Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. II.
1 Therfor whanne these thingis weren
doon, aftir that the indignacioun of kyng
Assuerus was coold note, he bithou&yogh;te of
Vasthi, and what thingis sche hadde do,
ethir what thingis sche suffride.
2 And
the children and the mynystris of the
-- --
kyng seiden to `the kyng, Damyselis,
virgyns `and faire, be sou&yogh;t to the kyng;
and `men ben sent,
3 that schulen biholde
bi alle prouinces damesels faire and virgyns;
and brynge thei hem to the citee
Susa, and bitake thei in to the hows of
wymmen, vndur the hond of Egei, the
onest seruaunt and chast, which is the
souereyn and kepere of the kyngis wymmen;
and take the damesels ournement
of wymmen, and other thingis nedeful to
vsis.
4 And which euer damesele among
alle plesith the i&yogh;en of the kyng, regne
sche for Vasti. The word pleside the
kyng; and he comaundide to be don so,
as thei counceliden.
5 Forsothe a man, a
Jew, was in the citee Susa, Mardoche bi
name, the sone of Jair, sone of Semei,
sone of Cys, of the generacioun of Gemyny;
6 that was translatid fro Jerusalem
in that tyme, wherynne Nabugodonosor,
kyng of Babiloyne, hadde translatid Jechonye,
kyng of Juda;
7 which Mardoche
was the nurschere of Edissa, the dou&yogh;ter
of his brothir, which dou&yogh;tir was clepid
Hester bi anothir name, and sche hadde
lost bothe fadir and modir; sche was
ful fair, and semeli of face; and whanne
hir fadir and modir weren deed, Mardoche
`purchaside hir in to a dou&yogh;tir to hymsilf.
8 And whanne the comaundement of
the kyng was ofte pupplischid, and bi his
comaundement many faire virgyns weren
brou&yogh;t to Susa, and weren bitakun to
Egey, the onest seruaunt and chast, also
Hester among othere damesels was bytakun
to hym, that sche schulde be kept
in the noumbre of wymmen.
9 And sche
pleside hym, and foond grace in his si&yogh;t,
that he hastide the ournement of wymmen,
and bitook to hir her partis, and
-- --
seuene the faireste damesels of the kyngis
hows; and he ournede and araiede bothe
hir and damesels suynge hir feet.
10 And
`sche nolde schewe to hym hir puple
and hir cuntrei; for Mardoche hadde comaundid
to hir, that in al maner sche
schulde be stille of this thing.
11 And he
walkide ech dai bifor the porche of the
dore, in which the chosun virgyns weren
kept, and he dide the cure of the helthe
of Hester, and wolde wite, what bifelde
to hyr.
12 And whanne the tyme of alle
damesels bi ordre was comun, that thei
schulden entre to the kyng, whanne alle
thingis weren fillid that perteyneden to
wymmens atire, the tweluethe monethe
was turned; so oneli that thei weren
anoyntid with oile of `myrte tre bi sixe
monethis, and bi othere sixe monethis
`thei vsiden summe pymentis and swete-smellynge
oynementis.
13 And thei entriden
to the kyng, and what euer thing perteynynge
to ournement thei axiden, thei
token; and thei weren araied as it
pleside hem, and passiden fro the chaumbre
of wymmen to the kyngis bed.
14 And
sche that hadde entrid in the euentid,
&yogh;ede out in the morwetid; and fro thennus
thei weren led forth in to the secounde
housis, that weren vndur the hond of
Sagazi, onest seruaunt and chast, that
was gouernour of the kyngis concubyns note;
and sche hadde not power to go a&yogh;en
more to the kyng, no but the kyng wolde,
`and had comaundid hir to come bi name.
15 Sotheli whanne the tyme was turned
aboute bi ordre, the dai nei&yogh;ede, wherynne
Hester, the dou&yogh;ter of Abiahel, brother
of Mardoche, `whom he hadde purchasid
in to a dou&yogh;ter to hym silf, ou&yogh;te
-- --
entre to the kyng; and sche axide not
wymmenus ournement, but what euer
thingis Egei, the onest seruaunt and chast,
kepere of virgyns, wolde, he &yogh;af these
thingis to hir to ournement; for sche
was ful schapli, and of fairnesse that may
not li&yogh;tli be bileuyd, and sche semyde
graciouse and amyable to the i&yogh;en of alle
men.
16 Therfor sche was lad to the bed
of kyng Assuerus, in the tenthe monethe,
which is clepid Cebeth, in the seuenthe
&yogh;eer of his rewme.
17 And the kyng feruentli
louyde hir more than alle wymmen,
and sche hadde grace and mercy
bifor hym ouer alle wymmen; and he
settide the diademe of rewme `on hir
heed, and he made hir to regne in the
stide of Vasthi.
18 And he comaundide a
ful worschipful feeste to be maad redi to
alle hise princes and seruauntis, for the
ioynyng togidere and the weddyngis of
Hester; and he &yogh;af rest note to alle prouynces,
and &yogh;af &yogh;iftis aftir the worschipful doyng
of a prynce.
19 And whanne virgyns weren
sou&yogh;t also the secounde tyme, and weren
gaderid togidere, Mardochee dwellide at
the &yogh;ate of the kyng.
20 Hester hadde not
&yogh;it schewid hir cuntrei and puple, bi comaundement
of hym; for whi what
euer thing he comaundide, Hester kepte,
and sche dide so alle thingis, as sche was
wont in that tyme, in which he nurschide
hir a litil child.
21 Therfor in that tyme,
wherynne Mardochee dwellide at the
`&yogh;ate of the king, Bagathan and Thares,
twei seruauntis of the kyng, weren
wrothe, `that weren porteris note, and
saten in the first threisfold of the paleis;
and thei wolden rise a&yogh;ens the kyng,
-- --
and sle hym.
22 Which thing was not hid
fro Mardochee, and anoon he telde to
the queen Hester, and sche to the kyng,
bi the name of Mardochee, that hadde
teld the thing to hir.
23 It was sou&yogh;t, and
it was foundun, and ech of hem was
hangid in a iebat; and `it was sent to
storyes, and was bitakun to bookis of
&yogh;eeris, `bifor the kyng.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
