Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. XXV.
1 Forsothe Amasie, `his sone, regnede for
hym; Amasie was of fyue and twenti &yogh;eer,
whanne he bigan to regne, and he regnyde
nyne and twenti &yogh;eer in Jerusalem; the
name of his modir was Joiaden, of Jerusalem.
2 And he dide good in the si&yogh;t of
the Lord, netheles not in perfit herte.
3 And whanne he si&yogh; the empire strengthid
to hym silf, he stranglide the seruauntis,
that killiden the kyng, his fadir;
4 but he
killide not the sones of hem; as it is writun
in the book of the lawe of Moises, where
the Lord comaundide, seiynge, Fadris
schulen not be slayn for the sones, nether
the sones for her fadris; but ech
man schal die in his owne synne.
5 Therfor
Amasie gaderide togidere Juda, and
ordeynede hem bi meynees and tribunes
and centuriouns, in al Juda and Beniamyn;
and he noumbride fro twenti &yogh;eer
and aboue, and he foonde thritti thousynde
of &yogh;onge men, that &yogh;eden out to
batel, and helden spere and scheeld.
6 Also
for mede he hiride of Israel an hundrid
thousynde of stronge men, for an hundrid
talentis of siluer, that thei schulden fi&yogh;te
a&yogh;ens the sones of Edom.
7 Forsothe a
man of God cam to hym, and seide, A!
kyng, the oost of Israel go not out with
thee, for the Lord is not with Israel and
with alle the sones of Effraym;
8 for if
thou gessist that batels stonden in the
my&yogh;t of oost, the Lord schal make thee
to be ouercomun of enemyes, for it is of
God for to helpe, and to turne in to fli&yogh;t.
9 And Amasie seide to the man of God,
What therfor schal be doon of the hundrid
talentis, which Y &yogh;af to the kny&yogh;tis
of Israel? And the man of God answeride
to hym, The Lord hath, wherof he
-- --
may &yogh;elde to thee myche mo thingis
than these.
10 Therfor Amasie departide the
oost that cam to hym fro Effraym, that
it schulde turne a&yogh;en in to his place; and
thei weren wrooth greetli a&yogh;ens Juda, and
turneden a&yogh;en in to her cuntrei.
11 Forsothe
Amasie ledde out tristili his puple,
and &yogh;ede in to the valei of makyngis of
salt, and he killide of the sones of Seir
ten thousynde.
12 And the sones of Juda
token othere ten thousynde of men, and
brou&yogh;ten to the hi&yogh; scarre of summe
stoon; and castiden hem doun fro the
hi&yogh;este in to the pit; whiche alle
braken.
13 And thilke oost whom Amasie
hadde sent a&yogh;en, that it schulde not go
with him to batel, was spred abrood in
the citees of Juda fro Samarie `til to
Betheron; and aftir `that it hadde slayn
thre thousynde, it took awey a greet
preie.
14 And Amasie, after the sleyng of
Idumeis, and after that he hadde brou&yogh;t
the goddis of the sones of Seir, ordeynede
hem `in to goddis to hym silf, and worschipide
hem, and brente encense to hem.
15 Wherfor the Lord was wrooth a&yogh;ens Amasie,
and sente to hym a profete, that seide
to hym, Whi worschipist thou goddis that
`delyueriden not her puple fro thin hond?
16 Whanne the profete spak these thingis,
Amasie answeride to hym, Whether thou
art a counselour of the king? ceesse thou,
lest perauenture Y sle thee. Therfor the
profete &yogh;ede awei, and seide, Y woot, that
the Lord thou&yogh;te to sle thee; for thou
didist this yuel, and ferthermore thou
assentidist not to my counsel.
17 Therfor
Amasie, the king of Juda, whanne he
hadde take a ful yuel counsel, sente to
the kyng of Israel Joas, the sone of Joachaz,
the sone of Hieu, and seide, Come
-- --
thou, se we vs togidere.
18 And he sente
a&yogh;en messangeris, and seide, A `cardue,
ether a tasil, which is in the Liban
sente to the cedre of the Liban, and
seide, &YOGH;yue thi dou&yogh;ter a wijf to my
sone; and lo! beestis that weren in the
wode of the Liban &yogh;eden and defouliden
the cardue.
19 Thou seidist, Y haue smyte
Edom, and therfor thin herte is reysid in
to pride; sitte thou in thin hows; whi
stirist thou yuel a&yogh;ens thee, that thou
falle, and Juda with thee?
20 Amasie nolde
here, for it was the wille of the Lord,
that he schulde be bitakun in to the
hondis of enemyes, for the goddis of
Edom.
21 Therfor Joas, kyng of Israel,
stiede, and thei si&yogh;en hem silf togidere.
Sotheli Amasie, the kyng of Juda, was
in Bethsames of Juda;
22 and Juda felde
doun bifor Israel, and fledde in to his
tabernaclis.
23 Certis the kyng of Israel
took in Bethsames Amasie, the kyng of
Juda, the sone of Joas, sone of Joachaz,
and brou&yogh;te in to Jerusalem; and he
destriede the wallis therof fro the &yogh;ate of
Effraym `til to the &yogh;ate of the corner, bi
foure hundrid cubitis.
24 And be ledde
a&yogh;en in to Samarie al the gold and siluer,
and alle vessels whiche he foond in the
hows of the Lord, and at Obededom, in
the tresouris also of the kyngis hows,
also and the sones of ostagis.
25 Forsothe
Amasie, kyng of Juda, the sone of
Joas, lyuede fiftene &yogh;eer aftir that Joas,
kyng of Israel, the sone of Joachaz,
was deed.
26 Sotheli the residue of the
formere and the laste wordis of Amasie
ben writun in the book of kyngis of Juda
and of Israel.
27 And aftir that he &yogh;ede
-- --
awei fro the Lord, thei settiden to hym
tresouns in Jerusalem; and whanne he
hadde fledde to Lachis, thei senten and
killiden hym there;
28 and thei brou&yogh;ten
a&yogh;en on horsis, and birieden hym with
his fadris in the citee of Dauid.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
