Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. X.
1 Forsothe it was doon aftir these thingis,
that Naas, kyng of the sones of Amon, diede;
and Anoon, his sone, regnede for hym. And
Dauid seide,
2 Y schal do mercy with Anon,
the sone of Naas, as his fadir dide mercy
with me. Therfor Dauid sente coumfortynge
hym by hise seruauntis on the deeth
of the fadir. Sotheli whanne the seruauntis
of Dauid hadden come in to the
lond of the sones of Amon,
3 princes of the
sones of Amon seiden to Anon, her lord,
Gessist thou that for the onour of thi fadir
Dauid sente coumfortouris to thee; and
not herfor Dauid sente hise seruauntis to
thee, that he schulde aspie, and enserche
the citee, and distrie it?
4 Therfor Anoon
took the seruauntis of Dauid, and schauyde
half the part of `the beerd of hem, and
he kittide awey the myddil clothis of hem
`til to the buttokis; and lefte hem.
5 And
whanne this was teld to Dauid, he sente
in to the comyng of hem, for the men
weren schent ful vilensly. And Dauid comaundide
to hem, Dwelle &yogh;e in Jerico, til
&yogh;oure beerd wexe, and thanne turne &yogh;e a&yogh;en.
6 Sotheli the sones of Amon sien note, that
thei hadden do wrong to Dauid, and thei
senten, and hiriden bi meede Roob of
Sirye, and Soba of Sirie, twenti thousynde
of foot men, and of kyng Maacha, a
-- --
thousynde men, and of Istob twelue thousynde
of men.
7 And whanne Dauid hadde
herd this, he sent Joab and al the oost
of fi&yogh;teris.
8 Therfor the sones of Amon
&yogh;eden out, and dressiden scheltrun bifor
hem in the entryng of the &yogh;ate. Forsothe
Soba, and Roob of Sirie, and Istob,
and Maacha weren asidis half in the feeld.
9 Therfor Joab si&yogh;, that batel was maad
redi a&yogh;ens hym, bothe euene a&yogh;ens and
bihynde the bak; and he chees to hym silf
of alle the chosun men of Israel, and
ordeynede scheltrun a&yogh;ens Sirus.
10 Forsothe
he bitook to Abisai, his brothir,
the tother part of the puple, which dresside
scheltrun a&yogh;ens the sones of Amon.
11 And Joab seide, If men of Sirie han the
maistrie a&yogh;ens me, thou schalt be to me
in to help; sotheli if the sones of Amon
han the maistrie a&yogh;ens thee, Y schal helpe
thee;
12 be thou a strong man, and fi&yogh;te we
for oure puple, and for the citee of oure
God; forsothe the Lord schal do that,
that is good in his si&yogh;t.
13 Therfor Joab
and his puple that was with hym, bigan
batel a&yogh;ens men of Sirie, whiche fledden
anoon fro his face.
14 Forsothe the sones
of Amon sien, that men of Sirie hadden
fled; and thei fledden also fro the face of
Abisai, and entriden in to the citee; and
Joab turnede a&yogh;en fro the sones of Amon,
and cam in to Jerusalem.
15 Forsothe men
of Sirye sien that thei hadden feld bifor
Israel, and thei weren gaderid to gidere.
16 And Adadezer sente, and ledde out men of
Sirie that weren bi&yogh;ende the flood, and he
brou&yogh;te the oost of hem; sotheli Sobach,
mayster of the chyualrie of Adadezer, was
the prince of hem.
17 And whanne this
was teld to Dauid, he drow togidere al
Israel, and passide Jordan, and cam in
to Helama. And men of Sirie dressiden
scheltrun a&yogh;ens Dauid, and fou&yogh;ten a&yogh;ens
hym.
18 And Sireis fledden fro the face of
-- --
Israel; and Dauid killide of Sireis seuene
hundrid charis, and fourti thousynde of
kny&yogh;tis; and he smoot Sobach, the prince
of chyualrie, which was deed anoon.
19 Forsothe alle kyngis, that weren in the
help of Adadezer, si&yogh;en that thei weren
ouercomun of Israel, and thei maden pees
with Israel, and serueden hem; and Sireis
dredden to &yogh;yue help to the sones of
Amon.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
