1   Thes ben the heestes and domes, that &yogh;e owen to doon in the loond that the Lord God is to &yogh;yue to thee, that thow weelde it, alle dayes in the whiche vpon the erthe thow shalt goon. 2   Turne &yogh;e doun alle places in the whiche the gentilis that &yogh;e ben to weelde, heried her goddis, vpon hi&yogh;e mounteyns, and hillis, and vndir al thik braunchid tree. 3   Scatre &yogh;e the auters of hem, and brekith togidre the ymagis; the mawmet wodes brenneth with fier, and the mawmettis destruy &yogh;e; scatre &yogh;e the names of hem fro the places. 4   &YOGH;e shulen not doo so to the Lord &yogh;oure God; 5   but to the place that the Lord &yogh;oure God chesith of alle &yogh;oure lynages, that he putte his name there, and dwelle in it; 6   &yogh;e shulen come, and offre in that place brent sacrificis, and &yogh;oure slayn offryngis, and dymes, and first fruytis of &yogh;oure hoondis, and auowis and &yogh;iftis, the first goten of oxen, and of sheep. 7   And &yogh;e shulen eete there in the si&yogh;t of the Lord &yogh;oure God; and &yogh;e shulen glade in alle thingis, to which putten hoond, &yogh;e and &yogh;oure howses, in the whiche the Lord &yogh;oure God blesse to &yogh;ou. 8   &YOGH;e shulen not doo there that we doon here to day, eche that to hym self semeth ri&yogh;t. 9   Forsothe ne vnto the tyme that is nowe &yogh;e comen to rest and to the possessioun, that the Lord God is to &yogh;eue to &yogh;ow. 10   &YOGH;e shulen passe Jordan, and dwelle in the loond that the Lord &yogh;oure God is to &yogh;yue to &yogh;ow, that &yogh;e resten fro alle enemyes bi enuyroun, and dwellen with outen eny drede. 11   In the place that the Lord &yogh;our

God chesith, that his name be in it. Thidre alle thingis that Y comaunde &yogh;e shulen bere, brent sacrifices, and oostis, and dymes, and first fruytis of &yogh;oure hoondes, and what euer thing cheefe is in &yogh;iftis, that &yogh;e han vowid to the Lord. 12   There &yogh;e shulen eete before the Lord &yogh;oure God, &yogh;e, and sones, and &yogh;oure dou&yogh;tres, men seruauntis, and wymmen seruauntis, and Leuytis, that in &yogh;oure cytees dwellen; forsothe ne thei han other part and possessioun among &yogh;ow. 13   Be war that thou offre not thi brent sacrifices in alle places that thou shalt se, 14   but in it that the Lord shal chese in oon of thi lynagis thow shalt offre oostis, and doo alle thingis that Y comaunde to thee. 15   Forsothe if thow wolt eete, and thee the etynge of flesh delyte, sle, and eete after the blessynge of the Lord thi God, that he hath &yogh;eue to thee in thy cytees, other vnclene it were, that is, wemmed and feble, other cleene, that is, hool and withouten wemme, that is leueful to ben offrid, and as capret and hert thow shalt eete; 16   with outen etynge oonli of the blood, that vpon the erthe as water thow shalt heeld out. 17   Thow shalt not mowe eete in thy burghtownes dimes of whete, of wyn, and of thin oyle, the first geten of droues, and beestis, and alle thingis that thow auowist, and wilfulli wolt offre, and the first fruytis of thin hoondes; 18   but bifore the Lord thi God thow shalt ete hem, in the place that the Lord thi God chesith, thow, and thi sone, and thi dou&yogh;ter, knaue seruaunt, and meyde seruaunt, and the Leuyte that dwellith in thi citees; and thow shalt glade, and be fulfild before the Lord thi God, in alle thingis to the which thou strecchist thin

hoond. 19   Be war that thow forsake not the Leuyte in al tyme, in the which thow dwellist in erthe. 20   Whanne the Lord thi God shal large thi termes, as he hath spoke to thee, and thow wolt ete flesh, that thi soule desireth, 21   forsothe the place that the Lord thi God chesith, that his name be there, if it were ferre, thow shalt slee of the droues, and of thi beestis, `the whiche thow hast, as he hath comaundid to thee; and thow shalt eete in thi bur&yogh;touns, as it plesith to thee. 22   As is etun a capret and an hert, so thow shalt eete hem; and cleene and unclene in comun shulen be ete. 23   That oonli shun, lest thow eete blood; forsothe blood of hem is for the soule, and therfore thow shalt not eete a soule with flesh, 24   but as water thow shalt heeld vpon erthe, 25   that wel it be to thee, and to thi sones after thee, whanne thow dost that plesith in the si&yogh;t of the Lord. 26   And that thow auowist and halowist to the Lord, thow shalt take, and come to the place that the Lord chesith, 27   and offre thin offryngis, flesh and blood, vpon the auter of the Lord thi God; the blood of the oostis thou shalt heelde in the auter, and flesh thi silf shalt eete. 28   Kepe wel and here alle thingis that I comaunde to thee, that it wel be to thee, and to thi sones after thee, into with outen eende, whanne thow dost that is good and plesaunt in the si&yogh;t of the Lord thi God. 29   Whanne the Lord thi God scaterreth before thi face the gentilis, to the whiche to be weeldid thou shalt goon yn, and weelde hem, and dwelle in the loond of hem, 30   be war that thow folwe not hem, after that the comynge yn thei weren vnder turned, and seche the cerymoyns of hem, seiynge, As these gentils heryden her goddis, so and

Y shal hery. 31   Thow shalt not do lijk maner to the Lord thi God; forsothe alle abhomynaciouns that the Lord contrarieth thei han doon to her goddis, offrynge sones, and dow&yogh;tris, and brennynge with the fier. 32   What I comaunde to thee, that thow oonly do to the Lord, ne adde thow eny thing, ne lasse.

Previous section

Next section