1   Therfore as Jhesu knew, that Pharisees herden, that Jhesu makith mo disciplis and baptysith, 2   than John, thou&yogh; Jhesu baptiside not, 3   but his disciplis, he lefte Judee, and wente a&yogh;en in to Galilee. 4   Sothli it bihofte him to passe bi Samarie. 5   Therfore Jhesu cam `in to a citee

of Samarie, that is seyde Sycar, bisydis the `manere, or feeld, that Jacob &yogh;af to Joseph, his sone. 6   Forsoth the welle of Jacob was there; sothli Jhesu `maad wery, or feynt, of the iurney, sat thus on the welle. Sothli the our was, as the sixte, `or vndurn. 7   A womman cam of Samarie, for to drawe watir. Jhesu seith to hir, &YOGH;yue to me `for to drynke. 8   Forsoth his disciplis hadden gon in to the citee, that thei schulden bye metis. 9   Therfore `the ilke womman of Samarie seith to him, How thou, whanne thou ert a Jew, axist of me `for to drynke, which am a womman of Samarie? forsothe Jewis vsen not with Samaritans. 10   Jhesu answeride, and seide to hir, If thou wistist the &yogh;ifte of God, and who it is, that seith to thee, &YOGH;yue to me for `to drynke, thou perauenture schuldest haue axid of him, and he schulde haue &yogh;ouun to thee quyk watir. 11   The womman seith to him, Sire, nether thou hast in what thing thou schalt drawe, and the pitt is deep; therfore wherof hast thou quyk watir? 12   Wher thou art more than oure fadir Jacob, that &yogh;aue to vs this pitt? and he drank therof, and his sones, and his beestis. 13   Jhesu answeride, and seide to hir, Ech man that drynkith of this watir, schal thirste eftsoone; forsothe he that schal drynke of the watir that I schal &yogh;yue to him, schal not thirste in to with outen ende; 14   but the watir that I schal &yogh;yue to him, schal be maad in him a `welle of watir, spryngynge vp in to euerelastinge lyf. 15   The womman seith to him, Sire, &yogh;yue to me this watir, that I thirste not, nether come hidir for to drawe.

16   Jhesu seith to hir, Go, clepe thin hosebonde, and come hidur. 17   The womman answeride, and seide, I haue not an hosebonde. Jhesu seith to hir, Thou seidist wel, For I haue `not an hosebonde; 18   forsoth thou hast had fyue hosebondis, and he whom thou hast, is not thin hosebonde. This thing thou seidist sothli. 19   The womman seith to him, Lord, I se, for thou art a prophete. 20   Oure fadris worschipiden in this hil, and &yogh;e seyn, for at Jerusalem is a place, wher it bihoueth for to worschipe. 21   Jhesu seith to hir, Womman, bileue to me, for the our schal come, whanne nether in this hil, nether in Jerusalem, &yogh;e schulen `preye, or worschipe, the fadir. 22   &YOGH;e worschipen that that &yogh;e witen not; we worschipen that that we witen; for heelthe is of Jewis. 23   But the our cometh, and now it is, whanne trewe worschiperis schulen worschipe the fader in spirit and treuthe; forwhi and the fadir sekith suche, that schulen worschipe him. 24   God is a spirit, and it bihoueth hem that worschipen him, for to worschipe in spirit and treuth. 25   The womman seith to him, I woot for Messias is comen, that is seid Crist; therfore whanne he schal come, he schal telle to vs alle thingis. 26   Jhesu seith to hir, I am, that speke with thee. 27   And anon his disciplis camen, and wondriden, for he spak with a womman; netheles no man seide, What sekist thou, or, What spekist thou with hir? 28   Therfore the womman lefte the watir pott, and wente in to the citee, and seith to tho men, Come &yogh;e, 29   and `se &yogh;e the man, that seide to me alle thingis `what euere thingis I haue don; wher he is Crist? 30   And thei wenten out of the citee, and thei camen

to hym. 31   In the mene while his disciplis preieden him, seyinge, `Raby, or maistir, ete. 32   Sothli he seide to hem, I haue mete for to ete, that &yogh;e witen not. 33   Therfore the disciplis seiden to gidere, Wher ony man brou&yogh;te to him for to ete? 34   Jhesu seith to hem, My mete is, that I do the will of him that sente me, and that I performe the work of him. 35   Wher &yogh;e seyn not, for &yogh;it foure monethis ben, and rype corn cometh? Lo! I seie to &yogh;ou, lift vp &yogh;oure y&yogh;en, and `se &yogh;e the `regiouns, or cuntrees, for now thei ben white to ripe corn. 36   And he that repith takith hyre, `or mede, and he that gederith, fruit in to euerelasting lyf; that and he that sowith haue ioye to gidere, and he that repith. 37   In this thing sothli `the word is trewe, for another is that sowith, and another that repith. 38   I sente &yogh;ou for to repe, that that &yogh;e traueliden not; othere men traueliden, and &yogh;e entriden in to her trauelis. 39   Forsoth of the citee many Samaritans bileueden in to him, for the word of the womman beringe witnessing, For he seide to me alle thingis, what euere thingis I dide. 40   Therfore whanne Samaritans camen to him, thei preieden him, that he schulde dwelle there; and he dwelte there twey dayes. 41   And many mo bileueden for his word, 42   and seyden to the womman, For now not for thi speche we bileuen; forsoth we han herd, and we witen, for this is verily the sauyour of the world. 43   Forsoth aftir twei dayes he wente thennis, and wente in to Galilee. 44   `Sothli Jhesu bar witnessing, for a prophete in his owne cuntree hath not honour, `or worschip. 45   Therfore whanne he cam in

to Galilee, men of Galilee receyueden him, whanne thei hadden seyn alle thingis that he hadde don in Jerusalem, in the feeste day, `or haliday; and sothli thei hadden come to the feeste day. 46   Therfore he cam eftsoone in to Cana of Galilee, where he made the watir wyn. And sum litil king was, whos sone was syk at Capharnaum. 47   Whanne this hadde herd, for Jhesu schulde come fro Judee in to Galilee, he wente to him, and preiede him, that he schulde come doun, and heele his sone; forsoth he bigan to deye. 48   Therfore Jhesu seide to him, No but &yogh;e schulen se tokenes and grete wondris, &yogh;e bileuen not. 49   The litil kyng seith to him, Lord, come doun, bifore my sone deye. 50   Jhesu seith to him, Go, thi sone lyueth. The man bileuede to the word, that Jhesu seide to hym, and he wente. 51   Sothli now him comynge doun, the seruauntis camen a&yogh;ens him, and telden to him, seyinge, For his sone lyuede. 52   Therfore he axide of hem the our, in whiche he `hadde betere. And thei seiden to him, For &yogh;istirday in the seuenthe our the feuere lefte him. 53   Therfore the fadir knew, that `the ilke our it was, `in which Jhesu seide to him, Thi sone lyueth; and he bileuede, and al his hous. 54   Jhesu dide eft this secunde tokene, whanne he cam fro Judee in to Galilee.

Previous section

Next section