Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. XX.
1 Abraham &yogh;ede forth fro thennus in to
the lond of the south, and dwellide bitwixe
Cades and Sur, and was a pilgrym in
Geraris;
2 and he seide of Sare, his wijf,
Sche is my sistir. Therfor Abymalec,
kyng of Gerare, sente, and took hir.
3 Sotheli God cam to Abymalec bi a sweuene
in the ny&yogh;t, and seide to hym, Lo! thou
schalt die, for the wooman which thou
hast take, for sche hath an hosebond.
4 Forsothe
Abymalech touchide not hir; and
he seide, Lord, whether thou schalt sle
folc vnkunnynge and iust?
5 Whether he
seide not to me, Sche is my sistir, and sche
seide, He is my brother? In the symplenesse
of myn herte, and in the clennesse
of myn hondis Y dide this.
6 And the
Lord seide to hym, And Y woot that thou
didist bi symple herte, and therfor Y kepte
thee, lest thou didist synne a&yogh;ens me, and
I suffride not that thou touchidist hir;
7 now therfor &yogh;elde thou the wijf to hir
hosebonde, for he is a profete; and he
schal preye for thee, and thou schalt lyue;
sotheli if thou nylte &yogh;elde, wite thou that
thou schalt die bi deeth, thou and alle
thingis that ben thine.
8 And anoon Abynalech
roos bi ny&yogh;t, and clepide alle his
seruauntis, and spak alle these wordis in
the eeris of hem; and alle men dredden
greetli.
9 Sotheli Abymalec clepide also
Abraham, and seide to hym, What hast
thou do to vs? what synneden we a&yogh;ens
thee, for thou hast brou&yogh;t in on me and
on my rewme a greuouse synne? thou
hast do to vs whiche thingis thou ou&yogh;tist
not do.
10 And eft Abimalech axide, and
seide, What thing sei&yogh;ist thou, that thou
woldist do this?
11 Abraham answerde, Y
thou&yogh;te with me, and seide, in hap the
drede of God is not in this place; and thei
schulen sle me for my wijf;
12 in other maner
forsothe and sche is my sister verili,
the dou&yogh;ter of my fadir, and not the dou&yogh;ter
of my moder; and Y weddide hir in
-- --
to wijf;
13 sotheli aftir that God ladde me
out of the hous of my fadir, Y seide to hir,
Thou schalt do this mercy with me in ech
place to which we schulen entre; thou
schalt seie, that Y am thi brother.
14 Therfore
Abymelech took scheep, and oxun, and
seruauntis, and handmaydenes, and &yogh;af to
Abraham; and he &yogh;eldide to him Sare, `his
wijf, and seide, The lond is bifor &yogh;ou;
15
dwelle thou, where euere it plesith thee.
Forsothe Abymelech seide to Sare, Lo!
16 Y
&yogh;af a thousand platis of siluer to thi brother;
this schal be to thee in to hiling of
i&yogh;en to al men that ben with thee; and
whider euere thou goist, haue thou mynde
that thou art takun.
17 Sotheli for Abraham
preiede, God curide Abymelech, and his
wijf, and handmaydens, and thei childiden;
18 for God hadde closid ech wombe of
the hows of Abymelech, for Sare, the wijf
of Abraham.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
