Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. VI.
1 And the Lord spak to Moyses, seiynge,
Spek to the sones of Yrael,
2 and thow
shalt seye to hem, A man or womman,
whanne he doth auowe, that thei ben halowid,
and thei wolen him self sacre to
the Lord,
3 fro wiyn, and fro al that may
make dronkun, thei shulen absteyne; eisel
of wiyn, and of eny othir maad drynke,
and what thing of grape is out pressid,
thei shulen not drynke; new grapes and
dried thei shulen not eete,
4 alle the daies
in the which of auowe to the Lord thei
ben sacryd; what thing may be of vyn,
of grape dried vnto the popyn, thei shulen
not eete.
5 Al the tyme of his seuerynge
a rasour shal not passe vpon his
heed, vnto the fulfillid day in the which
he is sacred to the Lord; he shal be holy,
-- --
growynge the heer of his heed.
6 Alle
tyme of his sacrynge he shal not goo yn
vpon the deed,
7 ne vpon faders forsothe,
and moders, and bretheren, and sistren
careyn he shal be defoulid, for the sacrynge
of his God is vpon his heed;
8 eche
day of his seuerynge shal be holy to the
Lord.
9 If forsothe eny man were sodeynlich
deed before hym, the heed of his
consecracioun shal be polut, the which
anoon he shal shaue in the same day of
his purgacioun, and eftsones the seuenthe
day;
10 in the ei&yogh;tith forsothe day he shal
offre two turturs, or two culuer briddes,
to the preest, in the entre of the boond
of pees of witnessynge.
11 And the preest
shal do oon for the synne, and anothir in
to brent sacrifice; and he shal preye for
hym, for he hath synned vpon the deed,
and he shal halowe the heed of hym in
that day.
12 And he shal sacre to the Lord
the daies of his seuerynge, offrynge a
lombe of o &yogh;eer for the synne, so neuerthelater
that the rather daies ben maad
as for no&yogh;t, for polut is the halowynge of
hym.
13 This is the lawe of consecracioun.
Whanne the daies which of auow he
demed ben fulfillid, he shal brynge hym
to the dore of the tabernacle of the
boond of pees,
14 and he shal offre his offrynge
to the Lord, a lombe of o &yogh;eer
with outen wemme, into brent sacrifice,
and a sheep of o &yogh;eer with outen wemme,
for synne, and a wethir with outen
wemme,
15 a pesible oost; a leepe forsothe
of theerf looues, that ben spreynt with
oyle, and thinne cakys with out sourdow&yogh;,
anoynt with oyle, and of echon the
sacrifices of licours;
16 the whiche the preest
shal offre before the Lord, and he shal doo
as wel for synne as into brent sacrifices.
17 A wethir forsothe he shal offre a pesible
oost to the Lord, offrynge to gidre a leepe
-- --
of therf looues, and sacryfices of licours,
that of maner ben owed.
18 Thanne the
Nazare shal be shaued at the dore of the
tabernacle of the boond of pees, fro the
heere of his consecracioun; and he shal
take his heeres, and putte vpon the fijr,
that is vndurput to the sacrifice of pesible
thinges;
19 and a shuldre sothen of
the wether, and a caake of breed with
outen sowrdow&yogh;, oon of the leepe, and o
thinne therf caake, and he shal take in
the hoondes of the Nazare, after that
were shauun the heed of hym.
20 And the
takun thingis eftsones of hym he shal
arere in the si&yogh;t of the Lord. And the
halowid thinges shal be of the preest, as
the litil brest that is comaundid to be
seuered, and the hippe. Aftir thes thingis
the Nazare may drynke wiyn.
21 This is
the lawe of the Nazare, whanne he auowith
his offrynge to the Lord, the tyme of
his consecracioun, out taak thes thingis
the whiche the hoond fyndeth. Aftir that
that he hath auowid in thou&yogh;t, so he shal
do, to the perfeccioun of his holynes.
22 And
the Lord spak to Moyses,
23 seiynge, Spek
to Aaron and his sones, So &yogh;e shulen
blesse to the sones of Yrael, and &yogh;e shulen
seie to hem,
24 The Lord blesse to thee,
and kepe thee;
25 the Lord shewe his face
to thee, and haue mercy of thee;
26 the Lord
conuerte his chere to thee, and &yogh;eue to
thee pees.
27 Thei shulen inwardly clepe my
name vpon the sones of Yrael, and Y shal
blesse to hem.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
