Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. LI.
1 The Lord seith these thingis, Lo! Y
schal reise on Babiloyne, and on the dwelleris
therof, that reisiden her herte a&yogh;ens
me, as a wynd of pestilence.
2 And Y schal
sende in to Babiloyne wyndeweris, and
thei schulen wyndewe it, and thei schulen
destrie the lond of it; for thei camen
on it on ech side, in the dai of the turment
therof.
3 He that beendith his bowe,
beende not, and a man clothid in haburioun,
stie not; nyle &yogh;e spare the &yogh;onge
men therof, sle &yogh;e al the chyualrie therof.
4 And slayn men schulen falle in the lond
of Caldeis, and woundid men in the cuntreis
therof.
5 For whi Israel and Juda was
not maad widewe fro her God, the Lord
of oostis; but the lond of hem was fillid
with trespas of the hooli of Israel.
6 Fle
&yogh;e fro the myddis of Babiloyne, that ech
man saue his soule; nyle &yogh;e be stille on
the wickidnesse therof, for whi tyme of
veniaunce therof is to the Lord; he schal
&yogh;elde while to it.
7 Babiloyne is a goldun
-- --
cuppe in the hond of the Lord, and fillith
al erthe; hethene men drunken of the
wyn therof, and therfor thei ben mouyd.
8 Babiloyne felle doun sudenli, and is al to-brokun;
&yogh;elle &yogh;e on it, take &yogh;e recyn to
the sorewe therof, if perauenture it be
heelid.
9 We heeliden Babiloyne, and it is
not maad hool; forsake we it and go we
ech in to his lond; for the doom therof
cam `til to heuenes, and is reisid `til to
cloudis.
10 The Lord hath brou&yogh;t forth oure
ri&yogh;tfulnessis; come &yogh;e, and telle we in
Sion the werk of oure Lord God.
11 Scharpe
&yogh;e arowis, fille &yogh;e arowe caasis; the Lord
reiside the spirit of the kyngis of Medeis,
and his mynde is a&yogh;en Babiloyne,
that he leese it, for it is the veniaunce of
the Lord, the veniaunce of his temple.
The kyng of Medeis is reisid of the Lord
a&yogh;ens Babiloyne.
12 Reise &yogh;e a signe on the
wallis of Babiloyne, encreesse &yogh;e kepyng,
reise &yogh;e keperis, make &yogh;e redi buyschementis;
for the Lord thou&yogh;te, and dide,
what euer thing he spak a&yogh;ens the dwelleris
of Babiloyne.
13 A! thou Babiloyne,
that dwellist on many watris, riche in thi
tresours, thin ende cometh, the foote mesure
of thi kittyng doun.
14 The Lord of
oostis swoor bi his soule, that Y schal fille
thee with men, as with bruke, and a myry
song schal be sungun on thee.
15 The Lord
swoor, which made erthe bi his strengthe,
made redy the world bi his wisdom, and
stretchide forth heuenes bi his prudence.
16 Whanne he &yogh;yueth vois, watris ben multiplied
in heuene; which Lord reisith
cloudis fro the laste of erthe, made leitis
in to reyn, and brou&yogh;t forth wynd of hise
tresouris.
17 Ech man is maad a fool of
kunnyng, ech wellere togidere is schent in
a grauun ymage; for his wellyng togidere
is fals, and a spirit is not in tho.
18 The
werkis ben veyn, and worthi of scorn;
tho schulen perische in the tyme of her
-- --
visityng.
19 The part of Jacob is not as
these thingis; for he that made alle
thingis is the part of Jacob, and Israel
is the septre of his eritage; the Lord of
oostis is his name.
20 Thou hurtlist doun
to me the instrumentis of batel, and Y
schal hurtle doun folkis in thee, and Y
schal leese rewmes in thee;
21 and Y schal
hurtle doun in thee an hors, and the
ridere therof; and Y schal hurtle doun in
thee a chare, and the stiere therof;
22 and
Y schal hurtle doun in thee a man and
womman; and Y schal hurtle doun in thee
an elde man and a child; and Y schal
hurtle doun in thee a &yogh;ong man and a
virgyn;
23 and Y schal hurtle doun in thee
a scheepherde and his floc; and Y schal
hurtle doun in thee an erthetiliere and
his &yogh;ok beestis; and Y schal hurtle doun
in thee duykis and magistratis.
