Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. VII.
2 And the Lord seide to Gedeon, Myche
is the puple with thee, and lest Yrael
glorie a&yogh;ens me, Madian shal not be taak
into the hoondis of hym, and lest he seye,
Bi my strengthis I am delyuerd.
3 Spek
to the puple, and alle herynge, preche,
Who is feerful and dredy, turne he a&yogh;en.
And there wenten a&yogh;en fro the hil of
Galaad, and ben turned a&yogh;en of the puple
two and twenti thowsand of men;
and onely ten thowsand beden stil.
4 And
the Lord seide to Gedeon, &YOGH;it there is
myche puple; lede hem to the watris,
and there I shal preue hem, and of whom
Y shal seye to thee, that goo with thee,
he goo; whom I shal defende to goo,
he turne a&yogh;en.
5 And whanne the puple
was goon doon to the watris, the Lord
seide to Gedeon, Thilk that with hoond
and with tonge lapen the watris, as
-- --
houndis ben woned to lape, thou shalt
seuere hem aside; forsothe thilk, that
bowiden the knees drynkynge, in that
other paart shulen be.
6 And so was the
noumbre of hem, that with hoond throwynge
to the mouth watris hadden lapid,
thre hundrid men; forsothe al `that other
multitude the knee bowid dronke.
7 And
the Lord seith to Gedeon, In three hundrid
men, that lapiden watris, Y shal
delyuer &yogh;ou, and taak Madian in thin
hoond; forsothe al `that other multitude
be turned a&yogh;en into his place.
8 And so
metis taken for the noumbre, and trompis,
al `that othir multitude he comaundide
to goon to her tabernaclis; and
he, with thre hundrid men, &yogh;af hym silf
to the bateil. Forsothe the tentis of Madian
weren vndur in the valey.
9 The
same ny&yogh;t the Lord seide to hym, Rise,
and go doun into the tentis, for Y haue
taak hem in thin hoond;
10 forsothe if alone
thou dredist to goo, go doun with thee
Phara, thi child.
11 And whanne thou herist
what thei speken, thanne thin hoondis
shulen be coumfortid, and sikerer thou
shalt goo doun to the tentis of the enemyes.
Thanne descendide he, and Phara,
his child, into a paart of the tentis, where
weren the watchis of armed men.
12 Forsothe
Madian, and Amalech, and alle the
este puplis shed layen in the valey, as
multitude of locustis; forsothe camels vnnoumbrable
there weren, as grauel that
lieth in the brenk of the see.
13 And whanne
Gedeon was comen, a man tolde a sweuen
to his nei&yogh;bore, and in this maner he
toolde that he saw&yogh;, Y saw&yogh; a sweuen,
and it seemed to me, as a loof of barlich
maad vndir asshen to be trendlid, and
into the tentis of Madyan to goo doun;
and whanne it were comyn to the tabernacle,
it smoot it, and turnede vpsedoun,
-- --
and al doun to the erthe euenede.
14 He,
to whom he spak, answerde, This is noon
othere thing, but the swerd of Gedeon,
sone of Joas, a man of Irael; forsothe
the Lord hath takun into the hoondis of
hym Madian and alle the tentis of it.
15 And whanne Gedeon hadde herd the
sweuen, and the remenynge of it, he
heryede, and, turned a&yogh;en to the tentis of
Yrael, seith, Ryse &yogh;e; forsothe the Lord
hath takun into oure hoondis the tentis
of Madian.
16 And he dyuydide the thre
hundrid men in thre parties, and he &yogh;af
trompis in the hoondis of hem, and voyd
wyn pottys, and laumpis in the myddis
of the pottis.
17 And he seide to hem,
What &yogh;e seen me doon, that doo &yogh;e; Y
shall goo into a paart of the tentis, and
what Y shal doo, folwith.
18 Whanne the
trompe fulsowneth in myn hoond, forsothe
&yogh;e bi the enuyroun of the tentis
trompith, and crieth to gidre, To the Lord
and to Gedeon.
19 And Gedeon wente in,
and thre hundred men that weren with
hym, into a part of the tentis, bigynnynge
the watchis of the mydny&yogh;t; and,
the kepers reryd, thei bigunnen with
trompis to cryen, and clappen togidre
bitwix hem seluen the wyn pottis.
20 And
whanne bi enuyroun of the tentis in thre
placis thei fulsowneden, and the stenys
hadden broken, thei heelden with the
left hoondis the laumpis, and with the
ri&yogh;t the sownynge trompis; and thei crieden,
The swerd of the Lord and of
Gedeon;
21 stondynge eche in his place, by
enuyroun of the enemyes tentis. And
so alle the tentis ben disturblid; and
criynge out and &yogh;ellynge, flowen;
22 and
neuerthelater the thre hundryd men
stoden to stedfastli, sownynge with trompis.
And the Lord sente yn swerd in alle
-- --
the tentis, and thei kutten of hem seluen
bi sleynge echon other,
23 fleynge into Bethsaka,
and bi the cop of the brenke, fro
Elmonla into Thebbath. The men of
Irael forsothe criynge togidre, of Neptalym,
and Aser, and al Manasse, `pursueden
Madian; and the Lord &yogh;af to
the puple of Yrael victory in that day.
24 And Gedeon sente messangers into al the
hil of Effraym, seiynge, Comith doun
into a&yogh;en metynge of Madian, and occupieth
the watres vnto Bethhem and Jordan.
And al Effraym criede, and forn
occupiede the watres and Jordan vnto
Bethhara.
25 And two men of Madian
takun, Oreb and Zeb, he slow&yogh;; Oreb in
the stoon of Oreb, forsothe Zeb in the
pressynge place of Zeb; and thei pursueden
Madian, the heedys of Oreb and
of Zeb berynge to Gedeon, ouer the
floodis of Jordan.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
