Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. XXXVIII.
1 In tho daies Esechie was sijk `til to
the deth; and Isaie, the profete, the sone
of Amos, entride to hym, and seide to
hym, The Lord seith these thingis, Dispose
thi hous, for thou schalt die, and thou
schalt not lyue.
2 And Esechie turnede his
face to the wal, and preiede the Lord,
and seide, Lord, Y biseche;
3 haue thou
mynde, Y biseche, hou Y &yogh;ede bifore thee
in treuthe, and in perfit herte, and Y dide
that that was good bifore thin i&yogh;en. And
Ezechye wept with greet wepyng.
4 And
the word of the Lord was maad to Isaie,
and seide,
5 Go thou, and seie to Ezechye,
The Lord God of Dauid, thi fadir, seith
-- --
these thingis, I haue herd thi preier, and
Y si&yogh; thi teeris. Lo! Y schal adde on thi
daies fiftene &yogh;eer;
6 and Y schal delyuere
thee and this citee fro the hond of the
kyng of Assiriens, and Y schal defende it.
7 Forsothe this schal be to thee a signe of
the Lord, that the Lord schal do this
word, which he spak.
8 Lo! Y schal make
the schadewe of lynes, bi which it &yogh;ede
doun in the orologie of Achas, in the
sunne, to turne a&yogh;en backward bi ten
lynes. And the sunne turnede a&yogh;en bi ten
lynes, bi degrees bi whiche it hadde go
doun.
9 The scripture of Ezechie, kyng of Juda,
whanne he hadde be sijk, and hadde
rekyuered of his sikenesse.
10 I seide, in the myddil of my daies Y
schal go to the &yogh;atis of helle.
11 Y sou&yogh;te
the residue of my &yogh;eeris; Y seide, Y schal
not se the Lord God in the lond of
lyueris; Y schal no more biholde a man,
and a dwellere of reste.
12 My generacioun
is takun awei, and is foldid togidere fro
me, as the tabernacle of scheepherdis is
foldid togidere. Mi lijf is kit doun as of
a webbe; he kittide doun me, the while Y
was wouun &yogh;it. Fro the morewtid `til to
the euentid thou schalt ende me;
13 Y hopide
til to the morewtid; as a lioun, so he
al to-brak alle my boonys. Fro the morewtid
til to the euentid thou schalt ende me;
as the brid of a swalewe, so Y schal crie;
14
Y schal bithenke as a culuer. Myn i&yogh;en
biholdynge an hi&yogh;, ben maad feble. Lord,
Y suffre violence, answere thou for me;
what schal Y seie,
15 ether what schal answere
to me, whanne `I mysilf haue do?
Y schal bithenke to thee alle my &yogh;eeris, in
the bitternisse of my soule.
16 Lord, if me
lyueth so, and the lijf of my spirit is in
siche thingis, thou schalt chastise me, and
schalt quykene me.
17 Lo! my bitternesse
is moost bittir in pees; forsothe thou hast
delyuered my soule, that it perischide not;
-- --
thou hast caste awey bihynde thi bak alle
my synnes.
18 For not helle schal knowleche
to thee, nethir deth schal herie thee;
thei that goon doun in to the lake, schulen
not abide thi treuthe.
19 A lyuynge man, a
lyuynge man, he schal knouleche to thee,
as and Y to dai; the fadir schal make
knowun thi treuthe to sones.
20 Lord, make
thou me saaf, and we schulen synge oure
salmes in all the daies of oure lijf in the
hous of the Lord.
21 And Ysaie comaundide, that thei schulden
take a gobet of figus, and make a
plaster on the wounde; and it schulde be
heelid.
22 And Ezechie seide, What signe
schal be, that Y schal stie in to the hous of
the Lord?
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