24 And Y
schal &yogh;elde, seith the Lord, to Babiloyne,
and to alle the dwelleris of Caldee, al her
yuel, which thei diden in Sion, bifore
&yogh;oure i&yogh;en.
25 Lo! Y, seith the Lord, to
thee, thou hil berynge pestilence, which
corrumpist al erthe. Y schal stretche
forth myn hond on thee, and Y schal
vnwlappe thee fro stoonys, and Y schal
&yogh;yue thee in to an hil of brennyng.
26 And
Y schal not take of thee a stoon in to a
corner, and a stoon in to foundementis;
but thou schalt be lost with outen ende,
seith the Lord.
27 Reise &yogh;e a signe in the
lond, sowne &yogh;e with a clarioun in hillis;
halewe &yogh;e folkis on it, telle &yogh;e to the
kyngis of Ararath, of Menny, and of
Ascheneth a&yogh;ens it; noumbre &yogh;e Tapser note
a&yogh;ens it, and bringe &yogh;e an hors, as a bruke
hauynge a pricke.
28 Halowe &yogh;e folkis a&yogh;ens
it, the kyngis of Medey, the duykis therof,
and alle magistratis therof, and al the
lond of his power.
29 And the erthe schal
be mouyd, and schal be disturblid; for
the thou&yogh;t of the Lord schal fulli wake
a&yogh;ens Babiloyne, that he sette the lond of
Babiloyne desert, and vnhabitable.
30 The
-- --
stronge men of Babiloyne ceessiden of
batel, thei dwelliden in stronge holdis;
the strengthe of hem is deuourid, and
thei ben maad as wymmen; the tabernaclis
therof ben brent, the barris therof
ben al to-brokun.
31 A rennere schal come
a&yogh;ens a rennere, and a messanger a&yogh;ens a
messanger, to telle to the kyng of Babiloyne,
that his citee is takun fro the toon
ende `til to the tother ende;
32 and the
forthis ben bifore ocupied, and the mareisis
ben brent with fier, and the men
werryours ben disturblid.
33 For the Lord
of oostis, God of Israel, seith these thingis,
The dou&yogh;ter of Babiloyne is as a corn
floor, the tyme of threischyng therof; &yogh;it
a litil, and the tyme of repyng therof
schal come.
34 Nabugodonosor, the kyng of
Babiloyne, eet me, and deuouride me; he
made me as a voide vessel, he as a dragoun
swolewide me; he fillide his wombe
with my tendirnesse, and he castide me
out.
35 Wickidnesse a&yogh;ens me, and my
fleisch on Babiloyne, seith the dwellyng
of Sion; and my blood on the dwelleris of
Caldee, seith Jerusalem.
36 Therfor the Lord
seith these thingis, Lo! Y schal deme thi
cause, and Y schal venge thi veniaunce;
and Y schal make the see therof forsakun,
and Y schal make drie the veyne therof.
37 And Babiloyne schal be in to biriels, it
schal be the dwellyng of dragouns, wondryng
and hissyng, for that no dwellere
is.
38 Thei schulen rore togidere as liouns,
and thei schulen schake lockis, as the
whelpis of liouns.
39 In the heete of hem
Y schal sette the drynkis of hem; and Y
schal make hem drunkun, that thei be
brou&yogh;t asleepe, and that thei slepe euerlastynge
sleep, and rise not, seith the
Lord.
40 Y schal lede forth hem, as lambren
to slayn sacrifice, and as wetheris
with kidis. Hou is Sesac takun, and the
noble citee of al erthe is takun?
41 Hou is
Babiloyne made in to wondre among hethene
men?
42 And the see stiede on Babiloyne,
-- --
it was hilid with the multitude of
hise wawis.
43 The citees therof ben maad
in to wondryng, the lond is maad vnhabitable
and forsakun; the lond wherynne
no man dwellith, and the sone of man
schal not passe bi it.
