Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. XL.
1 My puple, be &yogh;e coumfortid, be &yogh;e coumfortid,
seith &yogh;oure Lord God.
2 Speke &yogh;e to
the herte of Jerusalem, and clepe &yogh;e it,
for the malice therof is fillid, the wickidnesse
therof is for&yogh;ouun; it hath resseyued
of the hond of the Lord double thingis for
alle hise synnes.
3 The vois of a crier in
desert, Make &yogh;e redi the weie of the
Lord, make &yogh;e ri&yogh;tful the pathis of oure
God in wildirnesse.
4 Ech valey schal be
enhaunsid, and ech mounteyn and litil hil
schal be maad low; and schrewid thingis
schulen be in to strei&yogh;t thingis, and scharpe
thingis schulen be in to pleyn weies.
5 And
the glorie of the Lord schal be schewid,
and ech man schal se togidere, that the
mouth of the Lord hath spoke.
6 The vois
of God, seiynge, Crie thou. And Y seide,
What schal Y crie? Ech fleisch is hei,
and al the glorie therof is as the flour of
the feeld.
7 The hei is dried vp, and the flour
felle doun, for the spirit of the Lord bleew
therynne.
8 Verely the puple is hey; the hey
is dried vp, and the flour felle doun; but the
word of the Lord dwellith with outen ende.
9 Thou that prechist to Sion, stie on an hi&yogh;
hil; thou that prechist to Jerusalem, enhaunse
thi vois in strengthe; enhaunse thou,
nyle thou drede; seie thou to the citees of
Juda, Lo! &yogh;oure God.
10 Lo! the Lord God
schal come in strengthe, and his arm schal
holde lordschipe; lo! his mede is with hym,
and his werk is bifore hym.
11 As a scheepherd
-- --
he schal fede his flok, he schal gadere
lambreen in his arm, and he schal
reise in his bosom; he schal bere scheep
`with lomb.
12 Who mat watris in a fist,
and peiside heuenes with a spanne? Who
peiside the heuynesse of the erthe with
thre fyngris, and weide mounteyns in a
weihe, and litle hillis in a balaunce?
13 Who
helpide the Spirit of the Lord, ether who
was his councelour, and schewide to hym?
14 With whom took he councel, and who
lernyde hym, and tau&yogh;te hym the path of
ri&yogh;tfulnesse, and lernyde hym in kunnyng,
and schewyde to him the weie of prudence?
15 Lo! folkis ben as a drope of a
boket, and ben arettid as the tunge of a
balaunce; lo!
16 ylis ben as a litil dust, and
the Liban schal not suffice to brenne his
sacrifice, and the beestis therof schulen
not suffice to brent sacrifice.
17 Alle folkis
ben so bifore hym, as if thei ben not; and
thei ben rettid as no thing and veyn thing
to hym.
18 To whom therfor maden &yogh;e God
lijk? ether what ymage schulen &yogh;e sette to
hym?
19 Whether a smyth schal welle togidere
an ymage, ether a gold smyth schal
figure it in gold, and a worchere in siluer
schal di&yogh;te it with platis of siluer?
20 A
wijs crafti man chees a strong tre, and
vnable to be rotun; he sekith how he
schal ordeyne a symylacre, that schal not
be mouyd.
21 Whether &yogh;e witen not? whether
&yogh;e herden not? whether it was not
teld to &yogh;ou fro the begynnynge? whether
&yogh;e vndurstoden not the foundementis of
erthe?
22 Which sittith on the cumpas of
erthe, and the dwelleris therof ben as
locustis; which stretchith forth heuenes
as nou&yogh;t, and spredith abrood tho as a
tabernacle to dwelle.
23 Which &yogh;yueth the
sercheris of priuytees, as if thei be not,
and made the iugis of erthe as a veyn
thing.
24 And sotheli whanne the stok of
hem is nether plauntid, nether is sowun,
-- --
nether is rootid in erthe, he bleew sudenli
on hem, and thei drieden vp, and a whirle
wynd schal take hem awei as stobil.
25 And
to what thing `&yogh;e han licned me, and han
maad euene? seith the hooli.
26 Reise &yogh;oure
i&yogh;en an hi&yogh;, and se &yogh;e, who made these
thingis of nou&yogh;t; which ledith out in
noumbre the kni&yogh;thod of tho, and clepith
alle bi name, for the multitude of his
strengthe, and stalworthnesse, and vertu;
nether o residue thing was.
27 Whi seist
thou, Jacob, and spekist thou, Israel, My
weie is hid fro the Lord, and my doom
passide fro my God?
28 Whether thou
knowist not, ether herdist thou not? God,
euerlastynge Lord, that made of nou&yogh;t the
endis of erthe, schal not faile, nether schal
trauele, nether enserchyng of his wisdom
is.
29 That &yogh;yueth vertu to the weeri, and
strengthe to hem that ben not, and multiplieth
stalworthnesse.
30 Children schulen
faile, and schulen trauele, and &yogh;onge men
schulen falle doun in her sikenesse.
31 But
thei that hopen in the Lord, schulen
chaunge strengthe, thei schulen take fetheris
as eglis; thei schulen renne, and
schulen not trauele; thei schulen go, and
schulen not faile.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
