Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
II. THESSALONIANS.
The prologe in the secunde pistle.
To Tessalonycensis the apostle wrytith
the secunde pistle, and makith knowe to
hem of the laste tymes, and of the distruccioun
of the aduersarie, that is, anticrist;
wrytinge this pistle from Athenys
by Titicus, a dekene, and Honesym,
a colyt.
Here endith the prolog, and bigynneth
the secunde pistle of Tessalonycensis.
The secounde epistle to Tessalonycense.
CAP. I.
1 Poul, and Siluan, and Tymothe, to the
chirche of Tessalonycensis, in God oure
fadir,
2 and in the Lord Jhesu Crist, grace
to &yogh;ou and pees of God, oure fadir, and
of the Lord Jhesu Crist.
3 We schullen,
-- --
`or owen, do thankyngis euermore to
God for &yogh;ou, britheren, so as it is worthi,
for &yogh;oure feith ouerwexith, and the charite
of ech of &yogh;ou to gidere haboundith.
4 So
that we silf glorien in &yogh;ou in the chirchis
of God, for &yogh;oure pacience and feith in
alle &yogh;oure persecuciouns and tribulaciouns.
5 The whiche &yogh;e susteynen into the ensaumple
of the iust dom of God, that &yogh;e
be had worthi in the kyngdom of God,
for which and &yogh;e suffren.
6 If netheles it
is iust at God for to quyte &yogh;eldyng to
hem that trublen &yogh;ou,
7 and to &yogh;ou that
ben trublid, reste with vs in the schewinge
of oure Lord Jhesu Crist fro heuene,
with aungels of his vertu,
8 in the
flawme of fyer, &yogh;yuynge veniaunce to hem
that knewen not God, and that obeyen
not to the euangelie of oure Lord Jhesu
Crist.
9 The whiche schulen &yogh;yue, `or suffre,
euere lastinge peynes, in perisching
fro the face of the Lord, and fro the
glorie of his vertu,
10 whanne he schal come
for to be glorified in his seyntis, and for
to be maad wondirful in alle men that
bileueden, for oure witnessyng is bileued
on &yogh;ou, in that day.
11 In which thing also
we preien euermore for &yogh;ou, that oure
God `fouchesaf for to clepe &yogh;ou in his
clepyng, and fulfille al the wille of his
goodnesse, and the werk of feith in vertu;
12 that the name of oure Lord Jhesu Crist
be clarified in &yogh;ou, and &yogh;e in it, vp the
grace of oure `God, and of the Lord Jhesu
Crist.
CAP. II.
1 Forsothe, britheren, we preien &yogh;ou by
the comynge of oure Lord Jhesu Crist,
and oure congregacioun into the same
thing,
2 that &yogh;e be not moued soone fro
&yogh;oure witt, nether be agast, nethir bi
spirit, nethir by word, nether by epistle as
sent by vs, as the day of the Lord be
-- --
ny&yogh;.
3 That no man disceyue &yogh;ou in ony
maner. For no but `departyng awey,
`or dissencioun, schal come first, and the
man of synne schal be schewid, the sone
of perdicioun,
4 that is aduersarie, and is
enhaunsid vpon al thing that is seid
God, or that is worschipid, so that he
sitte in the temple, `or into the temple, of
God, schewinge him silf as he be God.
5 Wher &yogh;e holden not, that &yogh;it whanne I
was at &yogh;ou, I seide thes thingis to &yogh;ou?
6 And now what withholdith, &yogh;e witen, that
he be schewid in his tyme.
7 Forwhi the
mysterie, `or priuyte, of wickidnesse
worchith now; oonly that he that holdith
now, holde, til it be maad of the myddel.
8 And thanne `the ilke wickid man schal
be schewid, whom the Lord Jhesu schal
sle with the spirit of his mouth, and schal
distroye with the illumynyng, `or
schynyng, of his comyng. `Jhesus schal
sle him,
9 whos comyng is vp the worching
of Sathanas, in al vertu, and signes,
and grete wondris, lyinge, `or fals,
and in al disseit of wickidnesse,
10 to hem
that perischen. For that thei resceyueden
not the charite of treuthe, that thei schulden
be maad saaf. Therfore God schal
sende to hem a worching of errour, that
thei bileue to leesyng,
11 `or gabbyng, that
alle be demyd, `or dampned, the whiche
bileueden not to treuthe, but consentiden
to wickidnesse.
