Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXI.
1 The sones forsothe of Yrael hadden
sworn in Maspha, and seiden, Noon of vs
shal &yogh;yue to the sones of Beniamyn of
his dou&yogh;tris a wijf.
2 And alle thei camen
to the hows of God in Sylo, and in the
si&yogh;t of hym sittynge vnto euen thei rereden
-- --
a voys, and with greet &yogh;eelynge bigunnen
to wepe,
3 seiynge, Whi, Lord God
of Yrael, this yuel ys doo in thi puple,
that this day o lynage be doon awei fro
vs?
4 Forsothe the tothir day eerli rysynge
thei maden vp an auter, and offreden
there brent sacrificis and pesible sleyn
offryngis,
5 and seiden, Who stiede not vp
in the oost of the Lord of alle the lynagis
of Yrael? Forsothe with greet ooth thei
bounden hem seluen, whanne thei weren
in Maspha, hem to be slayn that thennus
weren.
6 And lad by othenkynge the sones
of Yrael vpon her brother Beniamyn, thei
bigunnen to seyn, There is doon awey
o lynage fro Irael;
7 whens shulen thei
taake wyues? forsothe alle in comyn we
han sworn vs not to &yogh;yue oure dou&yogh;tres
to hem.
8 And therfor thei seiden, Who
is of alle the lynagis of Irael, that stiede
not vp to the Lord in to Maspha? And
loo! there ben foundun dwellers of Jabis
Galaad not haue ben in that oost.
9 Forsothe
that tyme, whanne thei weren in
Sylo, noon of hem is foundun there.
10 And
so thei senten ten thousand moost stronge
men, and comaundiden to hem, Goth, and
smitith the dwellers of Jabis Galaad in
mouth of swerd, as wel wymmen as the
litil children of hem.
11 And this shal be,
that &yogh;e shulen kepe wel, alle of maal
kynde and wymmen, that han knowun
men, sleeth; maydens kepe &yogh;e.
12 And
there ben foundun of Jabis Galaad foure
hundryd maydens, that knewen not the
bed of man; and thei brou&yogh;ten hem to
the tentis in Silo, in to the loond of Chanaan.
13 And thei senten messagers to the
sones of Beniamyn, that weren in the
stoon of Remmon; and thei comaundiden
to hem, that thei shulden take hem in
pees.
14 And the sones of Beniamyn camen
-- --
in that tyme, and ben &yogh;euen to hem
wyues of the dou&yogh;tres of Jabis Galaad;
forsothe other thei founden, `the whiche
lijk maner thei shulden take.
15 And al
Yrael greetli sorowide, and dide othenkynge
vpon the slau&yogh;ter of o lynage of
Yrael.
16 And the more thurth birth seiden,
What shulen we doo to the tother, that
han take no wyues? Alle the wymmen in
Beniamyn fellen togidre,
17 and with greet
bisynes to vs and myche stodye it is to
puruey, lest o lynage be doon awey fro
Yrael.
18 Oure dou&yogh;tres we mowen not
&yogh;yue to hem, bounden bi ooth and cursynge,
in the which we han seide, Cursid
that shal &yogh;yue of his dou&yogh;tris a wijf to
Beniamyn.
19 And thei token counseil, and
seiden, Loo, the solempnete of the Lord
is in Silo, torn aboute bi the &yogh;eer, that
is set at the north of the cytee of Bethel,
and at the eest coost of the weye that
goth fro Bethel to Siccymam, and to the
south of the bur&yogh; toun of Lebona.
20 And
thei comaundiden to the sones of Beniamyn,
and seiden, Goth, and lurkith in
the vynes;
21 and whan &yogh;e seen the dou&yogh;tris
of Sylo at the dauncis to be lad aftir
the maner to goo forth, goth out sodeynly
out of the vines, and takith hem,
eche sondry wyues, and goth into the
loond of Beniamyn.
22 And whanne the
faders of hem and britheren comen, and
a&yogh;ens &yogh;ou bigynnen to pleyne and chiden,
we shulen seye to hem, Hath mercy on
hem; forsothe thei rauysheden not hem
bi lawe of fi&yogh;ters and of ouercomers; but
to hem preyinge, that thei my&yogh;ten take,
&yogh;e han not &yogh;euen; and on &yogh;oure parti is
the synne.
23 And the sones of Beniamyn
diden as to hem was comaundid, and
after her noumbre thei rauyssheden to
hem, of hem that ladden dauncis, sondry
-- --
wyues. And thei wenten into her possessioun,
bildynge vp cytees, and dwellynge
in hem.
24 Forsothe the sones of
Yrael turneden a&yogh;en, bi lynagis and meynees,
into her tabernaclis. In tho days
was no kyng in Yrael, but ech on that
to hym semyde ry&yogh;t, that dide he.
Here endith the book of Judicum,
and nowe bigynneth the book of Ruth.
-- --
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
