Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXXII.
1 Here &yogh;e, heuens, thingis that Y speke;
here the erthe the wordis of my mouth.
2 To gidre sprynge in reyn my loore;
flowe as dewe my speche, as wedre vpon
erbe, and as dropes vpon cornes.
3 For
the name of the Lord I shal inwardly
cleep; &yogh;eueth huge doynge to oure God.
4 Of God perfit ben the werkys, and alle
his weyes domes; a trewe God, and with
outen eny wickidnes, ry&yogh;twis and euen.
5 Thei han synned to hym, and not his
sones in filthis; shrewid kynred, and
mysturnyd.
6 Thes thingis a&yogh;enward &yogh;eeldist
thow not to the Lord, O fole puple
and vnwise? Whether is he not thi fader,
that hath weeldid thee, and maad, and
fourmed thee of nou&yogh;t?
7 Haue mynde of
-- --
olde days, and thenk eche generaciouns;
aske thi fader, and he shal telle to thee,
thi more, and thei shulen seie to thee.
8 Whanne deuydide the hi&yogh;est folkis of
kynde, whanne he seuerde the sones of
Adam, he sette the teermys of puplis
after the noumbre of the sones of Yrael.
9 Part forsothe of the Lord the puple of
hym; Jacob the litil corde of his herytage.
10 He foond hym in a deseert loond,
in place of orrour, and of waast wildernes;
he ladde hym aboute, and tau&yogh;te,
and kept as the apple of his eye.
11 As
an egle forthclepynge his bryddis to flee,
and on hem houynge, he sprade out his
weengis, and took to hym, and beer in
his shuldres.
12 The Lord alone was the
leder of hym, and was not with hym an
alien God.
13 He sette hym on an hi&yogh;e
erthe, that he my&yogh;te ete the fruytis of
feeldes, that he my&yogh;te sowke hony of
the stoon, and oyle of the moost hard
stone;
14 butre of the droue, and mylk of
sheep, with the talw&yogh; of loombs and of
wethers, of the sones of Basan; and
goot with margh of whete, and blood
of grapis my&yogh;te drynk moost cleer.
15 Ful
fat maad is the loued, and a&yogh;en wynsed;
fulfattid, fulgresid, outlargid; he laft
God his maker, and &yogh;eed abak fro God,
his &yogh;yuer of heelth.
16 Thei eggiden him
in alyen goddis, and in abomynaciouns
to wraththe arereden.
17 Thei offriden to
deuels, and not to God, to goddis the
whiche thei knewen not; newe and
fresshe camen, `the whiche heryeden not
-- --
the faders of hem.
18 God that thee gat
thow hast forsaak, and hast for&yogh;et the
Lord thi shaper.
19 The Lord saw&yogh;, and
to wraththe was rerid; for eggiden hym
his sones and dou&yogh;tres.
20 And he seith, Y
schal hyde my face fro hem, and I shal
behold the last thinges of hem; generacioun
forsothe mysturned it is, and vntrewe
sones.
21 Thei han eggid me in hym
that was not God, and han terred in her
vanytees; and I shal egge hem in hym
that is no puple, and in fole folk of
kynde I shal terre hem.
22 Fier is vndurtent
in my woodnes, and it shal brenne
vnto the last thingis of helle; and it shal
deuowre the loond with his buriownynge,
and of hillis the foundementis shulen
brenne.
23 I shal gedre vpon hem yuels,
and myn arewis I shal fulfil in hem.
24 Thei shulen be wastid with hungir, and
briddis shulen deuour hem in biting
moost bitter; teeth of bestis I shal sende
in hem, with woodnes of hem drawinge
on erthe, and crepinge.
25 With out forth
shal waast hem swerd, and with yn forth
dreed; the &yogh;ong togidre and mayden, the
sowkynge with the old man.
26 And I seide,
Where forsothe ben thei? to ceese Y shal
maak fro men the mynde of hem.
27 But
for the wrath of enemyes I lafte for
a while, lest perauenture wolden wexe
prowde the enemyes of hem, and seye,
Oure hi&yogh;e hoond, and not the Lord, hath
doon alle thes thingis.
