Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. XXI.
1 Also hungur was maad in the lond of
Israel in the daies of Dauid note, bi thre &yogh;eer
contynueli. And Dauid counselide the answere
of the Lord; and the Lord seide,
For Saul, and his hows, and blood, for he
killide men of Gabaon.
2 Therfor whanne
Gabaonytis weren clepid, the kyng seide
to hem; sotheli Gabaonytis ben not of the
sones of Israel, but thei ben the relikys
of Ammorreis; and the sones of Israel
hadden swore to hem, `that is, that thei
schulden not `be slayn note, and Saul wolde
smyte hem for feruent loue, as for the
sones of Israel and of Juda;
3 therfor Dauid
seide to Gabaonytis, What schal Y do
to &yogh;ou, and what schal be &yogh;oure amendis,
that &yogh;e blesse the eritage of the Lord?
4 And Gabaonytis seiden to hym, No questioun
is to vs on gold and siluer, but
a&yogh;ens Saul, and a&yogh;ens his hows; nether we
wolen, that a man of Israel be slayn. To
whiche the kyng seide, What therfor
wolen &yogh;e, that Y do to &yogh;ou?
5 Whiche
seiden to the king, We owen to do awei
so the man, that `al to brak ethir defoulide
vs, and oppresside wickidli, that
not oon sotheli be residue of his generacioun
in alle the coostis of Israel.
6 Seuene
men of hise sones be &yogh;ouun to vs, that we
`crucifie hem to the Lord note in Gabaa of
-- --
Saul, sum tyme the chosun man of the
Lord. And the kyng seide, Y schal &yogh;yue.
7 And the kyng sparide Myphibosech, sone
of Jonathas, sone of Saul, for the ooth of
the Lord, that was bitwixe Dauid and bitwixe
Jonathas, sone of Saul.
8 Therfor
the kyng took twei sones of Respha, dou&yogh;ter
of Ahira, whiche sche childide to Saul,
Armony, and Mysphibosech; and he took
fyue sones note of Mychol, dou&yogh;ter of Saul,
whiche sche gendride to Adriel, sone of
Berzellai, that was of Molaty.
9 And he
&yogh;af hem in to the hondis of Gabaonytis,
whiche crucifieden tho sones in the hil
bifor the Lord; and these seuene felden
slayn togidere in the daies of the firste
rep, whanne the repyng of barli bigan.
10 Forsothe Respha, dou&yogh;tir of Ahia, took
an heire, and `araiede to hir silf a place
aboue the stoon, fro the bigynnyng of
heruest til watir droppide `on hem fro
heuene; and sche suffride not briddis to
tere hem bi dai, nether beestis bi ny&yogh;t.
11 And
tho thingis whiche Respha, secoundarie
wijf of Saul, dou&yogh;tir of Ahia, hadde do,
weren teld to Dauid.
12 And Dauid &yogh;ede, and
took the boonys of Saul, and the boonys
of Jonathas, his sone, of the men of Jabes
of Galaad; that hadden stole tho boonys
fro the street of Bethsan, in which street
the Filisteis hadden hangid hem, whanne
thei hadden slayn Saul in Gelboe.
13 And
Dauid bar out fro thennus the boonys of
Saul, and the boonys of Jonathas, his sone;
and thei gaderiden the boonys of hem
that weren crucified, and birieden tho
with the boonys of Saul and of Jonathas,
his sone, in the lond of Beniamyn, in the
side of the sepulcre of Cys, fadir of Saul.
14 And thei diden al thingis, what euer
thingis the kyng comaundide; and the
Lord dide mercy to the lond aftir these
thingis.
15 Forsothe batel of Filisteis was
-- --
maad eft a&yogh;ens Israel; and Dauid &yogh;ede
doun, and hise seruauntis with hym, and
fou&yogh;ten a&yogh;en Filisteis.
16 Sotheli whanne
Dauid failide, Jesbydenob note, that was of
the kyn of Arapha, that is, of giauntis,
and the yrun of his spere peiside thre
hundrid ouncis, and he was gird with a
newe swerd note, enforside to smyte Dauid.
17 And Abisai, sone of Saruye, was in help
to Dauid; and he smoot and killide the
Filistei. Than the men of Dauid sworen,
and seiden, Now thou schalt not go out
with vs in to batel, lest thou quenche the
lanterne of Israel.
18 Also the secounde batel
was in Gob a&yogh;ens Filisteis; thanne Sobothai
of Osothai smoot Zephi, of the generacioun
of Arapha, of the kyn of giauntis.
19 Also the thridde batel was in Gob a&yogh;ens
Filisteis; in which batel a man &yogh;ouun of
God note, the sone of forest, a broiderer, a
man of Bethleem, smoot Golyath of Geth,
whos `schaft of spere was as a beem of
webbis.
20 The fourthe batel was in Geth;
where ynne was an hi&yogh; man, that hadde
sixe fyngris in the hondis and feet, that
is, foure and twenti; and he was of the
kyn of Arapha;
21 and he blasfemyde Israel;
sotheli Jonathan, sone of Samaa,
brother of Dauid, killide hym.
22 These
foure weren borun of Arapha in Geth,
and thei felden doun in the hond of Dauid,
and of hise seruauntis.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
