Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. IX.
1 Abymalech, the sone of Jeroboal, &yogh;eed
forsothe into Sichem to the britheren of
his moder; and he spak to hem, and to
al the kynrede of the hows of his modir,
seiynge, Spek to alle the men of Sychem,
Whether is it betere to &yogh;ou,
2 that seuenti
-- --
men, alle the sones of Jeroboal, han
lordship of &yogh;ow, other o man be lord to
&yogh;ow? and to gidre bihold &yogh;e, for &yogh;oure
boon and &yogh;oure flesh Y am.
3 And the
britheren of his moder speken of hym to
alle the men of Sichem alle thes wordes;
and thei boweden the herte of hem after
Abymalech, seyinge, Oure brother he is.
4 And thei &yogh;auen to hym seuenti pownde
of siluer of the hethen temple of Baal
Berith; the which hiride to hym of it
nedi men and vagaunt, and thei folweden
hym.
5 And he cam into the hows of his
fader in Ephra, and he slew&yogh; his britheren
the sones of Jeroboal, seuenti men,
vpon o stoon. And Joatham, the sone
of Jeroboal, the leest, abood stil, and is
hid.
6 And alle the men of Sichem, and
al the meynee of the cite of Mello, ben
gedred to gidre, and wenten, and ordeyneden
hem a kyng, Abymalech, biside the
ook that stood in Sichem.
7 The which,
whanne was told to Joatham, he &yogh;ede, and
stood in the cop of the hil of Garysym,
and, arerid vp the voice, cryede, and
seyde, Here &yogh;e me, men of Sichem, so
that God here &yogh;ou.
8 Treese wenten for
to anoynte vpon hem a kyng; and thei
seiden to the olyue, Comaund thou to vs.
9 The whiche answerde, Whethir may Y
forsake my fatnes, the whiche and Goddis
vsen and men, and come, that bitwix
trees Y be auaunsid?
10 And the trees seiden
to the fige tree, Com thou, and tak kyngdom
vpon vs.
11 The which answerde to
hem, Whether may Y forsake my swetnes
and moost swete fruytis, and goo that
bitwix other trees Y be auaunsid?
12 And
the trees speken to the viyn,
13 Com, and
comaunde to vs. The which answerde,
Whether may Y forsake my wyn, that
gladith God and men, and bitwix other
trees be auaunsid?
14 And alle the trees
seiden to the thorn, Com, and comaund
-- --
thow vpon vs.
15 The whiche answerde to
hem, If verreily me kyng &yogh;e han ordeynde
to &yogh;ou, cometh, and vnder my
shadewe restith; forsothe if &yogh;e wolen not,
go out fier fro the thorn, and deuowre
the seedis of Liban.
16 Nowe thanne if
ri&yogh;tly and withouten synne &yogh;e han ordeynde
vpon &yogh;ou a kyng, Abymalech,
and wel han doo with Jeroboal, and with
the hows of hym, and han &yogh;olden while
to his benfeetis, the which fau&yogh;t for &yogh;ou,
and his lijf &yogh;af to peryls,
17 for to delyuer
&yogh;ou fro the hoond of Madian;
18 the whiche
&yogh;e nowe han rysyn a&yogh;ens the hows of my
fader, and han slayn his sones, seuenti
men, upon o stoon, and han ordeynde a
kyng, Abymalech, the sone of the werk
womman of hym, vpon the dwellers of
Sichem, forthi that &yogh;oure brother he be;
19 if thanne ri&yogh;tly and with outen vice &yogh;e
han doo with Jeroboal and the hows of
hym, to day glade &yogh;e in Abymalech, and
he glade in &yogh;ou;
20 forsothe if shrewidli,
fier goo out of hym, and waast the
dwellers of Sichem, and the bur&yogh; toun of
Mello; and go out fier fro the men of
Sichem, and fro the burgh toun of Mello,
and deuowre Abymalech.
21 The whiche
thingis whanne he hadde seid, he flei&yogh;,
and wente into Bereram, and dwelte there,
for drede of Abymalech, his brothir.
22 And Abymalech regnede vpon Yrael thre
&yogh;eer.
23 And God sente the worst spiryte
bitwix Abymalech and the dwellers of
Sichem, the whiche bigunne to wlaat
hym,
24 and the hidows gilt of the slau&yogh;ter
of the seuenti sones of Jeroboal, and the
shedynge of blod of hem, to &yogh;eelde into
Abymalech, his brothir, and into the
tother princis of Sichemytis, that hym
helpeden.
25 And thei puttiden aspies
a&yogh;ens hym in the cop of hillis; and while
-- --
thei biden the comynge of hym, thei
hawntiden theftis, takynge prayes of the
goers byside; and it is told to Abymalech.
26 Forsothe Gaal, the sone of Obed,
with his bretheren cam, and passide into
Siccymam; at whos comynge reryd the
dwellers of Sichem,
27 wenten out into
feeldis, wastynge vynes, and grapis tredynge;
and the querys maad of syngers
thei wenten into the temple of her God,
and bytwix meetis and drynkis thei curseden
to Abymalech,
28 criynge Gaal, the
sone of Obed, Who is this Abymalech?
And what is Sichem, that we seruen to
hym? Whether is not he the sone of Jeroboal,
and set a prince, Zebul his seruaunt,
vpon the men of Emor, the fader of Sichem?