28 Folk with out
counseil it is, and with out wisdom;
wolde God thei sauerden,
29 and vndurstoden,
and last thingis purueyden.
30 What
maner wise oon pursuede a thowsand,
and two my&yogh;ten dryue ten thowsand?
-- --
Whether not therfore for her God solde
hem, and the Lord closide hem?
31 Forsothe
oure God is not as the goddis of
hem, and oure enemyes ben iugis.
32 Of
the vyn of Sodoms the vyn of hem, and
of the subaarbis of Gomor; the graap of
hem graap of gal, and the cluster moost
bittre.
33 Gal of dragouns the wyne of
hem, and venym of eddres vncurable.
34 Whether ben not thes thingis hid anentis
me, and merkid in my tresours?
35 Myn is
veniaunce, and Y shal &yogh;eeld to hem in
tyme, that the foot of hem slyde; ny&yogh; is
the day of perdicioun, and to be ny&yogh;
hi&yogh;en the tymes.
36 The Lord shal deme
his puple, and in his seruauntis he shal
haue mercy; he shal se that feble be the
hoond, and closid forsothe han faylid, and
the lafte ben wastid.
37 And thei shulen seye,
Where ben the goddis of hem, in whiche
thei hadden trust?
38 Of whos slayn sacrifice
thei eten the fatnesse, and drunken
the wyn of the offryngis of licours,
arise, and helpe thei to &yogh;ow, and in nede
&yogh;ow defende.
39 Seeth that Y am alone,
and there is noon other God saue me; I
shal slee, and I shal maak to lyue; Y shal
smyte, and I shal heel; and there is not
that fro myn hoond may delyuer.
40 I
shal heue vp to heuene myn hoond, and
Y shal seye, I lyue with outen eende.
41 If
I whette as leit my swerd, and myn
hoond taak doom, Y shal &yogh;eeld vengynge
to myn enemyes, and to hem that hatiden
me, I shal quite.
42 I shal drenche myn
arewis in blood, and my swerd shal deuour
flesh of the blood of slayn, and of
the chaytifte of the nakid heed of enemyes.
43 Preyse &yogh;e, gentils, the puple of
hym, for the blood of his seruauntis he
shal wreek, and veniaunce he shal quyte
-- --
into the enemyes of hem; and he shal
be merciful to the erthe of his puple.
44 Thanne Moyses cam, and spak alle the
wordis of this songe in the eris of the
puple; and he and Josue, the sone of
Nun.
45 And he fulfillide alle thes wordis,
spekynge to al Yrael;
46 and seide to hem,
Put &yogh;e &yogh;oure hertis into alle the wordys
that I witnesse to &yogh;ow to day, that &yogh;e
comaunden hem to &yogh;oure sones to keep,
and to doo, and to fulfille alle thingis
that ben wryten of this lawe;
47 for not in
veyn thei ben comaundid to &yogh;ow, but that
echon in hem shulde lyue; the which
doynge long tyme &yogh;e abiden in the loond,
to the which to be weeldid, Jordan ouerput,
&yogh;e shulen goon yn.
48 And the Lord
spak to Moises in the same day, seiynge,
Sty vp into this hil Abarym,
49 that is,
passynge, into the hil Nebo, that is in the
loond of Moab, a&yogh;ens Jeryco; and se the
loond of Chanaan, that to be hold I shal
taak to the sones of Yrael, and dye thow
in the hil.
50 The which stiynge vp, thow
shalt be ioyned to thi puplis, as died
Aaron, thi brother, in the hil of Hor,
and was put to his puples.
51 For &yogh;e han
trespassid a&yogh;ens me, in the myddil of the
sones of Yrael, at the Watris of A&yogh;enseiynge,
in Cades of the deseert of Syn;
and &yogh;e halwide not me amonge the sones
of Yrael.
52 A&yogh;enward thow shalt se the
loond, and shalt not goon into it, that I
shal &yogh;yue to the sones of Irael.
-- --
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|