Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. VI.
1 Forsothe Noe whanne he was of fyue
hundrid &yogh;eer gendride Sem, Cham, and Jafeth.
And whanne men bigunnen to be
multiplied on erthe, and hadden gendrid
dou&yogh;tris,
2 the sones of God sei&yogh;en the dou&yogh;tris
of men that thei weren faire, and
token wyues to hem of alle whiche thei
hadden chose.
3 And God seide, My spirit
schal not dwelle in man with outen ende,
for he is fleisch; and the daies of hym
schulen be an hundrid and twenti &yogh;eer.
4 Sotheli giauntis weren on erthe in tho
daies, forsothe aftir that the sones of God
entriden to the dou&yogh;tris of men, and tho
dou&yogh;tris gendriden; these weren my&yogh;ti of
the world and famouse men.
5 Sotheli God
sei&yogh; that myche malice of men was in
erthe, and that al the thou&yogh;t of herte was
ententif to yuel in al tyme,
6 and repentide
him note that he hadde maad man in erthe;
and God was war bifore a&yogh;ens tyme to
comyng, and was touchid with sorewe of
herte note with ynne;
7 and seide, Y schal do
awei man, whom Y made of nou&yogh;t, fro the
face of the erthe, fro man til to lyuynge
thingis, fro crepynge beeste til to the
briddis of heuene; for it repentith me
that Y made hem.
8 Forsothe Noe foond
grace bifore the Lord.
9 These ben the generaciouns
of Noe. Noe was a iust man
and perfit in hise generaciouns; Noe &yogh;ede
with God,
10 and gendride thre sones, Sem,
Cam, and Jafeth.
11 Forsothe the erthe was
corrupt bifore God, and was fillid with
wickidnes.
12 And whanne God sei&yogh;, that
the erthe was corrupt, for ech fleisch
ether man hadde corrupt his weie on
erthe,
13 he seide to Noe, The ende of al
fleisch is comen bifore me; the erthe is
fillid with wickidnesse of the face of hem,
and Y schal distrye hem with the erthe.
14 Make thou to thee a schip of trees hewun
and planed; thou schalt make dwellynge
-- --
placis in the schip, and thou schalt anoynte
it with pitche with ynne and with outforth.
15 And so thou schalt make it. The
lengthe of the schip schal be of thre hundrid
cubitis, the brede schal be of fifti
cubitis, and the hi&yogh;nesse therof schal be
of thretti cubitis.
16 Thou schalt make a
wyndow in the schip, and thou schalt
ende the hi&yogh;nesse therof in a cubite; sotheli
thou schalt sette the dore of the
schip in the side binethe; thou shalt make
soleris and placis of thre chaumbris in the
schip.
17 Lo! Y schal brynge `watris of diluuye
ether greet flood on erthe, and
Y schal sle ech fleisch in which is the spirit
of lijf vndir heuene, and alle thingis
that ben in erthe, schulen be wastid.
18 And
Y schal sette my couenaunt of pees with
thee; and thou schalt entre in to the
schip, and thy sones, and thi wijf, and the
wiues of thi sones schulen entre with thee.
19 And of alle lyuynge beestis of al fleisch
thou schalt brynge in to the schip tweyne
and tweyne, of male kynde and female,
that thei lyue with thee;
20 of briddis bi her
kynde, and of werk beestis in her kynde,
and of ech crepynge beeste of erthe, by
her kynde; tweyne and tweyne of alle
schulen entre with thee, that thei moun
lyue.
21 Therfore thou schalt take with thee
of alle metis that moun be etun, and thou
schalt bere to gidre at thee, and tho schulen
be as well to thee as to the beestis in to
mete.
22 Therfor Noe dide alle thingis whiche
God comaundide to hym.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
