1   Sotheli whanne it was don, that we schulden schippe, drawun awey fro hem, strei&yogh;t cours we camen to Choum, and the day suynge to Rodum, and fro thennis to Patiram, `fro thennis into Iram. 2   And whanne we founden a schip passinge ouer into Fenyse, we `sti&yogh;ynge vp, schippeden, `or seiliden. 3   Sothli whanne we

apperiden to Cypre, we leeuynge it at the left half, schipiden into Cyrie, and camen to Tyre. Sotheli there the schip was to puttinge out the charge. 4   Sothli `disciplis foundun, we dwelliden there seuene dayes; the whiche seiden bi spirit to Poul, that he schulde not sti&yogh;e to Jerusalem. 5   And `the dayes fulfillid, we goinge forth wenten, alle men with wyues and fre children ledinge forth vs til to withoute the citee; and `the knees putt in the see brynke, we preieden. 6   And whanne we hadden maad farwel to gidere, we wenten vp into the schip; sothli thei turneden a&yogh;en into her owne thingis. 7   Sothli the schip seiling fulfillid fro Tyre, we dessendiden to Tolomayda, and `the bretheren gret wel, we dwelliden o day at hem. 8   Forsothe an other day we gon forth, camen to Cesarie. And we entringe into the hous of Philip euangelist, that was oon of the seuene, dwelliden at him. 9   Sothli to this weren foure dou&yogh;tris, virgyns, prophesiynge. 10   And whanne we dwelliden there bi sum dayes, sum man prophete, Agabus by name, cam ouer fro Judee. 11   This whanne he cam to vs, took the girdil of Poul, and byndynge to gidere `to him the feet and hondis, seide, The Hooli Gost seith thes thingis, Thus Jewis schulen bynde in Jerusalem the man, whos is this girdil; and thei schulen bitake into hethene mennis hondis. 12   Which thing whanne we herden, we preieden, and thei that weren of that place, that he schulde not sti&yogh;e to Jerusalem. 13   Thanne Poul answeride, and seide, What do &yogh;e, wepinge and turmentynge myn herte? Sothli I am redy, not onli for to be boundun, but and to deie in Jerusalem for the name of the Lord Jhesu. 14   And whanne we my&yogh;ten not councele him, we

weren stille, `or restiden, seyinge, The wille of the Lord be don. 15   Sotheli aftir thes dayes we maad redy, sti&yogh;eden to Jerusalem. 16   Sothli summe of disciplis camen with vs fro Cesarie, ledinge with hem sum man, Jason of Cypre, an old disciple, at whom we schulden be herborid. 17   And whanne we camen to Jerusalem, bretheren resceyueden vs wilfulli. 18   Sothli in the day suynge Poul entride with vs to James, and alle the eldere men ben gederid. 19   Whom whanne he hadde grett, he tolde bi alle thingis, what thingis God hadde don in hethene men, by the mynisterie of him. 20   And thei whanne thei herden, magnifieden God, and seiden to him, Thou, brothir, seest how manye thousandis ben in Jewis, that han bileuyd to God, and alle ben sueris, `or loueris, of the lawe. 21   Sothli thei herden of thee, for thou techist departing fro Moyses of `the ilke Jewis that ben by hethene men, seiynge, that thei oweden not for to circumside her sones, nether owen for to entre vp custom. 22   Therfore what is? Sothli it bihoueth a multitude come to gidere; forsothe thei schulen heere `thee, for to haue come ouer. 23   Therfore do thou this thing, that we seyn to thee. There ben to vs foure men, hauynge a vow on hem. 24   `These takun to, halowe thee with hem; and `coste in hem, that thei schaue her heedis; and alle men wite, that the thingis that thei herden of thee ben false, but thou walkist and thi silf kepinge the lawe. 25   Of these sothli that bileuyden of hethene men, we writen, demynge that thei absteyne hem fro thingis offrid to ydols, and blood, and stranglid thing, and fornicacioun. 26   Thanne `the men takyn to, Poul in the day suynge purified with hem, entride into the temple, schewinge

the fulfilling of dayes of purifiyng, til offring was offrid for ech of hem. 27   Sothli whanne seuene dayes weren endid, the Jewis that weren of Asie, whanne thei sy&yogh;en hym in the temple, stiriden al the peple, and leiden hondis on him, criynge, Men of Israel, helpe &yogh;e vs. 28   This is the man, that a&yogh;ens peple and lawe and this place techinge euery where alle men, more ouer and hath ledd yn hethen men into the temple, and hath defoulid this hooly place. 29   Forsothe thei sy&yogh;en Trophimus of Ephesi in the citee with him, whom thei gessiden for Poul hadde brou&yogh;t into the temple. 30   And al the citee is mouyd, and a rennynge to gidere of peple is maad. And thei `catchinge Poul, drowyn him out of the temple; and anoon the &yogh;atis ben closid. 31   Sothli `hem sekynge for to sle hym, it is toold to the tribune of the cumpanye of kny&yogh;tis, for al Jerusalem is confoundid. 32   The which a noon `kny&yogh;tis takun to, and centuriouns, ran to hem. Whiche whanne thei hadden seyn the tribune and kny&yogh;tis, ceessiden for to smyte Poul. 33   Thanne the tribune `comynge to, kau&yogh;te him, and comaundide for to be boundyn with twey chaynes; and axide, who it was, and what he hadde don. 34   Sothli othere crieden othir thing in the cumpanye. And whanne he my&yogh;te not knowe certeyn thing for the noyse, he comaundide him for to be ledd into the castels. 35   And whanne Poul cam to grees, it bifel that he was born of kny&yogh;tis, for strengthe of the peple. 36   Forsothe multitude of peple suede him, criynge, Take him awey. 37   And whanne Poul bigan for to be ledd in to the castels, he seith to the tribune, If it is leefful to me, for to speke ony thing to thee?

Which seide, Thou `Greek hast thou knowun? 38   Wher thou ert not the Egipcian, the which bifore thes dayes mouedist a noyse, and laddist out into desert foure thousand of men, mensleeris? 39   And Poul seide to him, Sothli I am a man Jew, of Tarse of Cilicie, a citeseyn, `or burgeys, `of a citee not vnknowun. Forsoth I preie thee, suffre me `for to speke to the peple. 40   And whanne he suffride, Poul stondinge in the grees, bekenyde with the hond to the peple. And a greet silence maad, he spak to in Ebrew tunge, seyinge,

Previous section

Next section