Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. IV.
1 And the Lord spak to Moyses and Aaron,
seyynge,
2 Take the sowm of the sones
of Caath, fro the myddil of Leuytes, bi
houses,
3 and her meyneis, fro the thrytti
&yogh;eer and aboue vnto the fifty &yogh;eer, of alle
-- --
that goon in, that thei stonden and mynystren
in the tabernacle of the boond of
pees.
4 This is the heriynge of the sones
of Caath; the tabernacle of the boond of
pees,
5 and the holi of halowis shulen go
yn Aaron and his sones, whanne the
tentis ben to be moued; and thei shulen
sette down the veile that hongith before
the &yogh;atis, and thei shulen wrap with ynne
it the ark of witnessynge;
6 and thei shulen
eftsones couer it with the couerynge
of iacynctyne skynnes, and thei shulen
strecche aboue a mantel al iacynctyne,
and thei shulen lede in the berynge
staues.
7 The table forsothe of proposicioun
thei shulen wrappe with ynne the iacynctyne
mantil, and thei shulen putte with
it the encenseris, and goldun morters, litil
cuppes, and the eryd chalices to the sacrifices
of licours to ben heelde; looues euermore
shulen be in it.
8 And thei shulen
strecche there aboue the reed mantil, the
whiche eft thei shulen couer with the
couerynge of iacynctyn skynnes, and thei
shulen lede ynne the berynge staues.
9 And
thei shulen take the iacynctyn mantil,
with the which thei shulen couer the
candelstik, with the lanterns, and her
toonges, and snyters, and with alle the
vessels of oyle, the whiche ben necessary
to the lanterns to be maad redi;
10 and
vpon alle thei shulen putte the couerynge
of iacynctyn skynnes, and thei shulen
lede ynne her berynge staues.
11 Also and
the goldun auter thei shulen wrappe with
ynne the iacynctyn clothing; and thei
shulen strecche out there aboue the couerynge
of iacynctyn skynnes, and thei shulen
lede yn the beryng staues.
12 Alle the
vessels, with the whiche it is mynystryd
in the seyntuary, thei shulen wrappe with
-- --
inne the iacynctyn mantel, and strecch
there aboue a couertour of iacynctyn
skynnes, and thei shulen lede yn the berynge
staues.
13 But and the auter thei shulen
clense with asken, and thei shulen
wrappe it with a purpur clothinge.
14 And
thei shulen putt with it alle the vesselis,
the whiche thei vsen in the seruyce of it,
that is, the resseyuable thinges of fiers,
fleshokis, and `hokys of thre teeth, and
hokes, and fyre pannes; alle the vessels
of the auter thei shulen couer togyder
with a couerynge of iacynctyn skynnes,
and thei shulen lede yn the berynge
staues.
15 And whanne Aaron and his sones
han inwrappid the seyntuary, and alle the
vessels of it, in the meuynge of tentes,
thanne shulen goon yn the sones of
Caath, that thei beren with ynne wrappid,
and that thei touchen not the vessels
of the seyntuary, lest thei dien.
16 Thes
ben the charges of the sones of Caath, in
the tabernacle of the boond of pees, vpon
whom shal be Eliazar, the sone of Aaron
preest; to whos cure it perteyneth oyle
to the lanterns to be maad redi, and the
encense of composicioun, and the sacrifice
that euermore is offred, and the oyle of
anoyntinge, and what euer thing to the
heriynge `of the tabernacle perteyneth,
and of alle the vessels that ben in the
seyntuarye.
17 And the Lord spak to Moyses
and Aaron,
18 seyynge, Wole &yogh;e not lese the
puple of Caath fro the myddel of Leuytes;
but this doth to hem,
19 that thei
lyuen, and dien not, if thei towchen the
holi thingis of halowes. Aaron and his
sones shulen go yn, and thei shulen dyspose
the werkis of echon, and thei shulen
dyuyde what eny owith to bere.
20 Other
thur&yogh; no curiouste seen that ben in the
seyntuarye, before that thei ben inwrappid,
-- --
ellis thei shulden die.