44 And Y schal visite
on Bel in to Babiloyne, and Y schal caste
out of hise mouth that, that he hadde
swolewid, and folkis schulen no more
flowe to it; for also the wal of Babiloyne
schal falle doun.
45 Mi puple, go &yogh;e out fro
the myddis therof, that ech man saue his
soule fro the wraththe of the strong veniaunce
of the Lord;
46 and lest perauenture
&yogh;oure herte wexe neische, and lest &yogh;e
dreden the heryng, that schal be herd in
the lond; and heryng schal come in a &yogh;eer,
and aftir this &yogh;eer schal come heryng and
wickidnesse in the lond, and a lord on a
lord.
47 Therfor lo! daies comen, seith the
Lord, and Y schal visite on the grauun
ymagis of Babiloyne; and al the lond therof
schal be schent, and alle slayn men therof
schulen falle doun in the myddis therof.
48 And heuenes, and erthis, and alle thingis
that ben in tho, schulen herie on Babiloyne;
for rauynours schulen come fro
the north to it, seith the Lord.
49 And
as Babiloyne dide, that slayn men felle
doun in Israel, so of Babiloyne slayn men
schulen falle doun and in al the lond.
50 Come &yogh;e, that fledden the swerd, nyle &yogh;e
stonde; haue &yogh;e mynde afer on the Lord,
and Jerusalem stie on &yogh;oure herte.
51 We
ben schent, for we herden schenschipe;
schame hilide oure faces, for aliens comen
on the halewyng of the hous of the Lord.
52 Therfor lo! daies comen, seith the Lord,
and Y schal visite on the grauun ymagis
of Babiloyne, and in al the lond therof
a woundid man schal loowe.
53 If Babiloyne
stieth in to heuene, and makith stidfast
his strengthe an hi&yogh;, distrieris therof
schulen come on me, seith the Lord.
54 The vois of a criere of Babiloyne, and
greet sorewe of the lond of Caldeis,
55 for
-- --
the Lord distriede Babiloyne, and lost of
it a greet vois; and the wawis of hem
schulen sowne as many watris. The vois
of hem &yogh;af sown,
56 for a rauenour cam on
it, that is, on Babiloyne; and the stronge
men therof ben takun, and the bouwe of
hem welewide, for the stronge vengere
the Lord &yogh;eldynge schal &yogh;elde.
57 And Y
schal make drunkun the princis therof,
and the wise men therof, the duykis therof,
and the magistratis therof, and the
stronge men therof; and thei schulen
slepe euerlastynge sleep, and thei schulen
not be awakid, seith the kyng, the Lord
of oostis is name of hym.
58 The Lord
God of oostis seith these thingis, Thilke
brodeste wal of Babiloyne schal be mynyd
with mynyng, and the hi&yogh;e &yogh;atis therof
schulen be brent with fier; and the trauels
of puples schulen be to nou&yogh;t, and the
trauels of hethene men schulen be in to
fier, and schulen perische.
59 The word
which Jeremye, the profete, comaundide
to Saraie, sone of Nerie, sone of Maasie,
whanne he &yogh;ede with Sedechie, the kyng,
in to Babiloyne, in the fourthe &yogh;eer of his
rewme; forsothe Saraie was prynce of
profesie.
60 And Jeremye wroot al the yuel,
that was to comynge on Babiloyne, in a
book, alle these wordis that weren writun
a&yogh;ens Babiloyne.
61 And Jeremye seide to
Saraie, Whanne thou comest in to Babiloyne,
and seest, and redist alle these
wordis,
62 thou schalt seie, Lord, thou spakist
a&yogh;ens this place, that thou schuldist
leese it, that noon be that dwelle therynne,
fro man `til to beeste, and that it be an
euerlastynge wildirnesse.
63 And whanne
thou hast fillid to rede this book, thou
schalt bynde to it a stoon, and thou schalt
caste it forth in to the myddis of Eufrates;
and thou schalt seie,
64 So Babiloyne
schal be drenchid, and it schal not rise fro
the face of turment, which Y brynge on
it, and it schal be distried. Hidurto ben
the wordis of Jeremye.
-- --
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