12 Forsoth we owen for
to do thankingis euermore to God for &yogh;ou,
&yogh;e `bretheren loued of God, that God
chees vs primyssis, `or firste fruytis, into
heelthe, in halowyng of spirit and feith
of treuthe;
13 in the which and he clepide
-- --
&yogh;ou by oure gospel, into getynge of the
glorie of oure Lord Jhesu Crist.
14 `And
so, britheren, stonde &yogh;e, and `holde &yogh;e the
tradiciouns, `or techingis, that &yogh;e han lerud,
ethir by word, ethir by oure pistle.
15 Forsothe oure Lord Jhesu Crist him silf,
and God and oure fadir, the which
louede &yogh;ou, and &yogh;af euerlasting comfort
and good hope in grace,
16 stirre, `or moneste,
&yogh;oure hertis, and conferme in al
`werk and good word.
CAP. III.
1 Britheren, `hennis forthward preie &yogh;e
for vs, that the word of God renne, and
be clarified,
2 as and anentis &yogh;ou; and that
we be delyuered fro vncouenable, `or
noyous, and yuele men; sothli feith is
not of alle men.
3 Forsoth the Lord is
trewe, that schal conferme vs, and schal
kepe fro yuel.
4 Sothli, britheren, we
tristen of &yogh;ou in the Lord, for what
euere thingis we bydden, and &yogh;e don
and schulen don.
5 Forsoth the Lord
dresse &yogh;oure hertis, in the charite of God,
and pacience of Crist.
6 Forsothe, britheren,
we denouncen to &yogh;ou in the name
of oure Lord Jhesu Crist, that &yogh;e withdrawe
&yogh;ou fro ech brother wandrynge vnordynatly,
`or a&yogh;ens good ordre, and not
vp the tradicioun, that thei resceyueden
of vs.
7 Sothli &yogh;e &yogh;e silf witen, how it
bihoueth for to sue vs. For we weren
not `inquyet, `or reste, or in pesyble,
among &yogh;ou,
8 nether frely, `or withoute oure
owne traueil, we eeten breed of ony man,
but in trauel and werynesse ny&yogh;t and day
worchinge, that we greueden noon of &yogh;ou.
9 Not as we hadden not power, but that we
-- --
schulden &yogh;yue vs silf a foorme, `or ensaumple,
for to sue vs.
10 Forwhi and
whanne we weren anentis &yogh;ou, this thing
we denounsiden, `or warneden, to &yogh;ou,
for if ony man wole not worche, nether
ete he.
11 Sothli we han herd summe
among &yogh;ou `for to wandre `in quyet, or
reste, or in pesibli, no thing worchinge,
but doynge curiously.
12 Forsoth we denounsen
to hem that ben siche maner
men, and bisechen in the Lord Jhesu
Crist, that thei with silense, `or stilnesse,
worchinge, ete her owne breed.
13 Forsothe
nyle &yogh;e, britheren, fayle wel doynge `in
Crist Jhesu oure Lord.
14 That if ony man
`schal not obeie to oure word by epistle,
marke &yogh;e hym, and comune &yogh;e not with
him, that he be confoundid, `or schamed;
and nyle &yogh;e gesse hym as an enemy,
15 but
`reproue &yogh;e him as a brother. Forsothe
`the ilke God of pees &yogh;yue to &yogh;ou euerlastyng
pees in al place.
16 The Lord be with
alle &yogh;ou.
17 My salutacioun by the hond of
Poul; `that is signe in ech epistle. I
write thus.
18 The grace of oure Lord
Jhesu Crist be with `alle &yogh;ou. Amen.
Here endith the secunde pistle to Tessalonycensis,
and bigynneth the prolog to
the firste pistle to Tymothe.
-- --
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
