he wrou&yogh;te. 27   And whanne a wickid man turneth awei him silf fro his wickidnesse which he wrou&yogh;te, and doith dom and ri&yogh;tfulnesse, he schal quykene his soule. 28   For he biholdinge and turnynge awei hym silf fro alle hise wickidnessis which he wrou&yogh;te, schal lyue in lijf, and schal not die. 29   And the sones of Israel seien, The weie of the Lord is not euene. Whether my weies ben not euene, &yogh;e hous of Israel, and not more &yogh;oure weies ben schrewid? 30   Therfor, thou hous of Israel, Y schal deme ech man bi hise weies, seith the Lord God. Turne &yogh;e togidere, and do &yogh;e penaunce for alle &yogh;oure wickidnessis, and wickidnesse schal not be to &yogh;ou in to falling. 31   Caste awei fro &yogh;ou alle &yogh;oure trespassingis, bi whiche &yogh;e trespassiden, and make &yogh;e a newe herte and a newe spirit to &yogh;ou, and whi schulen &yogh;e die, the hous of Israel? 32   For Y nyle the deeth of hym that dieth, seith the Lord God; turne &yogh;e a&yogh;en, and lyue &yogh;e.

Previous section

Next section