Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XVI.
1 Loo! forsothe Chore, the sone of Ysuar,
the sone of Caath, the sone of Leuy, and
Datan and Abyron, the sones of Heliab,
and Hon, the sone of Pheleph, of the
sones of Ruben,
2 arysen a&yogh;ens Moyses,
and other of the sones of Yrael, two hundryd
and fifty noble men of the synagoge,
and the whiche in tyme of counseil bi
names weren clepid.
3 And whanne thei
stoden a&yogh;ens Moyses and Aaron, thei
seiden, It sufficith to vs, for al the multitude
of halowis is, and in hem is the
Lord; whi ben &yogh;e arered vpon the puple
of the Lord?
4 The whiche thing whanne
Moyses hadde herde, he felle redy into
-- --
the face;
5 and he spak to Chore, and to
al the multitude; Eerly, he seith, the
Lord shal make knowun whiche perteynen
to hym, and the halowis he shal
sett to hym; and whom he chesith, shal
nei&yogh; to hym.
6 This therfor doo &yogh;e; tak
echon his censere, thow Chore, and al thi
counseil;
7 and to morwe the fier drawun
vp, put &yogh;e there aboue the maad encense
before the Lord, and whom euer he
chesith, he shal be holy. Myche &yogh;e sones
of Leuy ben areryd.
8 And eft he seide to
Chory, Herith, &yogh;e sones of Leuy.
9 Whether
litil it is to &yogh;ow, that God of Yrael hath
seuerde &yogh;ow fro al the puple, and ioynede
to hym silf, that &yogh;e seruen to hym in
heriynge of the tabernacle, and stoonden
before the myche comynge of the puple,
and mynystre to hem?
10 Therfor to hym
silf he hath maad thee to come ny&yogh;, and
alle thi britheren the sones of Leuy, that
to &yogh;ow also preesthood &yogh;e chalengen,
11 and
al thi glubbe stoonde a&yogh;ens the Lord?
What is forsothe Aaron, that &yogh;e grucchen
a&yogh;ens hym?
12 Thanne Moyses sente for to
clepe Datan and Abyron, the sones of
Helyab;
13 whiche answerden, We comen
not. Whether litil it is to thee, that thow
hast ladde vs fro the loond that flowide
mylk and hony, that thow slee in deseert,
but and thow haue lordship on vs?
14 Forsothe thow hast lad vs into the loond
that flowith ryuers of mylk and hony,
and thow hast &yogh;yue to vs possessiouns of
feeldes, and of vynes; whether and oure
eyen thow wolt drawe out? We comen
not.
15 And Moises ful wrooth seith to the
Lord, Bihold thow not the sacrifices of
hem; thow wost that and a litil asse
forsothe Y neuer took of hem, ne wrongfully
traueylde eny of hem.
16 And he
seide to Chore, Thow and al thi congrygacioun
stondith asijd before the Lord,
-- --
and Aaron to morwe atwynne.
17 Take &yogh;e
eche &yogh;oure senserys, and puttith vpon hem
encense, offrynge to the Lord, two hundrid
and fifti censerys; Aaron forsothe
holde he his censer.
18 The which thing
whanne thei hadden doo, stoondynge
Moyses and Aaron,
19 and thei hadden gederyde
on an heepe a&yogh;ens hem al the multitude
at the dore of the tabernacle, to
alle aperyd the glorye of the Lord.
20 And
the Lord spak to Moyses and Aaron, and
seith,
21 Be &yogh;e seuerd fro the myddil of this
congregacioun, that hem grijslich Y make
lost.
22 The whiche fellen redi into the
face, and seiden, Moost stroong God of
the spirytis of al flesh, whether oon synnynge,
a&yogh;ens alle thi wrath shal waxe
cruel?
23 And the Lord seith to Moyses,
Comaund to al the puple,
24 that it be seuerd
fro the tabernaclis of Chore, and
Datan, and Abiron.
25 And Moyses aroos,
and wente to Datan and Abiron; and
folwynge hym the aldren of Yrael,
26 he
seide to the puple, Goth awey fro tabernaclis
of vnpitows men, and wole &yogh;e not
touche that to hem parteynen, lest &yogh;e be
wrapped in the synnes of hem.
