Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
PSALM CIV.
The title of the hundrid and fourthe salm.
Alleluya note.
1 Knouleche &yogh;e to the Lord, and inwardli
clepe &yogh;e his name; telle &yogh;e hise werkis
among hethen men.
2 Synge &yogh;e to hym,
and seie &yogh;e salm to him, and telle &yogh;e alle
hise merueylis;
3 be &yogh;e preisid in his hooli
name. The herte of men sekynge the
Lord be glad;
4 seke &yogh;e the Lord, and be
&yogh;e confermed; seke &yogh;e euere his face.
5 Haue &yogh;e mynde on hise merueilis, whiche
he dide; on his grete wondris, and domes
of his mouth.
6 The seed of Abraham, his
seruaunt; the sones of Jacob, his chosun
man.
7 He is oure Lord God; hise domes
ben in al the erthe.
8 He was myndeful
of his testament in to the world; of the
word which he comaundide in to a thousynde
generaciouns.
9 Which he disposide
to Abraham; and of his ooth to Isaac.
10 And he ordeynede it to Jacob in to a
comaundement; and to Israel in to euerlastinge
testament.
11 And he seide, I shal
&yogh;iue to thee the lond of Canaan; the cord
of &yogh;oure eritage.
12 Whanne thei weren in
a litil noumbre; and the comelingis of
hem weren ful fewe.
13 And thei passiden
fro folk in to folk; and fro a rewme in to
another puple.
14 He lefte not a man to
anoye hem; and he chastiside kyngis for
hem.
15 Nile &yogh;e touche my cristis; and nyle
&yogh;e do wickidli among my prophetis.
16 And
God clepide hungir on erthe; and he
wastide al the stidefastnesse of breed.
17 He sente a man bifore hem; Joseph was
seeld in to a seruaunt.
18 Thei maden lowe
hise feet in stockis, irun passide by his
soule; til the word of him cam.
19 The
speche of the Lord enflawmede him;
20 the
king sente and vnbond hym; the prince of
puplis sente and delyuerede him.
21 He
ordeynede him the lord of his hous; and
-- --
the prince of al his possessioun.
22 That he
schulde lerne hise princis as him silf; and
that he schulde teche hise elde men prudence.
23 And Israel entride in to Egipt;
and Jacob was a comeling in the lond of
Cham.
24 And God encreesside his puple
greetli; and made hym stidefast on hise
enemyes.
25 He turnede the herte of hem,
that thei hatiden his puple; and diden gile
a&yogh;ens hise seruauntis.
26 He sent Moises,
his seruaunt; thilke Aaron, whom he chees.
27 He puttide in hem the wordis of hise
myraclis; and of hise grete wondris in the
lond of Cham.
28 He sente derknessis, and
made derk; and he made not bitter hise
wordis.
29 He turnede the watris of hem
in to blood; and he killide the fischis of
hem.
30 And the lond of hem &yogh;af paddoks;
in the priue places of the kyngis of hem.
31 God seide, and a fleische flie cam; and
gnattis in alle the coostis of hem.
32 He
settide her reynes hail; fier brennynge in
the lond of hem.
33 And he smoot the
vynes of hem, and the fige trees of hem;
and al to-brak the tree of the coostis
of hem.
34 He seide, and a locuste cam;
and a bruk of which was noon noumbre.
35 And it eet al the hey in the lond of hem;
and it eet al the fruyt of the lond of hem.
36 And he killide ech the firste gendrid thing
in the lond of hem; the firste fruitis of
alle the trauel of hem.
37 And he ledde out
hem with siluer and gold; and noon was
sijk in the lynagis of hem.
38 Egipt was
glad in the goyng forth of hem; for the
drede of hem lai on Egipcians.
39 He
spredde abrood a cloude, in to the hiling
of hem; and fier, that it schynede to hem
bi ny&yogh;t.
40 Thei axiden, and a curlew cam;
and he fillide hem with the breed of
heuene.
41 He brak a stoon, and watris
flowiden; floodis &yogh;eden forth in the drye
place.
42 For he was myndeful of his hooli
word; which he hadde to Abraham, his
child.
43 And he ledde out his puple in ful
-- --
out ioiyng; and hise chosun men in gladnesse.
44 And he &yogh;af to hem the cuntreis of
hethen men; and thei hadden in possessioun
the trauels of puplis.
45 That thei
kepe hise iustifiyngis; and seke his lawe.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
