Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
PSALM LXXI.
1 The title of the oon and seuentithe salm.
`To Salomon.
2 God, &yogh;yue thi doom to the king; and
thi ri&yogh;tfulnesse to the sone of a king. To
deme thi puple in ri&yogh;tfulnesse; and thi
pore men in doom.
3 Mounteyns resseyue
pees to the puple; and litle hillis resseyue
ri&yogh;tfulnesse.
4 He schal deme the pore men
of the puple, and he schal make saaf the
sones of pore men; and he schal make low
the false chalengere.
5 And he schal dwelle
with the sunne, and bifore the moone; in
generacioun and in to generacioun.
6 He
schal come doun as reyn in to a flees; and
as goteris droppinge on the erthe.
7 Ri&yogh;tfulnesse
schal come forth in hise dayes,
and the aboundaunce of pees; til the moone
be takun awei.
8 And he schal be lord fro
the-see `til to the see; and fro the flood
til to the endis of the world.
9 Ethiopiens
schulen falle doun bifore hym; and hise
enemyes schulen licke the erthe.
10 The
kyngis of Tarsis and ilis schulen offre
&yogh;iftis; the kyngis of Arabie and of Saba
schulen brynge &yogh;iftis.
11 And alle kyngis
schulen worschipe hym; alle folkis schulen
serue hym.
12 For he schal delyuer a pore
man fro the mi&yogh;ti; and a pore man to
whom was noon helpere.
13 He schal spare
a pore man and nedi; and he schal make
saaf the soulis of pore men.
14 He schal
a&yogh;en bie the soulis of hem fro vsuris, and
wickidnesse; and the name of hem is
onourable bifor hym.
15 And he schal lyue,
and me schal &yogh;yue to hym of the gold of
Arabie; and thei schulen euere worschipe
of hym, al dai thei schulen blesse hym.
16 Stidefastnesse schal be in the erthe, in the
hi&yogh;este places of mounteyns; the fruyt
therof schal be enhaunsid aboue the Liban;
and thei schulen blosme fro the citee, as
-- --
the hey of erthe doith.
17 His name be
blessid in to worldis; his name dwelle
bifore the sunne. And all the lynagis
of erthe schulen be blessid in hym; alle
folkis schulen magnyfie hym.
18 Blessid be
the Lord God of Israel; which aloone
makith merueiylis.
19 Blessid be the name
of his maieste with outen ende; and al
erthe schal be fillid with his maieste;
be it doon, be it doon.
20 `The preieris of Dauid, the sone of
Ysay, ben endid.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
