Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. VII.
1 Sothli this Melchisedech, kyng of Salem,
the prest of the hi&yogh;este God, the
which mette with Abraham gon a&yogh;en fro
sleynge of kyngis, and blesside him;
2 to
whom and Abraham departide tythes of
alle thingis; first sothli the which is
interpretid kyng of ri&yogh;twysnesse, aftirward
forsothe and kyng of Salem, that is
to seie,
3 kyng of pees, with oute fadir,
with oute modir, with oute genelogie, nethir
hauynge bigynnynge of dayes, nethir
ende of lyf; forsoth he licned to the
sone of God, dwellith prest into withouten
ende.
4 Forsoth biholde &yogh;e hou greet
`is this man, to whom and Abraham
patriark &yogh;af tithes of the beste thingis.
5 And sotheli men takynge presthod of the
sones of Leeuy han maundement for to
take tythes of the peple, vp the lawe,
that is to seye, of her britheren, thou&yogh;
and thei wenten out of the leendis of
Abraham.
6 Forsoth he whos generacioun
is not noumbrid in hem, tooke tithis of
Abraham; and he blesside this Abraham,
the which hadde repromyssiouns.
7 Forsoth
withoute a&yogh;enseyinge, that that is
lesse, is blessid of the betere.
8 And here
sothli men deiynge taken tithis; forsoth
ther `it is witnessid, that he lyueth.
9 And
-- --
that it is so seid, by Abraham, and
Leeuy, that took tithis, is tithid;
10 forsoth
and &yogh;it he was in his fadris leendis,
whanne Melchisedech mette with him.
11 Therfore if endyng was by presthod of
Leeuy, forsothe vndir hym the peple took
the lawe, what &yogh;it was it nedeful, another
prest for to ryse, vp the ordre of
Melchisedech, and not for to be seid vp
the ordre of Aaron?
12 Forsothe the presthod
translatid, it is nede that and
translacioun of lawe be maad.
13 Forsothe
he in whom thes thingis ben seid, is of
another lynage, of the which no man
was prest, `or redy, to the auter.
14 Sothli
it is opynly knowun, that oure Lord
is born of Juda, in which lynage Moyses
spak no thing of prestis.
15 And more &yogh;it
it is knowun, if vp the ordre of Melchisedech
another prest rysith;
16 the which
is not maad vp the lawe of fleischly
maundement, but vp vertu of lyf insolible,
`or that `may not be vndon.
17 Sothli he witnessith, For thou art a prest
into withouten ende, vp the ordre of
Melchisedech;
18 forsoth reprouyng of the
maundement bifore goynge is maad, for
the vnsadnesse and vnprofyt of it.
19 Forsoth
the lawe brou&yogh;te no thing to `perfit
thing, forsoth the bryngyng yn of betere
hope, by which we nei&yogh;en to God.
20 And
hou greet it is, not withoute sweringe;
forsoth othere ben maad prestis with
oute an oth;
21 `forsoth this prest with
an oth, by hym that seide to hym, The
Lord swoor, and it schal not rewe him,
Thou ert a prest into withouten ende,
vp the ordre of Melchisedech;
22 in so
moche Jhesu is maad biheter of the betere
-- --
testament.
23 And sothli othere mo
ben maad prestis vp `the lawe, `for that
that thei weren forbeden by deeth for to
dwelle;
24 forsoth this man, for that he
dwelle into withouten ende, hath euerelastyng
presthod.
25 Wherfore and he may
saue into withouten ende, comynge ny&yogh;
bi hym silf `to God, euermore lyuynge
for to preye for vs.
26 Forsoth it bycaam
that such a man were bischop to vs,
hooly, innosent, inpolute, `or ful clene,
departid fro `synful men, and maad hi&yogh;er
than heuenes;
27 the which hath not nede
ech day, as prestis, first for his owne
giltis for to offre oostis, `or sacrificis,
aftirward for the peple; sothli he dide
this thing, `onys offrynge him silf.
28 Forsoth
the lawe ordeynede men prestis hauynge
sykenesse, `or freelte; forsoth the
word of swering, the which is aftir the
lawe, ordeynede the sone perfyt into
withouten ende.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
