CAP. IX.
1 And Jhesu passinge, sy&yogh; a man blynd
fro the birthe.
2 And his disciplis axiden
him, Raby, `that is, Maistir, who synnede,
this man, or his fadir and modir,
that he schulde be born blynd?
3 Jhesu
answeride, Nether this man synnede, neither
his fadir and moder; but that the
werkis of God be schewid in hym.
4 It
bihoueth me for to worche the werkis
of him that sente me, the while the day
is; the ny&yogh;t schal come, whanne no man
may worche.
5 Hou longe I am in the
world, I am the li&yogh;t of the world.
6 Whanne
he hadde seid thes thingis, he spette in
to erthe, and made cley of the spotle,
and leyde, `or bawmede, the cley on his
y&yogh;en,
7 and seide to him, Go, and be thou
wayschen in the watir, `or cisterne, of
Siloe, that is interpretid, Sent. Therfore
he wente, and waischide, and cam seynge.
8 And so nei&yogh;eboris, and thei that
hadden seyn hym byfore, for he was a
beggere, seiden, Wher this is not he, that
sat, and beggide?
9 Othere men seiden,
-- --
For this it is; othere men forsothe, Nay,
but it is a lyk of him.
10 Forsoth he
seide, For I am. Therfore thei seiden
to him, How ben thin y&yogh;en openyd `to
thee?
11 He answeride, `The ilke man,
that is seid Jhesu, made cley, and anoyntide
myn y&yogh;en, and seide to me, Go thou
to the watir, `or cisterne, of Siloe, and
waische; and I wente, and waischide, and
sy&yogh;.
12 And thei seiden to him, Wher is he?
13 He seith, I woot not. Thei leden him that
was blynd to the Pharisees.
14 Forsoth
it was saboth, whanne Jhesu made cley,
and openyde his y&yogh;en.
15 Eft Pharisees
axiden him, how he hadde seyn. Sothly
he seide to hem, He puttide to me cley
on the y&yogh;en; and I waischide, and I se.
16 Therfore summe of Pharisees seiden, This
man is not of God, for he kepith not the
saboth. Othere men seyden, How may
a man synnere do thes syngnys, `or myraclis?
And dyuysioun was a mong hem.
17 Therfore thei seyn eftsoone to the blynd
man, What seist thou of him, that openyde
thin y&yogh;en? Sothli he seide, For he
is a prophete.
18 Therfore Jewis bileueden
not of him, for he was blynd, and hadde
seyn, til thei clepiden his fadir and modir,
that hadde seyn.
19 And thei axiden hem,
seyinge, `Is this &yogh;oure sone, whom &yogh;e
seyn, for he is born blynd? hou therfore
seeth he now?
20 His fadir and modir answeriden
to hem, and seyden, We witen,
for this is oure sone, and for he is born
blynd;
21 sothli how he seeth now, we
witen not, or who openyde his y&yogh;en, we
witen not; axe &yogh;e him, he hath age, speke
he of him silf.
22 His fadir and modir
seiden thes thingis, for thei dredden
Jewis; forsoth now the Jewis `hadden
conspirid, that if ony man knowlechide
him Crist, he schulde be don out of the
-- --
synagoge.
23 Therfore his fadir and modir
seiden, For he hath age, axe &yogh;e him.
24 Therfore eftsoone thei clepiden the man,
that was blynd, and seyden to him, &YOGH;yue
thou glorie to God; we witen, for this
man is a synner.
25 Therfore he seide, If
he is a synner, I woot not; o thing I
woot, for whanne I was blynd, now I se.
26 Therfore thei seiden to him, What dide
he to thee? how openyde he thin y&yogh;en?
27 He answeride to hem, I seide to &yogh;ou now,
and &yogh;e herden; what wolen &yogh;e eftsoone
heere? wher and &yogh;e wolen be maad his
disciplis?
28 Therfore thei `wariden, or
cursiden, him, and seiden, Be thou his
disciple; we ben disciplis of Moyses.
29 We
witen, for God spak to Moyses; forsoth
we witen no&yogh;t this, of whennis he is.
30 The ilke man answeride, and seide to
hem, Forsoth in this thing is wonderful,
that &yogh;e witen not of whennis he is, and
he hath opened myn y&yogh;en.
31 Sothli we
witen, for God heerith not synneris, but
if ony man is worshiper of God, and doth
his wille, hym he heerith.
32 Fro the world
it is not herd, that ony man openyde the
y&yogh;en of a blynd born man;
33 no but
this were of God, he my&yogh;te not do ony
thing.
34 Thei answeriden, and seiden to
him, Thou art al boren in synnes, and
`techist thou vs? And thei castiden `out
him.
35 Jhesu herde, for thei `han cast
`out him; and whanne he hadde founden
him, he seide to him, Bileuest thou in to
the sone of God?
36 He answeride, and
seide, Lord, who is he, that I beleue in
to him?
37 And Jhesu seide to him, And
thou hast seyn him, and he it is, that
spekith with thee.
38 And he seide, Lord,
I bileue. And he fallinge doun, worshipide
him.
39 Therfore Jhesu seide to him,
I cam in to this world, in to dom, that
thei that seen not, se, and thei that seen,
-- --
be maad blynde.
40 And summe of the
Pharisees herden, that weren with him,
and thei seiden to him, Wher and we
ben blynde?
41 Jhesu seide to hem, If &yogh;e
weren blynde, &yogh;e schulden not haue synne;
but now &yogh;e seyn, For we seen, &yogh;oure
synne dwellith.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