Whi thanne shulen we serue to
hym?
29 Wolde God eny man &yogh;eue this
puple vnder myn hoond, and I shulde
doo a wey fro the mydil Abymalech. And
it is seid to Abymalech, Gedre a multitude
of oost, and com.
30 Forsothe Zebul,
the prince of the cytee, herd the wordis
of Gaal, the sone of Obed, is ful wrooth;
and sente preueli to Abymalech messagers,
31
seiynge, Loo! Gaal, the sone of
Obed, cam into Siccymam with his britheren,
`and a&yogh;en fi&yogh;tith the citee a&yogh;ens
thee;
32 aryse also the ny&yogh;t with the puple,
that is with thee, and lurk in the feeld;
and first eerli rysynge the sunne,
33 fal vpon
the cite; forsothe hym goynge out a&yogh;ens
thee with his puple, do to hym that thow
mayst.
34 And so Abymalech with al his
oost roos the ny&yogh;t, and sette bushementis
biside Siccymam, in foure placis.
35 And
Gaal, the sone of Obed, wente out, and
stood in the entre of the &yogh;ate of the cytee.
Forsothe Abymalech roos, and al the oost
with hym, fro the place of the busshementis.
36 And whanne Gaal hadde seen
the puple, he seide to Zebul, Loo! fro
-- --
the hillis a multitude descendith. To
whom he answerde, The shadewis of hillis
thow seest as mennus heedis, and by this
errour thou art desseyued.
37 And eft Gaal
seith, Loo! the puple fro the nouel of the
erthe cometh doun, and o cumpanye commeth
bi the weye that biholdith the ook.
38 To whom seide Zebul, Where is nowe
thi mowth, bi the which thou speek, Who
is Abymalech, that we seruen to hym?
Whether is not this the puple, whom
thow despisedist? Go out, and fi&yogh;t a&yogh;ens
hym.
39 Gaal thanne wente, abydynge the
puple of Sichemys, and fau&yogh;te a&yogh;ens Abymalech.
40 The which pursuede hym fleynge,
and in the cytee threste; and there
fellen of the parti of hym many vnto the
&yogh;ate of the cyte.
41 And Abymalech sat in
Rana; Zebul forsothe Gaal and his felaws
he putte out of the cyte, ne in it
he suffrede to dwelle.
42 Thanne the day
folowynge the puple &yogh;ede out into the
feeld; the which whanne it was toold to
Abymalech,
43 he took his oost, and dyuydide
in thre companyes, settynge
busshementis in the feeldis; and seynge
that the puple wente out of the cytee, he
roos,
44 and felle into hem with his oost,
a&yogh;enfi&yogh;tynge and biseegynge the cytee.
Forsothe two companyes, opynly rennynge
hidir and thidir bi the feeld, the
aduersaryes pursueden.
45 Forsothe Abymalech
al that day ouercam the cytee,
the which he took, slayn the dwellers of
it, and it destruyede, so that salt in it
he sprengide.
46 The which thing, whanne
hadden herd thei that dwelten in the
tour of Sychemys, wenten into the temple
of her god Beryth, where a boond of pees
with hym thei couenauntiden; and of it
the place took name, the which was
greetli strengthid.
47 And Abymalech herynge
-- --
the men of the tour of Sichemys
togidre gedred in o glob, `or company,
48 stiede vp into the hil of Selmon with al
his puple; and takun to an axe he kytte
of a braunche of a tree, and putte on the
shuldir berynge, he seide to felawis, That
&yogh;e seen me doo, that anoon doo &yogh;e.
49 Thanne stryuyngly of the trees kuttynge
of braunchis thei foleweden the
duyk; the whiche enuyrounynge the
place of socour, brenten vp; and so is
doon, that thur&yogh; smook and fier a thowsand
men weren slayn, men togidre and
wymmen, of the dwellers of the tour of
Sichem.
50 Forsothe Abymalech thens goynge
cam to the burgh toun Thebes, the
which enuyrounnynge bisegide with oost.
51 Forsothe the tour was hi&yogh;e in the mydil
cytee, to the which flowen togidre men
and wymmen, and alle the princis of the
cytee, closid moost fastly the &yogh;ate; and
vpon the roof of the tour stondynge by
the pynnaclis.
52 And Abymalech comynge
ny&yogh; biside the tour fau&yogh;t strongli, and
nei&yogh;ynge to the dore, he was about to
put vndir fyre; and, loo!
53 a womman the
brekynge of a mylnstoon from aboue
throwynge hurtlide to the heed of Abymalech,
and brak his brayn.
54 The which
clepide anoon his squyer, and seith to
hym, Drawe out thi swerd, and smyte
me, lest perauenture it be seid, that of
a womman I am slayn. The which, fulfillynge
the heest, slew&yogh; him;
55 and him
slayn, alle that with hym weren of Yrael
ben turned a&yogh;en to her seetis.
56 And God
&yogh;eeldide the yuel that Abymalech dide
a&yogh;ens his fader, slayn his seuenti bretheren.
57 And to the Sichemys is &yogh;oldun
that thei wrou&yogh;ten, and is comen vpon
hem the cursynge of Joatham, sone of
Jeroboal.
-- --
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