27 And
whanne thei weren goon fro the tentes
of hem bi enuyroun, Dathan and Abiron
goon out, stoden in the entre of her tentes,
with wyues, and free children, and al the
felowshipe.
28 And Moyses seith, Yn this
&yogh;e knowen that the Lord sente me, that
I doo alle the thingis that &yogh;e seen, and
not of propre herte hem I brynge forthe.
29 If thur&yogh; vsid deeth of men thei dien, and
visyte hem a veniaunce, with the which
and other ben woned to be visytid, the
Lord hath not sente me;
30 if forsothe a
newe thing the Lord doo, that the erthe
opnynge his mouth swelowe hem, and
-- --
alle thingis that to hem perteynen, and
goon down lyuynge into helle, &yogh;e shulen
wyte that thei han blasfemyd the Lord.
31 Anoon thanne as he cesyde to speke, the
erthe is brokun vndur the feet of hem,
and openynge his mouth deuowride hem,
32
with her tabernaclis, and al the substaunce
of hem;
33 and thei dessendiden quyk into
helle, couerd with the erthe, and thei pershyden
fro the myddil of the multitude.
34 And forsothe al Irael that stood bi enuyroun,
flee&yogh; fro the crie of hem perishynge,
seiynge, Lest perauenture and vs the erthe
swelow.
35 But and fier goon out fro the
Lord, slew&yogh; two hundrid and fifti men
that offerden encense.
36 And the Lord
spaak to Moyses,
37 seiynge, Comaund to Eleazar,
the sone of Aaron, preest, that
he take the encensers that liggen in the
brennynge, and the fier hidir and thidir
scater he;
38 for thei ben halwid in the
dethis of synful men; and beet he hem
forthe into platis, and fitche he to the
auter, forthi that there is offerd in hem
encense to the Lord, and be halwid, that
the sones of Yrael biholden hem for
tookne and mynde.
39 Thanne Eleazar, the
preest, took the brasen censerys, in the
whiche offerden thes whom the tendynge
deuowride, and he bette hem forthe into
plates, fitchynge to the auter;
40 that aftirward
the sones of Yrael my&yogh;ten haue, bi
the whiche thei shulden take mynde, lest
eny of other kynrede, and that is not of
the seed of Aaron, come ni&yogh; to offre encense
to the Lord, lest he suffre as Chore
suffrede, and al the multitude of hym,
spekynge the Lord to Moyses.
41 Forsothe
al the multitude of the sones of Irael
grutchide the day folwynge a&yogh;ens Moyses
and Aaron, seiynge, &YOGH;e han slayn the
puple of the Lord.
42 And whanne there
-- --
was sprongun dissencioun, and noyse with
ynne waxed,
43 Moyses and Aaron flowen
to the tabernacle of the boond of pees;
the whiche aftir thei ben goon ynne,
couerde a clowde the tabernacle, and
aperyde the glorie of the Lord.
44 And
the Lord seide to Moyses and Aaron,
Goth awey fro the myddil of this multitude,
45
also nowe I shal doo hem awey.
46 And whanne thei lyen in the erthe, Moyses
seide to Aaron, Take a censer, and
fier drawun vp fro the auter, put incense
there aboue, goynge anoon to the puple,
that thow preye for hem; now forsothe
is goon out wrath fro the Lord, and a
veniaunce waxith wood.
47 The whiche
thing whanne Aaron hadde do, and hadde
runne to the myddil multitude, that nowe
wastid the brynnynge, he offrede the
maad encense;
48 and stondynge betwix
the deed and the lyuynge, for the puple
preyde, and the veniaunce ceside.
49 There
weren forsothe that weren smyttun fourtene
thowsynd of men and seuen hundrid,
with outen hem that pershiden in
the dissencioun of Chore.
50 And Aaron
turnede a&yogh;en to Moyses, at the dore of the
tabernacle of the boond of pees, aftir that
restide the deeth.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