21 And the Lord
spak to Moyses,
22 seiynge, Tak also the
sowm of the sones of Gerson, bi howses,
and meyneis, and his kynredes;
23 fro thretti
&yogh;eer and aboue and vnto the &yogh;eres of
fifti, noumbre alle that goon yn, and
seruen in the tabernacle of the boond of
pees.
24 This is the office of the meyne of
Gersonytes, that thei beren cortyns of
the tabernacle, and the roof of the boond
of pees,
25 that other couertour, and vpon
alle the iacynctyn couerynge, and the
tente that hongith in the entre of the tabernacle
of the boond of pees;
26 the cortyns
of the porche, and the veil in the
entre that is before the tabernacle.
27 Alle
thingis that perteynen to the auter, litil
coordes, and the vessels of seruyce, comaundynge
Aaron and his sones, the
sones of Gerson shulen bere; and eche
shal knowe to what charge thei owen to
be takun.
28 This is the heriynge of the
meyneis of Gersonytes, in the tabernacle
of the boond of pees; and thei shulen be
vndir the hoond of Ythamar, the sone of
Aaron, preest.
29 The sones forsothe of
Merarye, bi meyneis and howses of her
fadris,
30 thou shalt noumbre, fro thretti
&yogh;eer and aboue vnto the &yogh;eers of fifti, alle
that goon into the office of his seruyce,
and heriynge of the boond of pees of witnessynge.
31 Thes ben the charges of hem;
thei shulen bere the tablis of the tabernacle,
and his berynge staues, the pilers,
and the feet of hem;
32 and the pilers of
the porche bi enuyroun, with her feet,
and stakys, and her coordes; alle vessels
and purtenaunce at noumbre thei shulen
take, and so thei shulen bere.
33 This is
the office of the meyne of Merarytes, and
the seruyce in the tabernacle of the boond
of pees; and thei shulen be vndir the
hoond of Ythamar, the sone of Aaron,
-- --
preest.
34 Thanne Moyses and Aaron, and
the princes of the synagoge, noumbreden
the sones of Caath, bi kynredes, and
howses of her fadres,
35 fro thretti &yogh;eer and
aboue vnto fifti &yogh;eer, alle that goon into
the seruyce of the tabernacle of the boond
of pees;
36 and there ben foundun two thowsyndes
seuen hundred and fifti.
37 This is
the noumbre of the sones of Caath, that
goon into the tabernacle of the boond of
pees; `thes noumbreden Moyses and Aaron,
aftir the word of the Lord, bi the
hoond of Moyses.
38 And sones of Gerson
ben noumbred, bi kynredes, and howses
of her fadris,
39 fro thretti &yogh;eer and a boue
vnto the fiftith &yogh;eer, alle that goon yn
that thei mynystren in the tabernacle of
the boond of pees;
40 and there ben foundun
two thowsynd six hundreth and thretti.
41 This is the puple of Gersonytes, the
which noumbreden Moyses and Aaron,
after the word of the Lord.
42 The sones
of Merarye ben noumbred, bi kynredes,
and houses of her fadres,
43 fro thretti &yogh;eer
and a boue vnto the fifty &yogh;eer, alle that
goon yn to fulfille the rytis of the tabernacle
of the boond of pees;
44 and ther ben
foundun thre thowsyndes and two hundrith.
45 This is the noumbre of the sones
of Merarye, the whiche noumbreden
Moyses and Aaron, aftir the heest of the
Lord, bi the hoond of Moyses.
46 Alle that
ben noumbred of the Leuytes, and the
whiche he dide to be noumbred at the
name, of Moyses and Aaron, and the
princes of Yrael, bi kynredis, and howses
of her fadres,
47 fro thretti &yogh;eer and a boue
vnto the fifti &yogh;eer, goynge into the seruyce
of the tabernacle, and berthens to
be bore,
48 and there weren togidir ei&yogh;t
thowsyndes fyue hundrid and ei&yogh;ty.
49 After
the word of the Lord Moises noumbred
hem, echon aftir his office and his
charges, as the Lord comaundide to hym.
-- --
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|