Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. IV.
1 I witnesse, `or preie, or coniure, bifore
God and Crist Jhesu, that `is to demynge
the quyk and deed, by the comynge
of hym, and the kyngdom of him,
preche the word,
2 be thou bisy `couenably
with oute reste, arguwe, `or proue, biseche,
blame in al pacience and doctryn.
3 Forsoth tyme schal be, whanne men
schulen not susteyne, `or suffre, `hool,
or holsum, teching, but at her desyris
thei schulen gadere to gidere maistris
&yogh;itchinge, `or plesynge, to the eeris.
4 And treuly thei schulen turne awey the
heeringe fro treuthe, but to fablis thei
schulen turne to gidere.
5 Forsothe wake
thou, in alle thingis trauele thou, do the
work of euangelist, fulfille thi seruyse,
`or office, be thou sobre.
6 Forsoth I am
-- --
sacrifysid now, and the tyme of my `resolucioun,
or deeth, is ny&yogh;.
7 I haue stryuyn
a good stryf, I haue endid the cours, I
haue kept the feith.
8 In the tothir tyme
a crowne of ri&yogh;twysnesse is kept to me,
the which the Lord `schal &yogh;elde to me in
that day, iust domesman; forsoth not
oonly to me, but `and to these that louen
his comyng. Hi&yogh;e for to come to me
soone.
9 Forsoth Demas `hath forsakyn me,
louynge this world, and wente to Tessalonyk,
Cressens into Galathie,
10 Tyte into
11 Dalmatichy; Luk aloone is with me.
Taak Mark, and lede to with thee; forsoth
he is profitable to me into seruyse.
13 Penulam, `that is, cloth of Romayns,
`or book, which I lefte at Troade
at Carpe, thou comyng bryng with
thee, and the bookis, moost forsothe parchemynus.
14 Alisaundre, the tresorer,
schewide to me manye `yuele thingis;
the Lord schal &yogh;elde to hym vp his
workis.
15 Whom and thou eschewe; `ful
greetli forsoth he a&yogh;enstood my wordis.
16 In my firste defence no man `was to me,
but alle forsoken me; be it not rettid to
hem.
17 Forsoth the Lord `stood ny&yogh; to
me, and comfortide me, that the preching
be fulfillid by me, and that alle folkis
heere, and I am delyuered fro mouth
of the lyoun.
18 Forsoth the Lord delyuerede
me fro al yuel werk, and schal
make saaf into his heuenli kingdom, to
whom glorie into worldis of worldis.
19 Amen. Greete wel Prisca, and Aquyla,
and the hows of Onosephorus.
20 Forsoth
Erastus dwelte, `or lefte, at Corynthi.
Forsoth I lefte Trophymus syk at Mylete.
-- --
21 Sothli hi&yogh;e thou for to come bifore
wynter. Embolus, and Prudent,
and Lynus, and Claudia, and alle britheren,
greeten thee wel.
22 Oure Lord
Jhesu Crist with thi spirit. The grace
of God with &yogh;ou. Amen.
Here endith the secunde pistle to
Tymothe, and bigynneth the prolog to
Tyte.
-- --
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
