Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. III.
1 It is seid comunli, If a man forsakith
his wijf, and sche go awei fro hym, and
be weddid to an othere hosebonde, whether
he schal turne a&yogh;en more to hir?
whether thilke womman schal not be defoulid,
and maad vncleene? Forsothe
thou hast do fornycacioun with many
-- --
loueris; netheles turne thou a&yogh;en to me,
`seith the Lord, and Y schal resseyue
thee.
2 Reise thin i&yogh;en in to strei&yogh;t, and se,
where thou art not cast doun. Thou hast
setun in weies, abidynge hem as a theef
in wildirnesse, and thou hast defoulid the
erthe in thi fornicaciouns and in thi malices.
3 Wherfor the dropis of reynes weren
forbodun, and no late reyn was. The
forhed of a womman hoore is maad to
thee; thou noldist be aschamed.
4 Nameli
fro this tyme forth clepe thou me, Thou
art my fadir, the ledere of my virginyte.
5 Whether thou schalt be wrooth with
outen ende, ether schalt contynue in to
the ende? Lo! thou hast spoke, and
hast do yuels, and thou were my&yogh;ti. And
for wordis of penaunce thou blasfemydist
bi wordis of pride; and thou fillidist thin
yuel thou&yogh;t, and schewidist thi strengthe
a&yogh;ens thi hosebonde, that thou maist do
that thing that thou tretidist bi word.
6 And the Lord seide to me, in the daies
of Josie, the kyng, Whether thou hast
seyn what thing the aduersarie, Israel,
hath do? Sche &yogh;ede to hir silf on ech
hi&yogh; hil, and vndur ech tre ful of boowis,
and dide fornycacioun there.
7 And Y
seide, whanne sche hadde do alle these
thingis, Turne thou a&yogh;en to me; and sche
turnede not a&yogh;en. And hir sistir, Juda,
brekere of the lawe,
8 si&yogh;, that for the aduersarie,
Israel, dide auowtrie, Y hadde left
hir, and Y hadde &yogh;oue to hir a libel of
forsakyng; and Juda, hir sistir, brekere
of the lawe, dredde not, but also sche
&yogh;ede, and dide fornycacioun.
9 And bi li&yogh;tnesse
of hir fornicacioun sche defoulide
the erthe, and dide auowtrie with a stoon,
and with a tree.
10 And in alle these thingis
hir sistir, Juda, brekere of the lawe, turnede
not a&yogh;en to me, in al hir herte, but in
a leesyng, seith the Lord God.
11 And the
Lord seide to me, The aduersarie, Israel,
hath iustified hir soule, in comparisoun of
-- --
Juda, brekere of the lawe.
12 Go thou, and
crye these wordis a&yogh;ens the north; and
thou schalt seie, Thou aduersarie, Israel,
turne a&yogh;en, seith the Lord, and Y schal
not turne awei my face fro &yogh;ou; for Y am
hooli, seith the Lord, and Y schal not be
wrooth with outen ende.
13 Netheles knowe
thou thi wickidnesse; for thou hast trespassid
a&yogh;ens thi Lord God, and thou hast
spred abrood thi weies to aliens vndur
ech tre ful of bowis; and thou herdist not
my vois, seith the Lord.
14 Be &yogh;e conuertid,
sones, turnynge a&yogh;en, seith the Lord, for
Y am &yogh;oure hosebonde; and Y schal take
&yogh;ou oon of a citee, and tweyne of a kynrede,
and Y schal lede &yogh;ou in to Sion;
15 and Y schal &yogh;yue to &yogh;ou scheepherdis
after myn herte, and thei schulen feede
&yogh;ou with kunnyng and teching.
16 And
whanne &yogh;e schulen be multiplied, and encreesse
in the lond, in tho daies, seith the
Lord, thei schulen no more seie, The arke
of testament of the Lord; nether it schal
stie on the herte, nether thei schulen
thenke on it, nether it schal be visitid,
nether it schal be ferthere.
17 In that tyme
thei schulen clepe Jerusalem The seete of
the Lord, and alle hethene men schulen
be gaderid togidere to it, in the name of
the Lord, in Jerusalem; and thei schulen
not go aftir the schrewidnesse of her
worste herte.
18 In tho daies the hous of
Juda schal go to the hous of Israel; and
thei schulen come togidere fro the lond of
the north to the lond which Y &yogh;af to
&yogh;oure fadris.
19 Forsothe Y seide, Hou schal
Y sette thee among sones, and schal &yogh;yue
to thee a desirable lond, a ful cleer eritage
of the oostis of hethene men? And Y
seide, Thou schalt clepe me fadir, and
thou schalt not ceesse to entre aftir me.
20 But as if a womman dispisith hir louyere,
so the hous of Israel dispiside me, seith
the Lord.
21 A vois is herd in weies, the
weping and &yogh;ellyng of the sones of Israel;
for thei maden wickid her weie, thei for&yogh;aten
-- --
her Lord God.
22 Be &yogh;e conuertid,
sones, turnynge a&yogh;en, and Y schal heele
&yogh;oure turnyngis awei. Lo! we comen to
thee; for thou art oure Lord God.
23 Verili
litil hillis weren lieris, the multitude of
mounteyns was fals; verili in oure Lord
God is the helthe of Israel.
24 Schenschipe
eete the trauel of oure fadris, fro oure
&yogh;ongthe; schenschipe eet the flockis of
hem, and the droues of hem, the sones of
hem, and the dou&yogh;tris of hem.
25 We schulen
slepe in oure schenschipe, and oure
sclaundir schal hile vs; for we synneden
to oure Lord God, bothe we and oure fadris,
fro oure &yogh;ongthe `til to this dai; and
we herden not the vois of oure Lord God.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
