Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXIV.
5 Whanne a man hath taak a wijf laate,
he shal not goo forth to bateyl, ne to
hym eny thing of nede shal be ioyned
opynlich, but he shal taak hede with
outen blame to his hows, that o &yogh;eer he
ioye with his wijf.
6 Thow shalt not taak
in stedde of a wed the nethermore and
ouermore grynstoon, for his lijf he putte
to thee.
7 If a man were taak bisili weytynge
-- --
his brother of the sones of Yrael,
and he solde take the prijs, he shal be
slayn; and thow shalt do awey yuel fro
the myddil of thee.
8 Bisily kepe wel, lest
thow renne into plage of lepre, but thow
shalt doon alle thingis that the prestis
of Leuyte kynde han tau&yogh;t thee, aftir
that Y haue comaundid to hem, and fulfil
bisily.
9 Haue &yogh;e mynde what thingis
the Lord &yogh;oure God dyde to Marye, in
the weye, whanne &yogh;e wenten out of Egipt.
10 Whanne thow shalt a&yogh;en aske of
thi nei&yogh;bour eny thing that he owith to
thee, thow shalt not goon into the hows
of hym for to taak wed;
11 but thow shalt
stoond with out, and he to thee shal
brynge forth that he hath.
12 Forsothe if
he is pore, the wed anentis thee shal not
al ny&yogh;t dwelle,
13 but anoon thow shalt &yogh;eeld
to hym before the goynge down of the
sunne, that he, slepynge in his clothinge,
blesse to thee, and thow haue ry&yogh;twisnes
before the Lord thi God.
14 Thou shalt not
denye the mede of the nedi, and of the pore
thi brother, or of comlynge that dwellith
with thee in thi loond, and with ynne
thi &yogh;atis is;
15 but the same day thow shalt
&yogh;eeld to hym the prijs of his traueyl, before
the sunne goynge down, for he is
pore, and of it susteyneth his lijf; lest
he crye a&yogh;ens thee to the Lord, and be
rettid to thee into synne.
16 Fadrys shulen
not be slayn for the sones, ne sones for
the fadris, but echon for his own synne
shal dye.
17 Thow shalt not peruert the
doom of the comlyng, and faderles child;
ne thow shalt taak awey in stede of a
wed the clooth of the widewe.
18 Haue
mynde that thow hast serued in Egipt,
and the Lord thi God hath delyuered
thee thens; therfor I comaunde to thee
-- --
that thow doo this thing.
19 Whanne thow
repist corn in thi feeld, and a for&yogh;etun
handful thow leeuest, thow shalt not
turn a&yogh;en for to taak it, but the comlynge,
and faderles child, and widewe
thow shalt suffre to bere a wey, that the
Lord thi God blesse to thee in al the
werk of thin hoondis.
20 If thou gedrest
fruytis of olyues, what euere leeue in
the trees, thow shalt not turn a&yogh;en for
to gedre, but thow shalt leeue to the
comlynge, faderles child, and widewe.
21 If
thou kuttist thi vyn from grapis to wyn,
thou shalt not gedre the leeuynge reysens,
but thei shulen falle into the vse of
the comlynge, faderles child, and widewe.
22 Haue mynde that thow seruedist in Egipt,
and therfor Y comaunde to thee,
that thow doo this thing.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
